لکی مروت میں تھانہ صدر کی حدود میں دہشت گردوں نے پولیس اہلکار رفیع اللہ کے گھر پر بم سے حملہ کیا ہے۔
تفصیلات کے مطابق خیبر پختونخوا کے شہر لکی مروت میں تھانہ صدر کی حدود میں دہشت گردوں نے ایک پولیس اہلکار کے گھر پر بم سے حملہ کیا ہے جس کے نتیجے میں اہلکار کے گھر کا حصہ زمین بوس ہوگیا۔
پولیس کا اس حوالے سے کہنا ہے کہ دہشت گردوں نے پولیس اہلکار کے گھر کے دو کمروں کو آئی ڈی بم سے اڑا دیا، دھماکے سے 2 کمرے زمین بوس جبکہ دیگر سامان کو بھی نقصان پہنچا ہے۔
پولیس کا کہنا ہے کہ پولیس نے علاقے میں سرچ آپریشن شروع کردیا جلد ہی حملہ آوروں کو گرفتار کرلیا جائے گا۔
واضح رہے کہ گزشتہ روز صوبہ خیبرپختونخوا کے ضلع لکی مروت میں تھانہ غزنی خیل کی حدود میں دہشت گردوں کی فائرنگ سے فرنٹیئر کانسٹیبلری (ایف سی) کا ایک اہلکار ہلاک ہو گیا تھا۔
خیال رہے کہ خیبرپختونخوا کے بعض علاقوں میں حالیہ عرصے کے دوران سیکیورٹی فورسز کو دہشت گرد حملوں کا سامنا رہا ہے، جس کے پیشِ نظر متعلقہ اضلاع میں حفاظتی اقدامات مزید سخت کیے جا رہے ہیں۔
