کراچی : پیپلز پارٹی بلاول ہاؤس کے ترجمان نے کہا ہے کہ ٹیکس چور اور پاناما لیکس والے پی پی کا مقابلہ نہیں کرسکتے، وزیراعظم نوازشریف نے 250 لوگوں سے خطاب کرکے اپنی شکست تسلیم کرلی۔
یہ بات ترجمان بلاول ہاؤس نے وزیراعظم نوازشریف کے حیدرآباد میں نواز لیگ ورکرزکنونشن سے خطاب پراپنے رد عمل میں کہی۔
وزیر اعظم کا حیدر آباد میں انٹرنیشنل ایئر پورٹ بنانے کا اعلان
ترجمان کا کہنا تھا کہ میٹرو کے 100 کلومیٹر کے منصوبے پر 150 ارب روپے کھائے گئے، سرکلر ڈیٹ کو 500 ارب تک پہنچا دیا گیا۔قطری خط کی طرح نوازشریف کےاعلانات بھی جعلی ہیں، نوازشریف نے اپنےادوار میں درجن میگا واٹ بجلی بھی پیدا نہیں کی۔
سندھ میں مسلم لیگ ن کوکوئی امیدوارنہیں مل رہا
ترجمان نے کہا کہ آئندہ الیکشن میں نواز لیگ کو سمجھ جانا چاہیے کہ عوام کومزید لوڈ شیڈنگ کی دھمکیاں دے کرووٹ نہیں لیےجاسکتے۔
پیپلز پارٹی کے سینیٹرسلیم مانڈوی والا نے بھی وزیراعظم کے خطاب پر رد عمل دیتے ہوئے کہا ہے کہ نوازشریف کو پاناما کیس کے فیصلے نے پریشان کر رکھا ہے انہیں سندھ کی پروا ہی نہیں، اسی لیے سندھ میں مسلم لیگ ن کوکوئی امیدوارنہیں مل رہا۔
سینیٹر سلیم مانڈوی والا نے کہا کہ سندھ کے امیدواروں کو پنجاب میں ٹکٹ دیئے گئے ہیں، کراچی میں امن کے لیے پی پی نے اہم کردارادا کیا ہے۔
