بنکاک: تھائی لینڈ میں گنے سے بھڑا ٹرک ٹرین کی زد میں آگیا جس کی ویڈیو سوشل میڈیا پر وائرل ہوگئی۔
غیرملکی خبررساں ادارے کی رپورٹ کے مطابق تھائی لینڈ میں 35 سالہ کسان پتاک تبسوک ٹرک میں گنے لاد کر ریلوے پھاٹک کراس کررہا تھا کہ ٹرک اچانک خراب ہوگیا اور تیز رفتار ٹرین نے ٹرک کو کچل کر رکھ دیا۔
حادثہ تھائی لینڈ کے ضلع نخون پاتھوم میں پیش آیا، ویڈیو میں دیکھا جاسکتا ہے کہ کسان ٹرک خراب ہونے کی وجہ سے لوگوں کو مدد کے لیے پکار رہا ہے لیکن کوئی اس کی مدد کو نہیں آیا۔
کچھ دیر کے بعد سائیکل سوار گزرے جنہوں نے ٹرک کو ریلوے ٹریک سے ہٹانے کی کوشش کی لیکن وہ ناکام رہے اور اتنے میں ٹرین کے آنے کا وقت ہوا اور لوگ دور بھاگ گئے اور ٹرک تیز رفتار ٹرین کی زد میں آگیا۔
پتاک تبسوک کا کہنا ہے کہ میرا ٹرک تباہ ہوگیا لیکن میں اس پر بھی شکر ادا کرتا ہوں کہ میری زندگی بچ گئی اور کسی دوسرے شخص کو بھی نقصان نہیں پہنچا۔
رپورٹ کے مطابق پولیس حکام نے انسانی جانوں کو کسی قسم کے جانی نقصان نہ ہونے پر اطمینان کا اظہار کیا لیکن کہا ہے کہ وہ اس بات کی تحقیقات کریں گے کہ کیا ٹرک پر زیادہ سامان لاد دیا گیا تھا جس کی وجہ سے ریل کی پٹریوں کے بیچ پھنس گیا۔
