ARYNews.tv | Urdu – Har Lamha Bakhabar

Tag: Talat Iqbal

  • سینئر اداکار طلعت اقبال امریکا میں انتقال کرگئے، نمازِ جنازہ آج ہوگی

    سینئر اداکار طلعت اقبال امریکا میں انتقال کرگئے، نمازِ جنازہ آج ہوگی

    ٹیکساس : ماضی کے معروف اداکار طلعت اقبال شدید بیمار رہنے کے بعد آج امریکی ریاست ٹیکساس کے اسپتال میں انتقال کرگئے، طلعت اقبال کئی روز سے وینٹی لیٹر پر تھے۔

    تفصیلات کے مطابق مرحوم اہلِ خانہ نے اداکار طلعت اقبال کے انتقال کی تصدیق کردی ہے۔ ان کی نمازِ جنازہ آج بعد نماز جمعہ ادا کی جائے گی۔

    اداکار طلعت اقبال عرصۂ دراز سے امریکا کی ریاست ٹیکساس کے شہر ڈیلس میں اپنے اہلِ خانہ کے ہمراہ مقیم تھے، وہ 2 ہفتوں سے اسپتال میں زیرِ علاج اور مصنوعی تنفص پر تھے۔

    کچھ روز قبل طلعت اقبال کو جواں سالہ بیٹی سارہ کے حرکت قلب بند ہوجانے سے انتقال کر جانے کے بعد شدید صدمہ لاحق ہوا اور ان کو ملٹی پل ہارٹ اٹیک ہوئے۔ ہارٹ اٹیک کے بعد انہیں ابتدائی طبی امداد کے لیے تشویش ناک حالت میں مقامی اسپتال میں داخل کیا گیا تھا۔

    اسپتال میں ڈاکٹروں کی جانب سے مصنوعی تنفس کے ذریعے اداکار طلعت اقبال کی جان بچانے کی کوششیں جاری تھیں تاہم وہ جانبر نہ ہو سکے اور بے ہوشی کے دوران ہی انتقال کرگئے۔

    طلعت اقبال نے 1968 میں شوبز میں کام شروع کیا تھا، ٹی وی ڈراموں کے ساتھ فلموں میں بھی اداکاری کی، انہوں نے اپنے وقت کی تمام اداکاراؤں روحی بانو، شبنم، بابرہ شریف، دیبا بیگم اور خالدہ ریاست کے ساتھ اداکاری کے جوہر دکھائے۔

    بیٹی کے انتقال کا صدمہ، طلعت اقبال کی طبیعت شدید ناساز

    مرحوم طلعت اقبال کی نمازِ جنازہ آج بعد نماز جمعہ ڈیلس میں واقع مسجد الرحمٰن اسلامک ایسوسی ایشن آف کیرولٹن میں ادا کی جائے گی جس کے بعد انہیں ریسٹ لینڈ قبرستان میں سپردِ خاک کیا جائے گا۔

  • طلعت اقبال کی صاحب زادی سارہ کا انتقال

    طلعت اقبال کی صاحب زادی سارہ کا انتقال

    کراچی: ٹی وی اور فلم کے معروف اداکار طلعت اقبال کی بیٹی سارہ انتقال کر گئیں۔

    تفصیلات کے مطابق سارہ طلعت طویل علالت کے بعد آج انتقال کر گئیں، سارہ ماضی کی مقبول ترین اداکار جوڑی طلعت اقبال اور سنبل طلعت کی صاحب زادی تھیں۔

    یاد رہے کہ سارہ کی والدہ سنبل کا انتقال 2014 میں امریکی ریاست ٹیکساس میں ہوا تھا، انھیں کینسر کا موذی مرض لاحق تھا۔ سنبل طلعت ٹی وی پر اپنے کام کے حوالے سے مشہور تھیں۔

    سارہ کے والد طلعت اقبال نے 1968 میں شوبز میں کام شروع کیا تھا، ٹی وی ڈراموں کے ساتھ فلموں میں بھی اداکاری کی، انھوں نے اپنے وقت کی تمام اچھی اداکاراؤں روحی بانو، شبنم، بابرہ شریف، دیبا بیگم اور خالدہ ریاست کے ساتھ اداکاری کی۔

    پاکستان کی معروف اور سینیئر اداکارہ دردانہ بٹ انتقال کر گئیں

    2017 میں طلعت اقبال جب پاکستان آئے تھے تو آرٹس کونسل کراچی نے ان کے اعزاز میں ایک تقریب منعقد کی تھی، جس میں انھوں نے کہا تھا کہ انھیں یہ نہیں معلوم تھا کہ آج بھی لوگ ان سے اتنا پیار کرتے ہیں۔

    طلعت اقبال نے کہا میرا دل بہت کرتا ہے کہ میں پاکستان میں رہوں اور ڈراموں میں کام کروں اس لیے میں نے لوگوں کے اصرار پر فیصلہ کیا ہے کہ کچھ عرصہ پاکستان میں رہوں گا اور اداکاری بھی کرں گا، تاہم اس کا موقع نہ مل سکا۔