ARYNews.tv | Urdu – Har Lamha Bakhabar

Tag: team

  • بڑی خوشخبری، جنوبی افریقہ اور آسٹریلیا کی ٹیمیں پاکستان آنے کے لیے تیار

    بڑی خوشخبری، جنوبی افریقہ اور آسٹریلیا کی ٹیمیں پاکستان آنے کے لیے تیار

    لاہور: کرکٹ کے مداحوں کے لیے بڑی خوشخبری سامنے آگئی، جنوبی افریقہ اور آسٹریلیا کی ٹیموں نے آئندہ سال دورہ پاکستان کے لیے آمادگی کا اظہار کردیا۔

    تفصیلات کے مطابق کرکٹ کے عالمی دروازے آہستہ آہستہ پاکستان کے لیے کھلنے لگے ہیں، سری لنکن ٹیم کے دورے کے بعد اب جنوبی افریقہ اور آسٹریلیا کی ٹیمیں بھی پاکستان آنے کے لیے تیار ہوگئی ہیں، پاکستان نے دنیا کے سامنے پرامن ملک ہونے کا ثبوت دے دیا۔

    پاکستان کرکٹ بورڈ کے چیف ایگزیکٹو وسیم خان کا کہنا ہے کہ آسٹریلیا کی ٹیم 2 ٹیسٹ اور 3 ٹی 20 کھیلنے 2020 میں پاکستان آئے گی، ہم چاہتے ہیں آسٹریلیا 3 ٹیسٹ میچ کھیلے، نیوساؤتھ ویلز سے اسکالرشپ پروگرام پر بات ہوئی ہے، ہم چاہتے ہیں خواتین سمیت کھلاڑی بھی وہاں تربیت حاصل کریں۔

    کراچی میں 10 سال بعد ٹیسٹ کرکٹ کا میلہ

    انہوں نے کہا کہ ڈومیسٹک کرکٹ کے میچ 11 سال بعد بگٹی اسٹیڈیم میں ہوئے، ہمارے ٹیم نے لائیو میچوں کو یقینی بنایا، نیشنل کرکٹ اکیڈمی میں بہتری کے لیے کام کررہے ہیں، پی سی بی ڈومیسٹک کرکٹ بہتر بنانے کے اخراجات برداشت کرے گا۔

    دوسری جانب ذرائع نے دعویٰ کیا ہے کہ جنوبی افریقہ کی ٹیم مارچ کے تیسرے ہفتے میں دورہ بھارت کے بعد 3 ٹی ٹوئنٹی کی سیریز کھیلنے کے لیے پاکستان آئے گی، پاکستان نے جنوبی افریقہ کو ہوم سیریز کی دعوت دی تھی، آئندہ ہفتے جنوبی افریقہ کے دورہ پاکستان کا حتمی فیصلہ ہوگا۔

    علاوہ ازیں ایم سی سی کرکٹ ٹیم(میریلیبون کرکٹ کلب) فروری 2020 میں پاکستان کا دورہ کرے گی، ٹیم کی قیادت صدر ایم سی سی کمار سنگاکارا کریں گے جبکہ اجمل شہزاد ہیڈ کوچ اور لاوینڈر ٹیم منیجر ہوں گے، ایم سی سی کرکٹ ٹیم اپنے تمام میچ ایچی سن کالج لاہور میں کھیلے گی، ٹیم پاکستان بھجوانے کا فیصلہ ایم سی سی ورلڈ کرکٹ کمیٹی کے اجلاس میں کیا گیا۔

    ایم سی سی کرکٹ ٹیم  46 سال بعد پاکستان کا دورہ کرے گی۔ سی ای او پاکستان کرکٹ بورڈ وسیم خان کا یہ بھی کہنا ہے کہ ایم سی سی کرکٹ ٹیم کی پاکستان آمد پر خوشی ہے، ایم سی سی ورلڈ کرکٹ کمیٹی کے اجلاس میں مؤقف پیش کیا تھا، امید ہے اسکواڈ میں شامل ہر کھلاڑی دورے کا بھرپور لطف اٹھائے گا۔

    جبکہ صدر ایم سی سی کمار سنگاکارا کا کہنا تھا کہ پاکستان میں عالمی کرکٹ بحال کرنے کے لیے پی سی بی سے تعاون کرنا ہوگا، پاکستان کا دورہ کرنے والی ایم سی سی ٹیم کی قیادت سنبھالنے پر خوشی ہے، پاکستان میں ایک دہائی کے بعد ٹیسٹ کرکٹ کی واپسی پر مداح مسرور ہیں۔

    خیال رہے کہ پاکستان میں دس سال بعد عالمی کرکٹ بحال ہوچکی ہے، سری لنکن ٹیم اس وقت دورہ پاکستان پر ہے، جبکہ کل دونوں ٹیموں کے درمیان فیصلہ کن ٹیسٹ میچ کھیلا جائے گا۔

  • کراچی میں فیصلہ کن معرکہ، قومی ٹیم کی تیاریاں تیز

    کراچی میں فیصلہ کن معرکہ، قومی ٹیم کی تیاریاں تیز

    کراچی: شہرقائد میں فیصلہ کن ٹیسٹ میچ کے لیے پاکستان اور سری لنکا کی ٹیموں نے تیاریاں تیز کردیں۔

    تفصیلات کے مطابق دونوں ٹیموں نے کراچی میں ڈیرے جمالیے، نیشنل اسٹیڈیم کراچی میں فائنل میچ سے پہلے بھرپور پریکٹس کی، پاکستانی فاسٹ بولرعثمان شنواری بخار اور سری لنکن فاسٹ بولر کاسن رجیتھا انجری کے باعث کراچی ٹیسٹ سے باہر ہوگئے ہیں۔

    نیشنل اسٹیڈیم کراچی میں پاکستان اور سری لنکا کی ٹیموں نے پہلے پریکٹس سیشن میں خوب لہو گرمایا، قومی ٹیم نے فٹنس پر خصوصی توجہ دی، جبکہ اسٹریچنگ کے ساتھ فیلڈنگ پریکٹس بھی کروائی گئی، یاسرشاہ کی ٹیم میں واپسی ہوئی ہے۔

    مہمان ٹیم نے کراچی میں قومی ٹیم کو ٹف ٹائم دینے کے لیے منصوبہ بندی شروع کردی، فاسٹ بولرز کے ساتھ اسپن آپشن پر بھی غور کیا جارہا ہے، سری لنکن بلے بازوں نے کراچی ٹیسٹ میں شاندار کارکردگی دکھانے کی ٹھان لی۔

    سری لنکن ٹیم کراچی پہنچ گئی

    واضح رہے کہ پاکستان اور سری لنکا کے درمیان پہلا ٹیسٹ میچ راولپنڈی اسٹیڈیم میں کھیلا گیا جو ڈرا ہوا، پہلے ٹیسٹ میچ کے پانچویں روز مہمان ٹیم نے 6 وکٹوں پر 308 رنز بنا کر اپنی پہلی اننگز ڈیکلئر کر دی تھی جب کہ پاکستان نے پہلی اننگز میں 2 وکٹوں‌ کے نقصان پر 252 رنز بنائے اور میچ ڈرا ہوگیا۔

  • ٹیسٹ کرکٹ کی نئی رینکنگ، بابراعظم ٹاپ 10 میں آگئے

    ٹیسٹ کرکٹ کی نئی رینکنگ، بابراعظم ٹاپ 10 میں آگئے

    لاہور: آئی سی سی نے ٹیسٹ کرکٹ کی نئی رینکنگ جاری کردی، سری لنکا کے خلاف سنچری کے بعد بابراعظم ٹاپ ٹین میں آگئے۔

    تفصیلات کے مطابق آئی سی سی کی ٹیسٹ رینکنگ فہرست میں بابراعظم کی رینکنگ میں 4درجے بہتری ہوئی اور اب وہ نویں نمبر پر آگئے ہیں، تاہم بولرز کی ٹاپ ٹین رینکنگ میں کوئی پاکستانی شامل نہیں ہے۔

    بیٹسمین رینکنگ میں بھارت کے ویرات کوہلی کو پہلی پوزیشن حاصل ہے۔

    حال ہی میں پاکستان اور آسٹریلیا کے درمیان دو میچوں پر مشتمل ٹیسٹ سیریز کے بعد انٹرنیشنل کرکٹ کونسل نے نئی ٹیسٹ رینکنگ جاری کی تھی جس کے مطابق پاکستانی ٹیم سیریز وائٹ واش ہونے کے بعد 7 ویں سے 8 ویں نمبر پر چلی گئی۔

    دبئی : آئی سی سی کی نئی ٹیسٹ رینکنگ جاری، پاکستان ٹیم آٹھویں نمبر پر

    آئی سی سی کی رینکنگ میں سر فہرست بھارت کا پہلا نمبر برقرار ہے جبکہ نیوزی لینڈ دوسرے، انگلینڈ تیسرے، جنوبی افریقہ چوتھے، آسٹریلیا پانچویں، سری لنکا چھٹے اور ویسٹ انڈیز ساتویں نمبر پر ہے۔ آسٹریلیا کے ہاتھوں عبرتناک شکست کے بعد قومی ٹیم آٹھویں نمبر پر چلی گئی ہے جبکہ بنگلہ دیش نوویں اور افغانستان دسویں نمبر پر ہے۔

  • چیمپئنز لیگ کا گروپ میچ، بارسلونا نے پری کوارٹرز فائنل میں جگہ بنالی

    چیمپئنز لیگ کا گروپ میچ، بارسلونا نے پری کوارٹرز فائنل میں جگہ بنالی

    کیمپنو: چیمپئنز لیگ کے گروپ میچ میں بارسلونا نے جرمن کلب بی وی بی کو 3-1 سے شکست دے کر پری کوارٹرز فائنل میں جگہ بنالی۔

    تفصیلات کے مطابق دنیائے فٹبال کے مایہ ناز کھلاڑی لائنل میسی نے بارسلونا کے لیے 700واں میچ کھیلتے ہوئے گول اسکور کیا، میسی کی بدولت بارسلونا نے جرمن کلب کے خلاف شاندار کم بیک کیا۔

    چیمپئنز لیگ کے گروپ میچ میں بارسلونا نے جان لگا دی، میچ کے آغاز سے ہی بارسلونا نے حریف ٹیم پر حملے شروع کردیے، لائنل میسی کے پاس پرسواریز نے گول اسکور کیا لیکن آف سائیڈ ہوگئے۔

    سات منٹ بعد میسی نے دوبارہ پاس کیا اور سواریز نے بال کو جال میں پہنچا کر بارسلونا کو ایک صفر کی برتری دلوائی، اسٹار فٹبالر میسی نے بارسلونا کے لیے 700واں میچ کھیلتے ہوئے گول اسکور کیا اور ہاف ٹائم سے پہلے ٹیم کی برتری دگنا کردیا۔

    دوسرے ہاف میں فرنچ اسٹار گریزمین نے میسی کے پاس پر گول کرکے بارسلونا کا اسکور تین صفر کردیا، تاہم آخری لمحات میں سینچو نے جرمن کلب کے لیے گول اسکور کیا جو کسی کام نہ آیا۔

  • سرفراز نے قومی ٹیم کو ایڈلیڈ ٹیسٹ جیتنے کا گُر بتا دیا

    سرفراز نے قومی ٹیم کو ایڈلیڈ ٹیسٹ جیتنے کا گُر بتا دیا

    کراچی: قومی کرکٹ ٹیم کے سابق کپتان سرفراز احمد نے پاکستان ٹیم کو ایڈلیڈ ٹیسٹ جیتنے کا گُر بتا دیا۔

    تفصیلات کے مطابق قومی ٹیسٹ ٹیم کی قیادت اظہرعلی کے پاس ہے لیکن سابق کپتان سرفراز احمد آسٹریلیا کے پچز کا تجربہ رکھتے ہیں یہی وجہ ہے کہ انہوں نے کھلاڑیوں کی رہنمائی کرتے ہوئے جیت کا گر بتایا۔

    ان کا کہنا تھا کہ آسٹریلوی بلے بازوں کی وکٹیں جتنی جلدی گریں گی اتنے ہی زیادہ جیت کے چانسز ہوں گے، ایڈلیڈ کی کنڈیشنز یاسر شاہ کے لیے فائدہ مند رہے گی۔

    سرفراز نے ٹیم کے لیے نیک تمناؤں کا اظہار کرتے ہوئے جیت کی دعا کی، انہوں نے مزید کہا کہ قومی ٹیم آسٹریلیا کے خلاف دوسرے ٹیسٹ میچ میں اچھا پرفارم کرے گی، کھلاڑیوں کو بھرپور کارکردگی کا مظاہرہ کرنا ہوگا۔

    ٹیم میں کئی تبدیلیاں کی گئی ہیں جس کا اعلان کل ہوگا: اظہرعلی

    خیال رہے کہ پاکستان اور آسٹریلیا کے درمیان دوسرا اور آخری ٹیسٹ میچ کل کھیلا جائے گا، قومی ٹیم میں کئی تبدیلیوں کا امکان ہے جس کی تصدیق اظہر علی اپنی پریس کانفرنس میں کرچکے ہیں۔

    سابق کپتان کی طرح موجودہ کپتان بھی جیت کے لیے پرعزم ہیں۔

  • ٹیم میں کئی تبدیلیاں کی گئی ہیں جس کا اعلان کل ہوگا: اظہرعلی

    ٹیم میں کئی تبدیلیاں کی گئی ہیں جس کا اعلان کل ہوگا: اظہرعلی

    ایڈلیڈ: قومی ٹیسٹ ٹیم کے کپتان اظہر علی کا کہنا ہے کہ اگر ہمیں آسٹریلیا کے خلاف آخری میچ جیتنا ہے تو تاریخ بدلنی ہوگی، ایڈلیڈ میں بولنگ کے ساتھ بیٹنگ کے لیے پچ اچھی ہے۔

    تفصیلات کے مطابق میڈیا سے گفتگو کرتے ہوئے کپتان اظہر علی کا کہنا تھا کہ ٹیم میں کئی تبدیلیاں کی گئی ہیں جس کا اعلان کل کریں گے، ہمیں میچ جیتنے کے لیے وکٹیں لینی پڑیں گی، آسٹریلیا میں بولنگ کے ساتھ بیٹنگ کے لیے پچ اچھی ہوتی ہے۔

    انہوں نے کہا کہ آپ کو اپنے پلان صحیح طرح استعمال کرنے ہوتے ہیں، دوسرے ٹیسٹ میں تیسرے نمبر پر بیٹنگ کروں گا، ڈیوڈوارنر ورلڈ کلاس پلیئر ہیں، ہم نے ڈیوڈوارنر کے خلاف صحیح جگہ بولنگ نہیں کی۔

    ان کا کہنا تھا کہ ٹیم نے گزشتہ میچ میں اچھی اسپرٹ دکھائی، تیسرے اور چوتھے دن لڑکوں نے گراؤنڈ میں اچھی فائٹ کی، ڈریسنگ روم میں مثبت ماحول ہے، کوشش کریں گے میچ جیتیں، ڈے نائٹ ٹیسٹ میچ بال کے ساتھ کنڈیشنز بھی مختلف ہوتی ہے۔

    قومی ٹیم کے ایڈلیڈ میں ڈیرے، دوسرے روز بھی پریکٹس جاری

    اظہرعلی نے مزید کہا کہ پہلے بھی آسٹریلیا میں نائٹ سیشن میں اچھا کھیلا ہے۔

    پاکستان اور آسٹریلیا کے درمیان دوسرا ٹیسٹ 29 نومبر (کل) سے کھیلا جائے گا، آسٹریلیا کو سیریز میں ایک صفر کی ناقابل شکست برتری حاصل ہے۔ دوسرا ٹیسٹ میچ کھیلنے کے لیے پاکستانی ٹیسٹ ٹیم دو روز قبل برسبین سے ایڈلیڈ پہنچی۔

    برسبین ٹیسٹ میں ناکامی کے بعد فائنل الیون میں دو تبدیلیوں کا امکان ہے، حارث سہیل کی جگہ امام الحق اور عمران خان سینیئر کی جگہ محمد عباس کو ٹیم میں شامل کیا جائے گا۔ ایڈلیڈ کے میدان میں پاکستان کبھی ٹیسٹ نہیں جیتا۔

  • قومی ٹیم کے ایڈلیڈ میں ڈیرے، دوسرے روز بھی پریکٹس جاری

    قومی ٹیم کے ایڈلیڈ میں ڈیرے، دوسرے روز بھی پریکٹس جاری

    ایڈلیڈ: آسٹریلیا کے خلاف دوسرا اور آخری ٹیسٹ میچ اپنے نام کرنے کے لیے قومی ٹیم کی پریکٹس دوسرے روز بھی جاری ہے۔

    تفصیلات کے مطابق قومی ٹیم غلطیوں کو نہ دہرا کر سیریز میں واپسی کا عزم لیے دوسرے روز بھی ایڈلیڈ میں پریکٹس کررہی ہے، ایڈلیڈ میں اسپنرز کو مدد ملےگی، یاسرشاہ کا کردار اہم ہوگا، شائقین کرکٹ نے ٹیم سے امیدیں باندھ لیں۔

    پاکستان اور آسٹریلیا کے درمیان دوسرا ٹیسٹ 29 نومبر (کل) سے کھیلا جائے گا، آسٹریلیا کو سیریز میں ایک صفر کی ناقابل شکست برتری حاصل ہے۔ دوسرا ٹیسٹ میچ کھیلنے کے لیے پاکستانی ٹیسٹ ٹیم دو روز قبل برسبین سے ایڈلیڈ پہنچی۔

    برسبین ٹیسٹ میں ناکامی کے بعد فائنل الیون میں دو تبدیلیوں کا امکان ہے، حارث سہیل کی جگہ امام الحق اور عمران خان سینیئر کی جگہ محمد عباس کو ٹیم میں شامل کیا جائے گا۔ ایڈلیڈ کے میدان میں پاکستان کبھی ٹیسٹ نہیں جیتا۔

    دوسرا ٹیسٹ: پاکستان اور آسٹریلیا کل سے مدمقابل ہوں گے

    دوسری جانب سابق آسٹریلوی کپتان اور مایہ ناز بلے باز اسٹیون اسمتھ نے پاکستان کے خلاف پہلے ٹیسٹ میچ میں یاسر شاہ کے ہاتھوں آؤٹ ہونے کے بعد نئی حکمت عملی تیار کرلی ہے۔

    خیال رے کہ اسٹیون اسمتھ پہلے ٹیسٹ میچ میں صرف 4رنز بنانے کے بعد یاسر شاہ کو وکٹ دے بیٹھے تھے اور یاسر نے انہیں آؤٹ کرنے کے بعد انگلیوں سے 7 اشارہ کیا تھا۔ یاسر کا یہ اشارہ کرنے کا مقصد یہ ظاہر کرنا تھا کہ وہ اب تک ٹیسٹ میچوں میں اسمتھ کو 7مرتبہ نشانہ بنا چکے ہیں۔

  • دوسرا ٹیسٹ: پاکستان اور آسٹریلیا کل سے مدمقابل ہوں گے

    دوسرا ٹیسٹ: پاکستان اور آسٹریلیا کل سے مدمقابل ہوں گے

    ایڈلیڈ: آسٹریلیا کے خلاف پہلے ٹیسٹ میچ میں شکست کے بعد پاکستانی ٹیم دوسرے میچ میں کم بیک کرنے کے لیے پرعزم ہے، دونوں ٹیمیں کل سے میدان میں اتریں گی۔

    تفصیلات کے مطابق پاکستان اور آسٹریلیا کے درمیان دوسرا ٹیسٹ 29 نومبر (کل) سے کھیلا جائے گا، آسٹریلیا کو سیریز میں ایک صفر کی ناقابل شکست برتری حاصل ہے۔

    دوسرا ٹیسٹ میچ کھیلنے کے لیے پاکستانی ٹیسٹ ٹیم دو روز قبل برسبین سے ایڈلیڈ پہنچی، برسبین ٹیسٹ میں ناکامی کے بعد فائنل الیون میں دو تبدیلیوں کا امکان ہے، حارث سہیل کی جگہ امام الحق اور عمران خان سینیئر کی جگہ محمد عباس کو ٹیم میں شامل کیا جائے گا۔ ایڈلیڈ کے میدان میں پاکستان کبھی ٹیسٹ نہیں جیتا۔

    آسٹریلیا کے خلاف ٹیسٹ سیریز بھی پاکستان کے لیے بڑا چیلنج ثابت ہوا ہے، جبکہ مصباح کی کوچنگ میں مسلسل شکستوں کا سلسلہ جاری ہے، ان کے ہیڈکوچ اور چیف سلیکٹر بننے کے بعد بدقسمتی سے ٹیم ایک بھی میچ نہ جیت سکی، سری لنکا کے خلاف ہوم گراؤنڈ میں بھی پاکستان کو شکست کا مزا چکھنا پڑا تھا۔

    ٹیسٹ چیمپئن شپ کے پہلے میچ میں بھی پاکستان کو شرمناک شکست کا سامنا کرنا پڑا، آسٹریلیا نے پہلے ٹیسٹ میچ میں پاکستان کو اننگز اور 5 رنز سے ہرا دیا تھا، البتہ ٹیم کم بیک کرنے کے لیے پرعزم ہے، تاہم سیریز ہارنے کی صورت میں پی سی بی بڑے فیصلے کرسکتی ہے۔

    اگلا میچ ایڈلیڈ میں پنک بال سے ہوگا، پاکستان کو حکمت عملی بدلنی ہوگی ورنہ میچ کے ساتھ سیریز بھی ہاتھ سے جائے گی، ٹیم میں کیا تبدیلیاں ہوں گی اس سے متعلق کوئی حتمی فیصلہ سامنے نہیں آیا۔

  • انگلینڈ کے خلاف سیریز کے لیے قومی خواتین کرکٹ اسکواڈ کا اعلان

    انگلینڈ کے خلاف سیریز کے لیے قومی خواتین کرکٹ اسکواڈ کا اعلان

    لاہور: انگلینڈ کے خلاف سیریز کے لیے قومی خواتین کرکٹ ٹیم کا اعلان کردیا گیا، 3 ایک روزہ اور 3 ٹی ٹوئنٹی میچوں پر مشتمل سیریز کے لیے علیحدہ علیحدہ اسکواڈ ہے۔

    تفصیلات کے مطابق ایک روزہ اور ٹی ٹوئنٹی سیریز میں شریک قومی اسکواڈز میں 4،4 تبدیلیاں کی گئی ہیں، ایک روزہ اور ٹی ٹوئنٹی خواتین کرکٹ ٹیم کی قیادت بسمہ معروف کریں گی۔

    جبکہ دیگر کھلاڑیوں میں عالیہ ریاض، انعم امین، عروب شاہ، ڈیانابیگ اور فاطمہ ثنا شامل ہیں۔ جویریہ خان، کائنات حفیظ، ناہیدہ خان، نشرہ سندھو، نداڈار اور عمیمہ سہیل کو بھی ٹیم کا حصہ بنایا گیا ہے۔ جبکہ کائنات حفیظ اور رامین شمیم پہلی بار قومی خواتین ایک روزہ کرکٹ ٹیم کا حصہ ہیں۔

    پاکستان ویمنز بمقابلہ انگلینڈ: 20 ممکنہ کھلاڑیوں کی تربیت شروع

    رامین شمیم، سدرہ امین اور سدرہ نواز کو بھی ایک روزہ اسکواڈ میں شامل کیا گیا ہے۔

    ٹی ٹوئنٹی اسکواڈ میں بسمہ معروف (کپتان)، عالیہ ریاض، انعم امین، عروب شاہ، ڈیانا بیگ، فاطمہ ثنا، ارم جاوید، جویریہ خان، ناہیدہ خان اور نداڈار شامل ہیں۔ 15 سالہ لیگ اسپنر عروب شاہ پہلی بار ٹی ٹوئنٹی ٹیم میں شامل ہوئی ہیں، جبکہ آل راؤنڈر نداڈار کی دونوں اسکواڈز میں واپسی ہوئی۔

    خیال رہے کہ انگلینڈ کے خلاف 3ایک روزہ اور3 ٹی 20 انٹرنیشنل میچوں پر مشتمل سیریز ہوگی، سیریز 9تا 20 دسمبر تک ملائیشیا میں شیڈول ہے، پاکستان ویمنز کرکٹ ٹیم 30 نومبر کو ملائیشیا روانہ ہوگی۔

    واضح رہے کہ قومی خواتین کرکٹ ٹیم کی سابق کپتان ثناء میر انٹرنیشنل کرکٹ سے بریک لینے کا اعلان کرچکی ہیں، ان کا کہنا تھا کہ میری نیک خواہشات پاکستان ویمنز کرکٹ ٹیم کے ساتھ ہیں، آئندہ ماہ انگلینڈ کے خلاف ہونے والی سیریز میں شرکت نہیں کروں گی۔

  • ایمرجنگ ایشیا کپ کا ٹائٹل جیتنا ایک بڑا اعزاز ہے: کپتان

    ایمرجنگ ایشیا کپ کا ٹائٹل جیتنا ایک بڑا اعزاز ہے: کپتان

    کراچی: ایشین کرکٹ کونسل (اے سی سی ) ایمرجنگ ایشیا کپ کی فاتح پاکستان ٹیم کے کپتان سعود شکیل نے کہا ہے کہ یہ ٹائٹل جیتنا کسی بڑے اعزاز سے کم نہیں ہے۔

    تفصیلات کے مطابق نیشنل اسٹیڈیم کراچی میں پریس کانفرنس کرتے ہوئے کپتان سعود شکیل کا کہنا تھا کہ ٹورنامنٹ کا سب سے اہم میچ بھارت کے خلاف سیمی فائنل رہا جس میں پاکستان ٹیم نے جارحانہ حکمت عملی اپنائی، پوری ٹیم نے بہت محنت کی جس کا نتیجہ کامیابی کی صورت میں سامنے آیا۔

    انہوں نے کہا کہ پہلی بار دیکھنے میں آیا کہ بھارتی کھلاڑیوں نے پاکستان کے خلاف میچ میں جارحانہ کے بجائے دفاعی حکمت عملی اپنائی جس کا پاکستان نے بھر پور فائدہ اٹھا یا۔

    پاکستان نے ایمرجنگ ایشیا کپ جیت لیا

    کپتان کا کہنا تھا کہ انہیں امید تھی کہ عماد بٹ آخری اوور میں بھارت کو ہدف حاصل کرنے نہیں دیں گے اور ایسا ہی ہوا، فائنل میں بنگلادیش کی ٹیم پاکستان کو بہت آسان حریف سمجھ رہی تھی کیونکہ ان کی ٹیم میں سینئر کھلاڑی بھی موجود تھے لیکن پاکستان نے فائنل میں حریف ٹیم کو آؤٹ کلاس کیا۔

    خیال رہے کہ پاکستان نے گزشتہ ہفتے بنگلہ دیش کو اے سی سی ایمرجنگ ایشیا کپ کے فائنل میں 77 رنز سے شکست دے کر ٹائٹل اپنے نام کیا۔ سیمی فائنل میں پاکستان نے روایتی حریف بھارت کو آخری اوور میں 3 رنز سے شکست دے کر فائنل کے لیے کوالیفائی کیا تھا۔