لندن : برطانوی شہر مانچسٹر میں چاقو کے وار سے پولیس افسر سمیت تین شہری زخمی ہوگئے، پولیس نے حملہ آور کو گرفتار کرلیا۔
تفصیلات کے مطابق برطانیہ کے شہر مانچسٹر میں واقع وکٹوریہ ریلوے اسٹیشن پر مسلح شخص نے شہریوں پر چاقو سے حملہ کردیا، چاقو زنی کی واردات میں زخمی ہونے والے متاثرین کو اسپتال منتقل کردیا گیا۔
برطانیہ کی ٹرانسپورٹ پولیس کا کہنا ہے کہ چاقو بردار شخص کے حملے میں ایک خاتون اور مرد سمیت پولیس افسر زخمی ہوا ہے، پولیس افسر کو کندھے پر زخم آئے ہیں۔
برطانوی خبر رساں ادارے کا کہنا ہے کہ پولیس نے فوری کارروائی کرتے ہوئے چاقو زنی کی واردات میں ملوث ہونے کے شبے میں ایک شخص کو گرفتار کیا گیا ہے۔
مقامی خبر رساں ادارے کا کہنا ہے کہ مانچسٹر حکام نے چاقو بردار شخص کے حملے کے بعد ٹرام سروس معطل کردی ہے اور ٹرام سروس بند کرنے کی اطلاع ٹویٹر پر جاری کردی ہے۔
برطانوی میڈیا کا کہنا ہے کہ حملے کے بعد وکٹوریہ ریلوے اسٹیشن پر پولیس کی بھاری نفری تعینات ہے۔
دوسری جانب مانچسٹر سٹی کونسل نے سماجی رابطے کی ویب سایٹ پر ٹویٹ میں تصدیق کرتے ہوئے کہا ہے کہ مانچسٹر سٹی سینٹر میں سال نو کا جشن جاری ہے، نا خوشگوار واقعات سے نمٹنے کےلیے سیکیورٹی مزید بڑھا دی گئی ہے۔
مقامی میڈیا کا کہنا ہے کہ وکٹوریہ ریلوے اسٹیشن پر چاقو زنی کی واردات رات 8 بج کر 50 منٹ پر ہوئی تھی۔
خیال رہے کہ دنیا بھر میں نئے سال کے استقبال کا سلسلہ جاری ہے، سالِ نو کے موقع پر ہر سو خوشیوں کی بہاریں ہیں، برطانیہ میں بھی لاکھوں افراد نئے سال کا جشن منانے کےلیے سڑکوں پر موجود ہیں۔
مزید پڑھیں : لندن میں چاقو زنی کی ایک اور واردات، 2 افراد زخمی
یاد رہے کہ گذشتہ برس نومبر میں برطانوی دارالحکومت لندن میں چاقو زنی کی ایک اور واردات ہوئی تھی جس کے نتیجے میں 2 افراد زخمی ہوئے تھے، نارتھ لندن میں چوروں سے مزاحمت پر 98 سالہ شخص زخمی ہوگیا۔
