پشاور: آرمی پبلک اسکول پر حملہ کرنے والے دہشت گردوں کا معاون اور اہم طالبان کمانڈر صدام سیکورٹی فورسز سے مقابلہ میں ہلاک ہوگیا ہے۔
پولیٹیکل ایجنٹ صاحب علی شاہ نے پریس کانفرنس کرتے ہوئے بتایا کہ جمعرات کو تحصیل جمرود کے علاقہ غنڈی میں دہشتگردوں کے خلاف کارروائی میں ٹی ٹی پی کمانڈر صدام مارا گیا۔
پولیٹیکل ایجنٹ کے مطابق صدام سانحہ پشاور میں حملہ آوروں کا سہولت کار اور پولیو ٹیموں پر حملوں کا ماسٹر مائنڈ بھی تھاجبکہ صدام بائیس اہلکاروں کی شہادت میں بھی ملوث تھا۔
کراچی : مشرف کالونی میں رینجرز سے مقابلے میں کالعدم تحریکِ طالبان کا اہم کمانڈر عابد مچھڑ تین ساتھیوں سمیت مارا گیا۔
کراچی کے علاقے مشرف کالونی میں دہشتگردوں کی موجودگی کی اطلاع ملی تو رینجرز نےعلاقےمیں کارروائی شروع کردی، ترجمان رینجرز کے مطابق کارروائی کے دوران دہشتگردوں نے رینجرز اہلکاروں پر فائر کھول دیا اور دستی بم حملے کئے، جس میں ایک اہلکار زخمی ہوگیا۔
جس کے بعد رینجرز کی بھرپور جوابی کارروائی میں کالعدم ٹی ٹی پی کا اہم کمانڈر عابد مچھڑ تین ساتھیوں سمیت مارا گیا،عابد مچھڑ کے سر کی قیمت مقرر تھی۔
ذرائع کے مطابق ہلاک ملزم رینجرز اہلکاروں پر حملوں سمیت کراچی میں ہونیوالے بم دھماکوں کا ماسٹر مائنڈ تھا، حملے میں ہلاک ملزمان کی لاشیں پوسٹمارٹم کیلئے اسپتال منتقل کر دی گئیں ہیں، ملزمان کے قبضے سے چار کلاشنکوف برآمد ہوئیں۔