اسلام آباد : نیشنل الیکٹرک پاور ریگولیٹری اتھارٹی (نیپرا) نے کے الیکٹرک کے ٹرانسمیشن و ڈسٹری بیوشن ٹیرف کی منظوری دے دی۔
نیپرا نے اپنے فیصلے میں کہا کہ نئی ملٹی ایئر ٹیرف مدت مالی سال2023-24 سے 2029-30 تک ہوگی، ملک میں یکساں ٹیرف پالیسی سے صارفین پر براہ راست قیمتوں کا اثر نہیں پڑے گا، ٹرانسمیشن پر 12 فیصد ریٹرن آن ایکویٹی کی منظوری دی گئی۔
فیصلے کے مطابق نیپرا نے نقصانات کے اہداف میں کوئی نرمی نہیں کی، مقررہ ہدف برقرار ہے، قرض اور ایکویٹی تناسب ٹیرف کے لیے 70:30 برقرار رکھا گیا۔
اس فیصلے کے حوالے سے اپنا ردعمل دیتے ہوئے ترجمان کے الیکٹرک کا کہنا ہے کہ نیپرا کا یہ فیصلہ کے الیکٹرک کے سرمایہ کاری پلان میں اہم سنگ میل ہے۔
صارفین کے بلوں پر بجلی کی قیمتوں میں فوری طور پر کوئی اثر نہیں پڑے گا، اب سپلائی ٹیرف اور سرمایہ کاری منصوبے کو حتمی شکل دینے کا عمل جاری ہے۔
مزید پڑھیں : کےالیکٹرک کیلئے 7 سالہ ٹیرف کی منظوری
ترجمان کےالیکٹرک کا مزید کہنا ہے کہ ٹیرف فیصلے کی بنیاد پر نیٹ ورک میں بہتری اور توسیع کی جائے گی، کےالیکٹرک نے نجکاری کے بعد 4 ارب ڈالر سے زائد کی سرمایہ کاری کی ہے۔
یاد رہے کہ گزشتہ روز اسلام آباد میں نیشنل الیکٹرک پاور ریگولیٹری اتھارٹی (نیپرا) نے کے الیکٹرک کیلئے7 سالہ ٹیرف کی منظوری دے دی تھی۔
نیپرا کے مطابق 7 سالہ ٹیرف کی منظوری 2024 سے 2030 تک دی گئی ہے، کے الیکٹرک کو بجلی ڈسٹری بیوشن بزنس پر 3روپے 31 پیسے فی یونٹ کا ٹیرف دیا۔