ماسکو: روسی پارلیمنٹ نے افغان طالبان کا نام دہشتگردوں کی فہرست سے نکالنے کا قانون بل منظور کرلیا۔
غیر ملکی میڈیا کے مطابق روسی پارلیمنٹ کی جانب سے نئے قانون کی منظوری کے بعد روس کی عدالت طالبان پر لگی پابندی ہٹانے کی مجاز ہوگی۔
رپورٹ کے مطابق روسی پارلیمنٹ نے کالعدم تنظیموں پر پابندی پر عمل درآمد روکنے کاقانون منظور کر لیا ہے، قانون کی منظوری سے روس کے افغانستان کی طالبان حکومت کو تسلیم کرنے کی راہ ہموار ہوگئی ہے۔
روس نے سال 2003 میں افغان طالبان کو دہشت گرد تنطیم کی فہرست میں شامل کیا تھا، پابندی کے باوجود روس نے مختلف مواقعوں پر طالبان سے براہِ راست رابطے کیے۔
رپورٹ کے مطابق یہ بل روس کے لیے نہ صرف طالبان کے ساتھ تعلقات کو معمول پر لانے کی راہ ہموار کر سکتا ہے بلکہ ممکنہ طور پر شام کی حیات تحریر الشام جیسے دیگر گروپس سے رابطے بحال ہو سکتے ہیں۔
بل کو حتمی منظوری کے لیے صدر پوٹن کو بھیجے جانے سے پہلے جمعہ کو پارلیمنٹ میں مزید نظرثانی کے لیے پیش کیا جائے گا۔
واضح رہے صدر پیوٹن پہلے ہی طالبان کو دہشت گردی کے خلاف جنگ میں اتحادی قرار دے چکے ہیں۔
