موبائل چیٹ ایپلی کیشن ٹیلی گرام نے ایک نئے فیچر کا اجراء کیا ہے جس کے ذریعے صارفین گروپ میں کانفرنس کال پر اپنے عزیز و اقارب سے باآسانی بات چیت کرنے کے قابل ہوں گے۔
سعودی ذرائع ابلاغ کے مطابق یہ کانفرنس کال کوئی ایک شخص کرے گا جو مختلف لوگوں کو اس میں شامل کر سکے گا، یوں ان کے درمیان رابطہ قائم ہوگا۔
اس کے علاوہ قابل ذکر بات یہ بھی ہے کہ ٹیلی گرام نے اس سے قبل ایپل ایپلی کیشن اسٹور کے خلاف یورپی یونین کو سرکاری طور پر شکایت جمع کروائی تھی۔
غیر ملکی خبر رساں ادارے کے مطابق مذکورہ شکایت باضابطہ طور پر یورپی یونین کی ایکزیکٹیو نائب صدر مارگریٹ ویسٹیئر کو پیش کی گئی ہے۔
شکایت میں کہا گیا ہے کہ ایپل صارفین کو ایپ اسٹور کے علاوہ سافٹ ویئر ڈاؤن لوڈ کرنے کا موقع فراہم کرے۔
شکایت میں یہ بھی کہا گیا ہے کہ ڈویلپرز کو ایپل کی شرائط کو قبول کرنا ہوگا، بشمول ایپ خریداریوں پر 30 فیصد کمیشن بھی ہوگا تاکہ آئی فون استعمال کرنے والے لاکھوں لوگوں تک رسائی حاصل ہو۔
واٹس ایپ اور ٹیلی گرام میں کیا فرق ہے؟
ٹیلی گرام ایپ وا ٹس ایپ سے زیادہ مؤثر، محفوظ اور بہترین ایپلیکیشن ہے جس کے کافی فوائد ہیں جیسا کہ واٹس ایپ گروپ میں 256ممبر ایڈ ہو سکتے جبکہ ٹیلی گرام چینل میں تقریباً 5000 ممبر ایڈ ہوسکتے ہیں۔
واٹس ایپ گروپ جوائن کرنے پر آپ کا موبائل نمبر پبلک ہو جاتا ہے یعنی ہر گروپ ممبر ایک دوسرے کا موبائل نمبر دیکھ سکتا ہے، لیکن ٹیلی گرام چینل جوائن کرنے پر کوئی ممبر کسی دوسرے کا نمبر نہیں دیکھ سکتا۔
واٹس ایپ گروپ جوائن کرنے پر آپ گروپ میں کی گئی پرانی پوسٹس نہیں دیکھ سکتے جبکہ ٹیلی گرام چینل جوائن کرنے پر آپ اس چینل کی دو سال پرانی پوسٹس بھی دیکھ پڑھ سکتے ہیں۔
اسی بنا پر لوگ تیزی سے ٹیلی گرام استعمال کر رہے ہیں کچھ عرصہ پہلے پاکستان میں اس پر پابندی لگا دی گئی تھی مگر اب یہ پھر سے صارفین کے لیے دستیاب ہے۔
