ماضی کی مقبول بالی وڈ اداکارہ تنوشری دتہ نے دعویٰ کیا ہے کہ انہیں جنسی ہراسانی کے خلاف آواز اٹھائے جانے کے بعد نہ صرف بولی وڈ مافیا بلکہ مہاراشٹر کے سیاستدان بھی ہراساں کر رہے ہیں۔
تنوشری دتہ نے رواں ماہ جولائی کے آغاز سے انسٹا گرام پر پوسٹس میں دعویٰ کیا کہ انہیں بالی وڈ مافیاز اور مہاراشٹر کے دارالحکومت ممبئی پر راج کرنے والی سیاسی مافیا ہراساں کر رہی ہے۔
انہوں نے اپنی پوسٹس میں کسی بھی بالی وڈ شخصیت یا سیاستدان کا نام لیے بغیر دعویٰ کیا کہ انہیں 2018 میں بھارت میں می ٹو مہم شروع کرنے کے بعد ہراساں کیا جا رہا ہے۔
انہوں نے الزام عائد کیا کہ انہیں مختلف طریقوں سے ہراساں کیے جانے کے بعد ان کے پیچھے ایک ایسی نوکرانی لگائی گئی، جس نے انہیں پانی اور کھانے میں زہریلی دوا ملا کر دی اور وہ مرتے مرتے بچیں۔
اداکارہ نے یہ دعویٰ بھی کیا کہ ان کی گاڑی کے بریک بار بار خراب کروائے گئے اور وہ حادثات کا شکار ہوتے ہوتے بچیں۔
ان کے مطابق اب وہ گزشتہ 40 دن سے بیرون ملک سے واپس اپنے شہر ممبئی آئی ہیں مگر اپنی رہائش گاہ کے باہر عجیب عجیب طرح کے واقعات ہوتے ہوئے دیکھتی ہیں، انہیں ڈرا کر خوف زدہ کیا جا رہا ہے، انہیں بری طرح ہراساں کیا جا رہا ہے۔
انہوں نے واضح کیا کہ وہ ان ہتھکنڈوں سے ڈر کر خودکشی نہیں کریں گی اور یہ سب لوگ یاد رکھیں کہ وہ خود اپنی زندگی کا خاتمہ نہیں کریں گی بلکہ انہیں قتل کیا جائے گا۔
خیال رہے کہ سال 2018 میں انہوں نے بالی وڈ اداکار نانا پاٹیکر سمیت دیگر شخصیات پر ہراسانی کے الزامات لگائے تھے اور ان کے الزامات کے بعد ہی بھارت میں می ٹو مہم کا آغاز ہوا تھا اور دیگر اداکارائیں بھی سامنے آئی تھیں۔
اداکارہ کے الزامات کو نانا پاٹیکر نے جھوٹا قرار دیا تھا اور دونوں کے درمیان طویل عرصے تک قانونی جنگ بھی جاری رہی، پولیس نے ایک سال تک تحقیق کرنے کے بعد جون 2019 میں کیس کو بند کر کے نانا پاٹیکر کو بے قصور قرار دیا تھا۔
