ریاض : سعودی حکومت نے فصلوں کو موسمی ٹڈی دل کے حملوں سے محفوظ رکھنے کیلئے اہم اقدامات کیے ہیں، مختلف علاقوں میں اسپرے کیلئے خصوصی ٹیمیں تشکیل دے دیں۔
تفصیلات کے مطابق سعودی وزارت ماحولیات و زراعت نے موسمی ٹڈی دل کے حملوں سے محفوظ رکھنے کے لیے گرؤانڈ کنٹرولنگ یونٹ کی جانب سے ریاض و دیگر علاقوں کے لیے 40 ٹیمیں تشکیل دی ہیں۔
وزارت ماحولیات کی جانب سے کہا گیا ہے کہ جنوبی ریاض ، وادی الدواسر ، السلیل اور الافلاج کے علاوہ جنوب اور مشرقی عسیر کے ریجنز احد رفیدہ ، سراۃ عبیدہ ، وادی بن ھشبل ، تثلیث ، بیشہ اور الخنقہ سمیت طائف کے مشرقی اور نجران ریجنز میں موسمی ٹڈی دل کے حملوں سے علاقوں کو محفوظ رکھنے کے لیے ٹیمیں تشکیل دی گئی ہیں۔
وزارت ماحولیات کے حوالے سے سعودی ذرائع ابلاغ کے مطابق تشکیل دیے جانے والے گراونڈ کنٹرول یونٹس میں یونٹ اسپرے ٹیموں پر مشتمل ہیں جبکہ 9 ٹیمیں مختلف علاقوں کا سروے کرنے کے بعد اپنی رپورٹ سے مرکزی کنٹرول روم کو مطلع کریں گی.
ٹیموں کی رپورٹ پر گراونڈ سپرے یونٹ کو ہدایات جاری کی جائیں گی جو علاقے کے موسم اور وہاں متوقع ٹڈی دل کے حملوں سے نمٹنے کے لیے مخصوص اسپرے مقررہ مقامات پر کریں گی۔
وزارت کے تحت منصوبہ بندی ادارے کا کہنا ہے کہ تشکیل دیے جانے والے یونٹس میں 5 ٹیمیں نگرانی کے فرائض انجام دیں گی جبکہ 2 ٹیمیں اصلاح و مرمت کے لیے اسٹینڈ بائی کے طور پر کام فیلڈ میں کام کریں گی۔
وزارت ماحولیات نے متوقع ٹڈی دل حملوں سے حفاظت کے لیے 15 ہزار معکب لیٹر مواد کا ذخیرہ بھی حاصل کر لیا ہے جو سپرے ٹیموں میں تقسیم کیا جائے گا تاکہ مقررہ مقامات پر اسپرے کیاجاسکے۔
