خیبر پختونخوا کے ضلع کرک اور پشاور میں رات گئے دو پولیس اسٹیشن، چیک پوسٹ اور سوئی گیس دفتر پر دہشت گردوں نے حملہ کردیا، حملے میں سیکیورٹی گارڈ اور سب انسپکٹر جان کی بازی ہار گئے۔
اے آر وائی نیوز کرک کے نمائندے نواز خٹک کی رپورٹ کے مطابق کرک میں تین مقامات پر نامعلوم دہشت گردوں نے حملہ کردیا جس کے نتیجے میں ایک سیکورٹی اہلکار شہید اور دوسرا زخمی ہوگیا۔
رپورٹ کے مطابق سیکیورٹی گارڈ عیسک حماری میں گیس آفس پر حملے میں شہید ہوا جبکہ تھانہ یعقوب شہید اور تھانہ حرم پر بھی مسلح حملے کیے گئے، پولیس کے مطابق کرک کے تھانہ یعقوب شہید پر حملے میں سب انسپکٹر اسلم نور شہید ہوا۔
ماقامی پولیس حکام کے مطابق حملے کے بعد پولیس کی جانب سے بھرپور جوابی کارروائی کی جارہی ہے۔
دوسری جانب پشاور میں پولیس چوکی پجگی پر شدت پسندوں نے حملہ کردیا، پولیس کے مطابق حملے میں ایک پولیس کانسٹیبل شہید ہوگیا۔
پولیس کی جوابی فائرنگ سے حملہ آور فرار ہونے میں کامیاب ہوگیا، ملزم کی گرفتاری کیلیے علاقے کا محاصرہ کرکے سرچ آپریشن کیا جارہا ہے۔
