بارباڈوس : پاکستان اور ویسٹ انڈیز کے درمیان سیریز کا دوسرا ٹیسٹ کل سے بارباڈوس میں کھیلا جائے گا۔ میچ شام سات بجے شرو ع ہوگا، پاکستان کرکٹ ٹیم تاریخ رقم کرنے سے ایک فتح کی دوری پر ہے۔
تفصیلات کے مطابق پاکستان اور ویسٹ انڈیز کے درمیان کھیلے جارہے ٹیسٹ سیریز کے دوسرے میچ میں دونوں ٹیمیں کل مد مقابل ہوں گی۔
مصباح الیون تاریخ رقم کرنے کیلئے صرف ایک جیت کی دوری پر ہے، آخری دو میں سے ایک ٹیسٹ جیت کر مصباح الحق جاتے جاتے ایک اور اعزاز اپنے نام کرسکتے ہیں۔
بارباڈوس میں ٹیم جیت گئی تو ویسٹ انڈیز کی سرزمین پرپہلی بار ٹیسٹ سیریز جیتے گی۔ مصباح الیون کی دوسرے ٹیسٹ کیلئے بھی بھرپور تیاریاں جاری ہیں۔ ٹیم میں فی الحال کسی تبدیلی کا امکان نہیں ہے۔
مزید پڑھیں : جمیکا ٹیسٹ : پاکستان نے ویسٹ انڈیزکو سات وکٹ سے ہرا دیا
جمیکا کے ہیرو یاسر شاہ اور محمد عامر بارباڈوس میں بھی وکٹیں اڑانے کیلئے بے تاب ہیں۔ شائقین کی بیٹنگ میں رنز کی مشین یونس خان سے امیدیں وابستہ ہوں گی۔
اس کے علاوہ مصباح الحق، بابر اعظم اور سرفراز احمد بھی توجہ کا مرکز ہوں گے۔ مذکورہ میچ اتوار کو پاکستانی وقت کے مطابق شام سات بجے شرو ع ہوگا۔
