کابل : افغانی فوج اور طالبان کے درمیان جھڑپ میں 17 افغان فوجی مارے گئے، حملے میں گیارہ فوجیوں کے زخمی ہونے کی بھی اطلاعات ہیں۔
تفصیلات کے مطابق افغانستان میں روایتی طور پر موسم بہار اور موسم گرما میں عسکریت پسندوں کی تحریک زور پکڑتی ہے دونوں فریقین کے درمیان تازہ ترین جھڑپوں میں17 افغان فوجی جوان ہلاک ہو گئے۔
افغانستان میں بدھ کے روز علی الصبح دو شمالی صوبوں میں طالبان عسکریت پسندوں نے فوجی کیمپوں پر حملہ کرکے 17فوجی ہلاک کردیئے جبکہ11 فوجیوں کے زخمی ہونے کی بھی اطلاعات ہیں۔
اس حوالے سے غیر ملکی ذرائع ابلاغ کا کہنا ہے کہ صوبہ قندوز کے شمال سے 15 کلومیٹر دور واقع شہر تلہکا میں جھڑپوں میں افغان فوج کے پانچ جوان ہلاک اور چھ زخمی ہوگئے ہیں۔
دو گھنٹے کی لڑائی کے بعد طالبان جنگجوؤں کو واپس جانے پر مجبور کردیا گیا، اس دوران چار عسکریت پسند بھی مارے گئے، صوبائی حکومت کے ترجمان نے واقعے کی تصدیق کی ہے۔
دوسری کارروائی میں شمالی صوبہ جوزجان میں ضلع آچا کے ایک اسٹریٹجک علاقہ بالا حصار میں طالبان نے ایک فوجی کیمپ پر دھاوا بولا، اس دوران 12فوجی جوان اور 5 عسکریت پسند ہلاک ہوئے جبکہ 5 فوجی اہلکار اور 10 عسکریت پسند زخمی بھی ہوئے۔
علاوہ ازیں چار فوجیوں کو طالبان نے یرغمال بھی بنا لیا۔ واضح رہے کہ اس حوالے سے طالبان نے تاحال کسی قسم کی ذمہ داری یا کوئی باضابطہ اعلان جاری نہیں کیا ہے۔
