Tag: Terrorist Attack

کوئٹہ: کوئٹہ کے سمنگلی اور خالد ایئر بیسز پر ہشتگردوں نے حملہ کیا، جوابی کارروائی میں دس دہشتگرد ہلاک جبکہ اہلکاروں سمیت چودہ افراد زخمی ہوئے، دونوں بیسز کلیئر قرار دیدی گئی ہے،کوئٹہ ایئرپورٹ پروازوں کیلئے بند کردیا گیا۔

 پاک فضائیہ کے ترجمان کے مطابق دہشتگرد سمنگلی ایئربیس میں داخل ہونا چاہتے تھے لیکن اس سے پہلے ہی انہیں رکنے کا اشارہ کیا گیا، جس پر گاڑی میں سوار دہشتگردوں نے سیکورٹی فورسز پر فائرنگ کر دی۔

فائرنگ کے شدید تبادلے کے فوراً بعد پولیس کی بھاری نفری طلب کرلی گئی، اس دوران سیکیورٹی فورسز نے سمنگلی ائیر بیس کے تمام راستے بند کردئیے ، اس دوران دہشتگردوں نے سات راکٹ بھی فائر کیے جو خطا گئے، دہشتگردوں سے مقابلے میں نو سیکورٹی اہلکار زخمی ہو ئے، پولیس کی ایک گاڑی راکٹ لگنے سے تباہ ہوگئی۔

وزیر داخلہ بلوچستان سرفراز بگٹی کا کہنا ہے کہ علاقے میں سرچ آپریشن شروع کر دیا ہے ،کچھ موڑ پر ایک گاڑی سے چار راکٹ برآمد ہوئے ۔ زرائع کے مطابق حفاظتی اقدام کے طور پر کوئٹہ انٹرنیشنل ائیر پورٹ کو تمام پروازوں کے لئے بند کر دیا گیا ہے۔

آئی جی بلوچستان محمدعملیش خان کے مطابق خالد ایئر بیس کے قریب تین دہشتگردوں نے خود کو دھماکے سےاڑایا جبکہ دو مارے گئے، ادھر سمنگلی ایئر بیس پر حملہ کرنے والے دو دہشتگرد مارے گئے اور تین نے خود کو دھماکے سے اڑالیا۔

آئی جی بلوچستان عملیش خان نےکہا ہےکہ ایئر بیسز پرحملوں کا بڑا منصوبہ ناکام بنا دیا گیا، سمنگلی اورخالدایئر بیسز کو مکمل طور پرکلیئر ہیں، سیکیورٹی فورسز نےسمنگلی ایئر بیس کے قریب سے راکٹ لانچر اور نو گولے، خودساختہ بم، خودکش جیکٹس اور فیول قبضے میں لے لی ہے۔