اسلام آباد: تحریکِ طالبان پاکستان نے آرمی آفیسروں اور حساس اداروں کے افسران کے بچوں کو اغواء کرنے کا منصوبہ بنایا ہے۔
تحریکِ طالبان اغواء میں کامیابی کے بعد جیلوں میں قید اپنے ساتھیوں کی رہائی کا مطالبہ کر سکتی ہے، حساس اداروں کی جانب سے رپورٹ دی گئی ہے کہ تحریکِ طالبان آرمی اور حساس اداروں کے افسران کے بچوں کو اغواء کرنے کا منصوبہ بنا رہی ہے۔
تحریکِ طالبان پاکستان نے مختلف کنٹونمنٹ میں داخل ہونے کے لیے جعلی سیکیورٹی پاسز بھی حاصل کر لیے ہیں۔
اسلام آباد: تحریک طالبان نے میڈیا کو دھمکی دی ہے کہ پاکستانی میڈیا طالبان کیخلاف مہم بند کرے ورنہ غلطیوں کے ازالہ کا موقع بھی نہیں دیں گے، امریکی تنظیم کمیٹی ٹو پروٹیکٹ جرنلسٹ نے پیغام اپنی ویب سائٹ پر جاری کر دیا۔
تحریک طالبان پاکستان نے امریکی تنظیم کمیٹی ٹو پروٹیکٹ جرنلسٹ اور صحافیوں کی دیگر عالمی تنظیموں کو لکھے گئے خط میں دھمکی دی ہے کہ پاکستانی میڈیا نے طالبان کیخلاف تنقیدی مہم بند نہ کی تو صحافیوں پر حملے شروع کر دیں گے۔
ٹی ٹی پی مہمند ایجنسی کمیشن کے خط میں لکھا گیا ہے کہ شمالی وزیرستان آپریشن میں پاکستانی میڈیا تمام حدیں عبور کر چکا ہے، اب کوئی چیخ و پکار برداشت نہیں کریں گے ،اس وارننگ کو آخری دھمکی سمجھاجائے۔
ٹی ٹی پی نے پاکستانی میڈیا کو طالبان دشمنوں کا نمائندہ قرار دیتے ہوئے کہا کہ اُن کیخلاف جھوٹ اور نفرت پر مبنی پیغامات کے ساتھ اسلامی تعلیمات کو غلط طور پر پیش کیا جارہا ہے۔
