جرمنی کے شہر فرینکفرٹ میں گھریلو مصنوعات کی سب سے بڑی ٹیکسٹائل نمائش کا میلہ 9 جنوری کو سجے گا۔
تفصیلات کے مطابق ہوم ٹیکسٹائل مصنوعات کی سب سے بڑی عالمی نمائش ”ہیم ٹیکسٹائل‘‘ 9 جنوری 2024 سے 12 جنوری تک جرمنی کے شہر فرینکفرٹ میں منعقد ہوگی۔
نمائش کی تیاریاں اپنے آخری مراحل پر پہنچ گئیں، نمائش میں پاکستانی کمپنیاں بھی شرکت کر رہی ہیں۔ جرمن قونصل خانے کراچی کی جانب سے ہیم ٹیکسٹائل نمائش میں شرکت کے لیے نمائش کنندگان کو بڑی تعداد میں ویزے بھی جاری کیے گئے ہیں۔
ہیم ٹیکسٹائل نمائش میں اس مرتبہ ٹیکسٹائل کے شعبے میں منصوعات کی تقریباً 2600 سے زائد نمائش کنندگان شریک ہوں گے، 9 جنوری کو ہیم ٹیکسٹائل کی افتتاحی تقریب منعقد کی جائے گی، جس میں اس سال کے پینل ٹاک کا موضوع ٹیکسٹائل کے مصنوعات کے ڈیزائن میں مصنوعی ذہانت کا استعمال ہے، جس میں تجارتی میلے کی اہم ترین خصوصیات اور ٹیکسٹائل صنعت میں حالیہ پیش رفت کا احاطہ بھی کیا جائے گا۔
انتظامیہ کا کہنا ہے کہ ہیم ٹیکسٹائل کی نمائش میں ٹیکسٹائل کے ایکسپورٹرز کے لیے عالمی نئے رابطوں ملاقاتوں اور وسیع نیٹ ورک کا ذریعہ بنتی ہے۔
ہیم ٹیکسٹائل میں پاکستانی پویلین بھی بنایا گیا ہے جس میں پاکستان سے متعلق گھریلو مصنوعات بھی پیش کی جائیں گی، ہیم ٹیکسٹائل نمائش میں پاکستان چوتھا سب سے بڑا بین الاقوامی نمائش کنندہ ہے، فرینکفرٹ انتظامیہ کی جانب سے مندوبین کے لیے ٹرانسپورٹ کی مفت سہولت بھی فراہم کی گئی ہے۔
