کراچی: تحریک طالبان پاکستان کے بھتہ خور گروپ کا سرغنہ عبدالغنی سوات میں گرفتار ہو گیا۔
تفصیلات کے مطابق سی پی ایل سی ساؤتھ کراچی نے سی ٹی ڈی خیبر پختون خوا کے ہمراہ سوات میں بڑی کارروائی کرتے ہوئے تحریک طالبان پاکستان کے بھتہ خور گروپ کے سرغنہ عبدالغنی کو گرفتار کر لیا۔
ذرائع سی پی ایل سی کے مطابق کارروائی 9 اپریل کو کراچی سے گرفتار ملزمان کی نشان دہی پر کی گئی، عبدالغنی نے گورنر کے پی کے کو بھی قتل کی دھمکی دی تھی، جس کی گرفتاری خیبر پختون خوا حکومت کے لیے بھی چیلنج تھی۔
گرفتار ٹی ٹی پی سرغنہ کو کراچی منتقل کیا جا رہا ہے، سی پی ایل سی ساؤتھ کے مطابق کراچی کے ایک تاجر کو بھتے کی پرچی ملنے کی شکایت موصول ہوئی تھی، جس کے بعد چیف سی پی ایل سی نے ایک خصوصی ٹیم تشکیل دی تھی اور 9 اپریل کو غلام قادر اور کمال کو گرفتار کیا گیا تھا۔
دونوں ملزمان کراچی میں بھتہ خوری کے بڑے واقعات میں ملوث تھے، جو تاجروں کو افغانستان کے نمبر سے فون کر کے بھتہ مانگتے تھے اور نہ دینے پر قتل اور زخمی بھی کرتے تھے۔
گرفتار ملزم عبدالغنی بھتہ خور گروہ کا سرغنہ ہے جو پورے پاکستان میں کام کرتا ہے، ملزمان ایک ہی نمبر سے کراچی اور کے پی کے میں بھتے کے لیے فون کرتے تھے۔
گرفتار ملزم عبدالغنی پر کے پی کے میں 60 سے زائد مقدمات درج ہیں، تفتیش کے دوران غلام قادر اور کمال نے پولیس اے ایس آئی اور کئی انفارمرز کو بھی قتل کرنے سمیت بھتہ نہ دینے پر ایک بڑے بزنس مین کی املاک کو آگ لگانے کا بھی اعتراف کیا ہے۔
گروہ کے اہم ٹارگٹ کِلر اسماعیل کی گرفتاری کے لیے بھی چھاپے مارے جا رہے ہیں۔
