Tag: Tawakkalna

ریاض: سعودی عرب میں ابشر اور توکلنا ایپ کو ضم کیے جانے کا منصوبہ زیر غور ہے، اس حوالے سے وزارت داخلہ، نیشنل ڈیجیٹل اتھارٹی اور سعودی ڈیٹا و مصنوعی ذہانت کے ادارے جائزہ لے رہے ہیں۔

سعودی ویب سائٹ کے مطابق سعودی عرب میں ابشر اور توکلنا ایپ کو ضم کیے جانے کا منصوبہ زیر غور ہے، توکلنا اور ابشر کو ضم کرنے سے شہریوں اور غیر ملکیوں کو مشترکہ پلیٹ فارم میسر آئے گا جس سے انہیں سرکاری معاملات کو نمٹانے میں سہولت ہوگی۔

ابشر پلیٹ فارم کے ذریعے سرکاری معاملات انجام دیے جاتے ہیں جبکہ توکلنا ایپ کرونا وائرس کی وبا کے دوران جاری کی گئی تھی جس کا مقصد سعودی شہریوں اور مقیم غیر ملکیوں کو کرونا وائرس کے بارے میں مطلع کرنے کے علاوہ کرونا ٹیسٹ اور ویکسی نیشن کا ریکارڈ رکھنا ہے۔

ایسے افراد جنہوں نے کرونا وائرس سے بچاؤ کے لیے ویکسین نہیں لگوائی، ایپ پر ان کا امیون اسٹیٹس نہیں ہوگا جس کی وجہ سے وہ کسی بھی سرکاری و نجی ادارے کے علاوہ عوامی مقامات اور مارکیٹوں میں داخل نہیں ہوسکیں گے۔

ابشر اور توکلنا کو ضم کرنے سے شہریوں اور مملکت میں رہنے والے غیر ملکیوں کو کافی سہولت ہوگی، ایک ہی پلیٹ فارم پر تمام سہولتیں یکجا ہوجائیں گی۔

ذرائع کا کہنا تھا کہ متعلقہ ادارے ابشر اور توکلنا کو ضم کرنے کے بارے میں حتمی جائزہ لے رہے ہیں، وزارت داخلہ، نیشنل ڈیجیٹل اتھارٹی اور سعودی ڈیٹا و مصنوعی ذہانت کے ادارے اپنی رپوٹ پیش کرنے کے بعد حتمی منظوری اور طریقہ کار جاری کریں گے۔