اسلام آباد: ایف آئی اے سائبر کرائم راولپنڈی نے ایک کارروائی میں کالعدم تحریک لبیک کے سوشل میڈیا اکاؤنٹ چلانے والے 3 ملزمان گرفتار کر لیے۔
تفصیلات کے مطابق سوشل میڈیا پر اشتعال انگیز مواد پھیلانے والوں کے خلاف کریک ڈاؤن میں فیڈرل انویسٹگیشن ایجنسی نے تین افراد گرفتار کر لیے، ملزمان فیس بک اور ٹویٹر پر ٹی ایل پی کی جانب سے اشتعال انگیز مواد شیئر کر رہے تھے۔
ایف آئی اے کا کہنا ہے کہ ملزمان سے سوشل میڈیا اکاؤنٹس کا ڈیٹا قبضے میں لے لیا گیا ہے، اور ملزموں کے خلاف الیکٹرانک ایکٹ کے تحت کارروائی کا آغاز کر دیا گیا۔
ایف آئی اے کے مطابق گرفتار ملزمان نے ٹویٹر اور فیس بک پر مختلف اکاؤٹس بنا رکھے ہیں۔
قومی سلامتی کمیٹی کا کالعدم جماعت کیساتھ مذاکرات کے دروازے بند نہ کرنے کا فیصلہ
دوسری طرف آج بھی کالعدم تنظیم ٹی ایل پی کی جانب سے جاری احتجاج کو ختم کرانے کے لیے قومی سلامتی کمیٹی کا اہم اجلاس وزیر اعظم ہاؤس میں منعقد ہوا، 2 گھنٹے جاری رہنے والے اجلاس میں مسلح افواج کے سربراہان نے بھی شرکت کی۔
اجلاس میں ایک طرف حکومت کی رٹ قائم رکھنے کا فیصلہ ہوا اور دوسری جانب فیصلہ ہوا کہ ٹی ایل پی کے ساتھ مذاکرات کا دروازہ کھلا رکھا جائے گا، شیخ رشید نے بتایا کہ مذاکرات میں ابھی تک کوئی پیش رفت نہیں ہوئی، امید ہے رات کو میں اور نورالحق قادری پھر ان سے مذاکرات کریں۔
شیخ رشید نے بتایا کہ ٹی ایل پی کے واٹس ایپ گروپس انڈیا، ہانگ کانگ، جنوبی افریقا سے چل رہے ہیں، بعض واٹس ایپ گروپس جنوبی کوریا اور امریکا سے بھی چل رہے ہیں، ایف آئی اے کو اس سلسلے میں تحقیقات کی ہدایت جاری کر دی گئی ہے، انھوں نے بتایا کہ ٹی ایل پی کے سارے سوشل میڈیا اکاؤنٹس باہر سے چل رہے ہیں۔
