کراچی: سابق چیئرمین ایف بی آر شبر زیدی نے خبردار کیا ہے کہ جس دن حکومت ریٹیلرز کو ٹیکس نیٹ میں لانے کی اسکیم لاگو کرنے کی کوشش کرے گی، ریٹیلرز دکانیں بند کر دیں گے۔
تفصیلات کے مطابق اے آر وائی نیوز کے پروگرام باخبر سویرا میں گفتگو کرتے ہوئے شبر زیدی نے کہا کہ ایف بی آر نے ریٹیلرز کو ٹیکس نیٹ میں لانے کی اسکیم تیار کی ہے لیکن 1992 سے یہ کوشش کی جا رہی ہے، اور ہر حکومت اس میں ناکام ہوئی۔
انھوں نے کہا اگر صرف خانہ پری کرنی ہے تو ایف بی آر اسکیم کا کوئی فائدہ نہیں، فکسڈ ٹیکس ریٹیلرز پر لگانے کا قائل نہیں، چھوٹے دکان دار پر لگ سکتا ہے، لیکن اربوں روپے کے کاروبار کرنے والے پر کیسے فکسڈ ٹیکس لگائیں گے؟ انھوں نے کہا دکان داروں پر فکسڈ ٹیکس کی باتیں لوگوں کو بے وقوف بنانے کی باتیں ہیں۔
شبر زیدی کا کہنا تھا کہ ریٹیلرز کی شٹر ڈاؤن طاقت ایسی تمام اسکیموں کو ختم کر دیتی ہے، میں چیئرمین ایف بی آر تھا تو میرے خلاف مظاہرے ہوئے اور مجھے عہدہ چھوڑنا پڑا، جس دن حکومت اسکیم لاگو کرنے کی کوشش کرے گی ریٹیلرز دکانیں بند کر دیں گے۔
سابق چیئرمین ایف بی آر نے کہا ’’جب مارکیٹ بند ہو، لوگوں کو دودھ اور گوشت نہ ملے تو کون سی حکومت ان کے سامنے کھڑی ہو پائے گی۔‘‘
