ہالی ووڈ کے ایکشن ہیرو ٹام کروز کی فلم سیریز مشن امپوسیبل 7 کا دلوں کو دھڑکانے والا ٹریلر ریلیز ہو گیا۔
ذرائع ابلاغ بتا رہے ہیں ٹام کروز کی آنے والی مشن امپاسیبل فلم ‘ڈیڈ ریکننگ پارٹ ون’ کا ٹریلر مبینہ طور پر ہفتے کے روز آن لائن لیک ہو گیا تھا۔
کئی ٹویٹر اکاؤنٹس نے بظاہر لیک ہونے والے ٹریلر کو شیئر کیا، اور ویڈیو سوشل میڈیا پر پھیلنا شروع ہوگئی، تاہم ہفتے کے دن کے اختتام تک اسٹوڈیو کی طرف سے کاپی رائٹ کی خلاف ورزی کی رپورٹ درج کرنے کے بعد زیادہ تر جگہوں سے ویڈیوز کو ہٹا دیا گیا۔
یہ ٹریلر گزشتہ ماہ لاس ویگاس میں سیزر پیلس میں منعقدہ شو ‘سنیما کان’ میں دکھایا گیا تھا، لیکن اسے عوامی طور پر ریلیز نہیں کیا گیا تھا۔
دو منٹ طویل اس ٹریلر میں زبردست ایکشن والے مناظر اور ٹام کروز کے اعصاب شکن اسٹنٹس نے شائقین کو حیران کر دیا ہے، ٹریلر میں 59 سالہ کروز کو ایتھن ہنٹ کے طور پر واپس آتے ہوئے دکھایا گیا ہے۔
مشن امپوسیبل 7 شوٹنگ کے مرحلے پر تھی، تب ہی سے خبروں کی زینت بننے لگی تھی، کرونا وائرس کی وبا کی وجہ سے اس کی شوٹنگ میں تاخیر بھی ہوئی، تاہم ٹام کروز کے خطرناک اسٹنٹس پر مبنی کلپس سامنے آئے تو شائقین اس فلم کا بے چینی سے انتظار کرنے لگے، جو اب آخر کار ختم ہونے جا رہا ہے۔
مشن امپوسیبل ڈیڈ ریکننگ پارٹ ون 14 جولائی 2023 کو تھیٹرز میں ریلیز ہونے جا رہی ہے۔
ہالی ووڈ کے ٹاپ ایکشن ہیرو ٹام کروز نے فلم کے عملے کے لیے ‘امپاسبل’ قدم اٹھا لیا، لوگ اس بات پر حیران رہ گئے کہ ٹام کروز نے حقیقی زندگی میں بھی ‘مشن امپاسبل’ کی کس طرح ایک حقیقی جھلک دکھا دی ہے۔
برطانوی ٹیبلائڈ دی سن کی رپورٹ کے مطابق ٹام کروز نے ‘مشن امپاسبل 7’ کے عملے کے لیے اپنے پرائیویٹ جیٹ پر 300 کرسمس کیک منگوائے، لیکن حیرت کی بات یہ ہے کہ کیک نے امریکا سے برطانیہ تک کا سفر طے کیا۔
59 سالہ امریکی اداکار نے اس منفرد انداز میں مشن امپاسیبل 7 کی ٹیم کے لیے نیک خواہشات کا اظہار کیا، بتایا گیا ہے کہ ٹام کروز اپنے ساتھیوں کو سرپرائز دینا چاہتے تھے، اسی لیے انھوں نے لاس اینجلس سے 300 کرسمس کیک اپنے نجی طیارے پر برطانیہ منگوانے کا فیصلہ کیا۔
دی گارڈین کے صحافی اسٹوارٹ ہیریٹیج کو ایک ہفتہ قبل بھیجا گیا کیک
اس مشن کو پورا کرنے کے لیے ٹام کروز کے طیارے کو بحر اوقیانوس کے پار جانے کے لیے 5500 میل کا چکر کاٹنا پڑا۔
رپورٹ کے مطابق ٹام کروز کرسمس کے موقع پر مشن امپاسبل 7 کی ٹیم کو ایک دعوت دینا چاہتے تھے، اس لیے انھوں نے فیصلہ کیا کہ صرف لاس اینجلس میں ان کی پسندیدہ بیکری کے کیک ہی یہ دعوت دوبالا کر سکتے ہیں۔
انھوں نے 300 کیک بنانے کے لیے مطلوبہ دکان کو خصوصی آرڈر دیا اور پھر جب یہ تیار ہوئے تو انھیں اپنے جیٹ پر واپس برطانیہ پہنچوایا۔
ٹام کروز نے کرسمس کیکس پر 11,400 پاؤنڈ خرچ کیے ہیں۔
واضح رہے کہ ایکشن ہیرو کو ایک فراخ دل انسان مانا جاتا ہے۔ اور ان کی عادت ہے کہ وہ کرسمس پر اپنے قریبی دوستوں کو 50 ڈالرز (38 پاؤنڈ) کا سفید چاکلیٹ کوکونٹ کیک بھیجتے ہیں۔
معروف ہالی ووڈ اداکارہ نکول کڈمین نے اپنے کیریئر کے متاثر ہونے کا ذمہ دار سابق شوہر ٹام کروز سے شادی کو قرار دے دیا، ان کا کہنا تھا کہ میڈیا ان کے تعلقات میں کچھ زیادہ ہی دخل اندازی کر رہا تھا۔
بین الاقوامی میڈیا کے مطابق ہالی ووڈ کی معروف اداکارہ نکول کڈمین نے اپنے سابق شوہر ٹام کروز سے اپنی شادی اور طلاق کے بارے میں گفتگو کی۔ دونوں کے درمیان طلاق اس وقت ہوئی جب ٹام کروز نے ایک مذہبی فرقے سائنٹولوجی میں شمولیت اختیار کی تھی۔
اپنے انٹرویو میں گفتگو کرتے ہوئے نکول کڈمین نے کہا کہ ان کے اور ٹام کروز کے تعلقات پر میڈیا نے 1990 کے عشرے میں کچھ زیادہ ہی جانچ کی تھی۔
دونوں نے اسی سال شادی کی تھی جو 10 سال قائم رہی تاہم 2001 میں ان میں عیلحدگی ہوگئی تھی۔ نکول کا کہنا تھا کہ ان کا ایکٹنگ کیریئر، ان کی شادی اور ذاتی زندگی پر توجہ دینے سے متاثر ہوا، اور وہ اس کا ذمہ دار میڈیا کو سمجھتی ہیں۔
ان کا کہنا ہے کہ وہ اس وقت نوجوان تھیں اور ہر ممکن کوشش کرتی تھیں کہ سب سے کھل کر بات کریں اور یہی چیز ان کے لیے نقصان دہ ثابت ہوئی۔
برمنگھم: مشن امپاسبل 7 کی شوٹنگ کے دوران ٹام کروز کی بی ایم ڈبلیو کی چوری کی واردات ہو گئی۔
تفصیلات کے مطابق ہالی ووڈ سپر اسٹار ٹام کروز بڑے بڑے چوروں اور مجرموں کا پیچھا کرتے ہیں مگر کوئی من چلا چور خود ان کی بی ایم ڈبلیو گاڑی چرا کر لے گیا۔
یہ واردات بدھ کے روز برطانوی شہر برمنگھم میں ہوئی، جہاں مشن امپاسبل سیون کی شوٹنگ جاری تھی، ان کی BMW X7 گرانڈ ہوٹل میں پارک تھی، جب ان کے باڈی گارڈ نے انھیں بتایا تھا کہ گاڑی غائب ہے۔
اپنی قیمتی گاڑی کی چوری کی خبر سن کر ٹام کروز سخت غصے میں آ گئے، اگرچہ پولیس نے بعد میں ان کی گاڑی قریبی قصبے سمتھویک سے برآمد کر لی، تاہم چور گاڑی کے اندر موجود ٹام کا قیمتی سامان لے اڑا تھا، جو کئی ہزار پاؤنڈز مالیت کا تھا۔
پولیس کا کہنا ہے کہ وہ سی سی ٹی وی فوٹیجز کی مدد سے چور کی تلاش کر رہے ہیں، تاہم ابھی تک وہ ہاتھ نہیں آیا ہے۔
رپورٹ کے مطابق چوروں نے گاڑی اڑانے کے لیے لگژری گاڑی کی بغیر چابی اگنیشن فوب سے سگنل کلون کرنے کے لیے ایک اسکینر کا استعمال کیا تھا۔ گاڑی چوں کہ الیکٹرانک ٹریکنگ ڈیوائس سے لیس تھی اس لیے پولیس نے جلد ہی اسے ٹریک کر لیا۔
میڈیا رپورٹس میں کہا گیا ہے کہ چور یقیناً کوئی پاگل تھا جس نے ٹام کروز کی گاڑی اڑانے کی ہمت کی، تاہم وہ ٹام کروز سے زیادہ پاگل نہیں ہو سکتا، کیوں کہ کروز نے اپنی آنے والی فلم میں جو خوف ناک مناظر خود فلمائے ہیں اس نے دنیا بھر میں موجود ان کے شائقین کو حیران کر دیا ہے۔
دی گارجین کے مطابق مشن امپاسبل 7 کے ایک منظر کی شوٹنگ کے لیے برمنگھم کے گرانڈ سینٹرل شاپنگ سینٹر کو ابوظبی کے ایک ایئرپورٹ کی شکل دی گئی تھی۔
مشن امپاسبل سیون کے پلاٹ کے بارے میں ابھی تو کوئی پتا نہیں چلا ہے تاہم اس فلم میں موجود چند اسٹنٹ مناظر سے متعلق ساری دنیا جان چکی ہے، ایک تصویر میں وہ بی ایم ڈبلیو کی ایک شان دار موٹر سائیکل پر سوار ہیں اور ایک خطرناک منظر کے لیے اس کی سیفٹی رِگ کو ٹیسٹ کر رہے ہیں۔
بعد میں یہ بائیک ایک حادثے کا اس وقت شکار ہوگئی جب یہ فلم سے ہٹ کر ایک اسٹنٹ کے دوران گتوں سے بنے باکسز پر چڑھ دوڑی، جس سے ان میں آگ لگ گئی، اور شوٹنگ میں تاخیر ہو گئی۔
شہرہ آفاق فلم مشن امپوسبل سیون میں ٹام کروز نے اپنی زندگی کا سب سے خطرناک اور حقیقی اسٹنٹ کیا، جسے دیکھنے والے دم بخود رہ گئے۔
اس وقت تو معلوم نہیں ہوسکا تھا کہ اس اسٹنٹ کو کس نے کیا تھا مگر اب تصدیق ہوگئی ہے کہ ایسا ٹام کروز نے خود کیا۔ ایونٹ کے موقع پر بات کرتے ہوئے ٹام کروز نے کہا کہ یہ اب تک سب سے خطرناک اسٹنٹ تھا جس کی میں نے کوشش کی، ہم اس کے لیے برسوں سے کام کررہے تھے، میں بچپن سے ایسا کرنا چاہتا تھا’۔
فلم کے ڈائریکٹر کرسٹوفر میک کیری نے کہا کہ اب بس ایک بات مجھے خوفزدہ کررہی ہے کہ مشن 8 کے لیے ہم کیا دکھائیں گے۔ حال ہی میں فلم کی عکس بندی کا ایک اور سین بھی سوشل میڈیا پر بہت وائرل ہوا تھا جس میں ایک ٹرین انجن کو بلندی سے نیچے گرایا جاتا ہے۔
Christopher McQuarrie and Tom Cruise are taking Mission: Impossible 7 to another level pic.twitter.com/eZaa5z8s5Y
اس سین کو برطانیہ کے علاقے ڈربی شائر میں 20 اگست کو فلمایا گیا تھا اور مقامی فوٹوگرافر نے اسے اپنے کیمرے کی آنکھ میں محفوظ کرکے ٹوئٹر پر شیئر کیا۔ رپورٹس کے مطابق ٹام کروز بھی اس موقع پر موجود تھے اور ہیلی کاپٹر سے انجن کے گرنے کا مشاہدہ کررہے تھے۔
واضح رہے کہ ٹام کروز نے جب 1990 کی دہائی میں مشن امپوسبل سیریز میں شمولیت اختیار کی تو ایک اداکار ہوتے ہوئے اپنے اسٹنٹس خود کرنے کے حوالے سے شہرت حاصل کی، اس سیریز کی ہر نئی فلم میں دنگ کردینے والے اسٹنٹس ہوتے ہیں جو ٹام کروز نے خود کیے۔
ہوسکتا ہے کہ آپ کا خیال ہو کہ 2011 میں ریلیز ہونے والی مشن امپوسبل گھوسٹ پروٹوکول میں دنیا کی سب سے بلند عمارت پر چڑھنے کا مظاہرہ ٹام کروز نے خود نہ کیا ہو مگر آپ کی سوچ غلط ہے۔
ٹام کروز کی زندگی کا سب سے خطرناک اسٹنٹ تو مشن امپوسبل 7 میں ناظرین دیکھ سکیں گے۔ اداکار نے خود بتایا ہے کہ اس نئی فلم میں وہ اپنی زندگی کا سب سے خطرناک اسٹنٹ کررہے ہیں۔
اس اسٹنٹ کے لیے ٹام کروز نے ایک سال تک تربیت حاصل کی جس کے دوران ان کو ناروے کی ایک وادی میں موٹرسائیکل دوڑاتے ہوئے ایک پہاڑی سے گہرائی میں چھلانگ لگانا تھی۔
سنیما کون ایونٹ کے موقع پر ٹام کروز اور فلم کے ڈائریکٹر مک کیری نے شرکت کرکے مشن امپوسبل 7 کے بارے می بات کی۔ اس اسٹنٹ کے لیے ٹام کروز نے 50 اسکائی ڈائیونگ سیشنز میں شرکت کی اور 13 ہزار بار موٹرسائیکل سے جمپ لگائی۔
اس اسٹنٹ کو فلم کی شوٹنگ کے پہلے دن عکسبند کیا گیا تھا جس کی ویڈیو ممکنہ طور پر گزشتہ سال ستمبر میں وائرل بھی ہوئی تھی۔
گزشتہ سال وائرل ہونے والی ویڈیو میں دکھایا گیا تھا کہ ایک شخص موٹرسائیکل کو ریمپ پر دوڑاتے ہوئے پہاڑی سے نیچے چھلانگ لگادیتا ہے اور پیراشوٹ کھول کر نیچے اتر جاتا ہے۔
اس وقت تو معلوم نہیں ہوسکا تھا کہ اس اسٹنٹ کس نے کیا تھا مگر اب تصدیق ہوگئی ہے کہ ایسا ٹام کروز نے خود کیا۔
ایونٹ کے موقع پر بات کرتے ہوئے ٹام کروز نے کہا ‘یہ اب تک سب سے خطرناک اسٹنٹ تھا جس کی میں نے کوشش کی، ہم اس کے لیے برسوں سے کام کررہے تھے، میں بچپن سے ایسا کرنا چاہتا تھا’۔
ڈائریکٹر کرسٹوفر میک کیری نے کہا کہ اب بس ایک مجھے خوفزدہ کررہی ہے کہ مشن 8 کے لیے ہم کیا دکھائیں گے۔ مشن امپوسبل 7 کے پلاٹ کے بارے میں ابھی کچھ زیادہ علم نہیں مگر ایسا کہا جارہا ہے کہ اس میں گزشتہ حصے کی کہانی آگے بڑھائی گئی ہے۔
یہ فلم ٹام کروز کی ایکشن سیریز ‘مشن امپوسبل’ کی ساتویں فلم ہے، اس سیریز کی چھٹی فلم 2018 میں ریلیز کی گئی تھی اور اس کی شوٹنگ کے دوران بھی کئی خطرناک مناظر کے دوران خود ٹام کروز بھی زخمی ہوگئے تھے۔
اس سیریز کی پہلی فلم مشن امپاسیبل کے نام سے 1996 میں آئی تھی، دوسری چار سال بعد سال 2000، تیسری 2006، چوتھی 2011، پانچویں فلم 2015 میں اور چھٹی فلم 2018 میں ‘مشن امپاسیبل: فال آؤٹ’ کے نام سے ریلیز کی گئی تھی۔
سیریز کی ساتویں فلم میں ٹام کروز کے ساتھ اداکارہ ونیسا کربی، ربیکا فرگوسن، ہائلے ایٹویل، سائمن پیگ اور ہینری زیمی سمیت دیگر اداکار ایکشن میں دکھائی دیں گے۔
لاس اینجلس : ہالی وڈ کے ہیرو ٹام کروز نے گولڈن گلوب کمیٹی میں اصلاحات نہ ہونے پر احتجاجاً اپنے ایوارڈز واپس کردیئے، ٹام کروز نے بہترین اداکاری پر تین ایواڈز جیتے تھے۔
تفصیلات کے مطابق ہالی وڈ کے ہیرو ٹام کروز نے آسکر کے بعد دنیا کے دوسرے معتبر ترین ایوارڈز گولڈن گلوب انتظامیہ کی جانب سے کمیٹی میں اصلاحات نہ کیے جانے کے بعد احتجاجاً اپنے تین ایوارڈز تنظیم کو واپس کردیے۔
ٹام کروز نے واپس کیے گئے ایوارڈز 1990 سے 2000 تک جیتے تھے، انھوں پہلا گولڈن گلوب ایوارڈ 1990 میں دوسرا بہترین اداکار کا ایوارڈ 1997 اور تیسرا بہترین معاون اداکار کا ایوارڈ اپنی 2000 کی فلم (میگنولیا) پر جیتا تھا۔
دوسری جانب امریکی ٹی وی نیٹ ورک نے بھی اصلاحات نہ ہونے تک گولڈن گلوب ایوارڈز کی آئندہ سال کی تقریب کو ٹی وی پر نشر نہ کرنے کا اعلان کیا ہے۔
ٹی وی نیٹ ورک کی جانب سے بیان میں کہا گیا تھا کہ گولڈن گلوب ایوارڈز منعقد کرنے والی تنظیم اصلاحات کے لیے پرعزم ہے مگر تنظیم میں اصلاحات میں کافی وقت درکار ہے تاہم جب تک مکمل اصلاحات نہیں ہوتی، گولڈن گلوب ایوارڈز کی تقریب کو 2022 میں نشر نہیں کیا جائے گا۔
نیٹ ورک کے مطابق مکمل اصلاحات ہونے کے بعد ہی 2023 کے گولڈن گلوب ایوارڈز کی تقریب کو نشر کرنے کے لیے پرعزم ہے۔
خیال کیا جا رہا ہے کہ ممکنہ طور پر 2022 کے گولڈن گلوب ایوارڈز کی تقریب کو بھی تنازع کے بعد ملتوی کیا جائے گا۔
یاد رہے رواں برس فروری میں امریکی اخبار لاس اینجلس ٹائمز نے اپنی ایک تحقیقاتی رپورٹ میں انکشاف کیا تھا کہ بعض بڑے پروڈکشن اداروں کے تنظیم سے قریبی تعلقات ایوارڈز کی نامزدگیاں اور ایوارڈز دینے کے فیصلوں پر اثر انداز ہوتے ہیں۔
رپورٹ میں کہا گیا تھا کہ جہاں تنظیم سازی کے معاملات میں جہاں رنگ و نسل کی کمی ہے، وہیں تنظیم میں اخلاقی اور پیشہ ورانہ امتیازی سلوک بھی ہوتا ہے۔
بعد ازاں گولڈن گلوب ایوارڈز منعقد کرنے والی تنظیم ولی وڈ فورین پریس ایسوسی ایشن نے افسوس کا اظہار کرتے ہوئے اصلاحات کا اعلان کیا اور کہا کہ نئی اصلاحات کے مطابق اب سیاہ فام افراد کو بھی رکن بنایا جائے گا۔
ہالی ووڈ کے مشہور اداکار ٹام کروز کو اس وقت پولیس بلانی پڑگئی جب فلم کی شوٹنگ کے دوران متعدد لوگوں نے سیٹ پر ہلہ بول دیا۔
غیر ملکی میڈیا رپورٹ کے مطابق بدمزگی کا یہ واقعہ برطانیہ میں پیش آیا، جب ہالی ووڈ کے مشہور اداکار ٹام کروز کی نئی آنے والی فلم مشن امپاسبل7 کے سیٹ پر بلا اجازت لوگ گھس آئے،جس پر اداکار نے ایکشن لیا اور فوری طور پر پولیس کو طلب کرلیا۔
رپورٹ کے مطابق فلم کے سیٹ پر دھاوا بولنے والے افراد وہاں موجود سامان پر چڑھ کر سیٹ کی تصویریں لینا چاہ رہے تھے، جس کے لئے انہوں نے فلم کے سیٹ کا دروازہ تک توڑ ڈالا، جس کے باعث پولیس کو طلب کرنا پڑا۔
ذرائع کے مطابق فلم کا سیٹ بہت بڑا اور کھلا ہوا ہے جسے مکمل طور پر بند کرنا ممکن نہیں، گزشتہ ہفتے بھی اسی طرح کے واقعے کے بعد پولیس کو بلایا گیا تھا، ناخوشگوار واقعے کے بعد اب فلم کی ٹیم مزید حفاظتی اقدامات کرے گی تاکہ شوٹنگ میں مزید تاخیر نہ ہو۔
واضح رہے کہ عالمی وبا کرونا کے باعث فلم کی ریلیز مؤخر کردی گئی تھی، بعد ازاں اس کی ریلیز کی نئی تاریخ 22مئی2022 سامنے آئی ہے، یہ فلم ٹام کروز کی ایکشن سیریز ‘مشن امپاسیبل’ کی ساتویں فلم ہے۔
لاس اینجلس : اداکار ٹام کروز کی ایکشن، سسپنس اور تھرلر سے بھرپور فلم "مشن امپاسبل” سیریز کی ساتویں فلم "مشن امپاسبل سیون” کی شوٹنگ جاری ہے۔
اس دوران فلم کی عکس بندی ایک چلتی ٹرین میں ہورہی تھی کہ وہ خطرناک سین حقیقت میں بدل گیا، ہالی ووڈ فلموں کے ایکشن ہیرو ٹام کروز چلتی ٹرین سے کیمرہ مین کو بچا کر اصل زندگی کے ہیرو بن گئے۔
غیر ملکی خبر رساں کی رپورٹ کے مطابق فلم "مشن امپاسبل7” کا برطانیہ میں نارتھ یارکشائر ماؤس ریلوے اسٹیشن پر چلتی ٹرین پر ایک ایکشن سین فلمایا جارہا تھا ٹام کروز کے ساتھ ٹرین پر کیمرہ مین بھی موجود تھا جو اس سین کی عکس بندی کررہا تھا۔
اس کیمرہ مین نے گرنے سے بچنے کے لیے خود کو ایک رسی کی مدد سے باندھا ہوا تھا لیکن اس کے باوجود کیمرہ مین کا پیر پھسلا اور وہ ٹرین سے گرنے لگا۔
جیسے ہی کیمرہ مین چلتی ٹرین سے گرنے والا تھا ٹام کروز نے بہادری سے اسے پکڑا اور اسے اوپر کھینچنے لگے تاکہ کیمرہ میں اسٹیل کے کنارے پر اپنا توازن درست کرلے اور اس طرح اداکار نے کیمرہ مین کو چلتی ٹرین سے گرنے سے بچالیا۔
واضح رہے کہ مشن امپاسبل سیریز کی ہر فلم میں اداکار ٹام کروز ایتھن ہنٹ کا مرکزی کردار ادا کرتے ہیں، فلم میں اداکارہ ہیلے ایٹ ویل ان کے مقابل مرکزی کردار ادا کررہی ہیں۔
یاد رہے کہ گزشتہ برس مشن امپاسبل سیون کی اٹلی میں شوٹنگ جاری تھی لیکن کرونا وائرس کی وجہ سے فلم کی شوٹنگ منسوخ کردی گئی تھی لیکن اب ایک بار پھر فلم کی شوٹنگ دوبارہ شروع کردی گئی ہے۔
نئی دہلی: بالی ووڈ اداکارہ کنگنا رناوت نے خود کو عالمی شہرت یافتہ ہالی ووڈ اداکار ٹام کروز سے بہتر اسٹنٹ پرفارمر قرار دیا ہے۔
مقامی میڈیا کے مطابق کنگنا نے سماجی رابطے کی ویب سائٹ ٹویٹر پر اپنے ٹویٹ میں ایک پرانا مضمون شیئر کیا جو ان کی فلم منی کرنیکا کے بارے میں تھا، اس میں انہوں نے لکھا کہ لبرلز بہت پریشان ہیں، کیونکہ مشہور ایکشن فلموں کے ڈائریکٹر نے مجھے ٹام کروز سے بہتر کہا تھا۔
Ha ha ha bahut pareshaan hain librus, yeh Dekho renowned action director of Brave heart and many legendary Hollywood action films said I am better than Tom Cruise when it comes to action …
Hahahahaha bechare librus aur tadpo. https://t.co/pVYxZhYUOM
اس سے قبل ایک موقع پر انہوں نے 3 دفعہ آسکر ایوارڈ جیتنے والی ہالی ووڈ اداکارہ میرل اسٹرپ کو اپنے آپ سے کمتر قرار دیا تھا۔
اس حوالے سے بھی ایک ٹویٹ میں کنگنا نے لکھا کہ جو لوگ مجھ سے پوچھ رہے ہیں کہ میں نے (میرل اسٹریپ کے مقابلے میں) کتنے آسکر ایوارڈ جیتے ہیں، وہ لوگ میرل اسٹریپ سے بھی جا کر پوچھیں کہ انہوں نے کتنے نیشنل یا پدم شری ایوارڈ جیتے ہیں۔
انہوں نے کہا ان کا جواب بھی کچھ نہیں ہوگا لیکن اس سے لوگوں کی غلام ذہنیت ظاہر ہوتی ہے۔
Anyone who is asking how many oscars I have can also ask how many national or Padma awards Meryl Streep has, answer is none, come out of your slave mentality. High time you all find some self respect and self worth.
کراچی: پاکستانی ڈرامہ انڈسٹری کی معروف اداکارہ عائزہ خان کی ہالی ووڈ اسٹار ٹام کروز کے ساتھ ترمیم شدہ تصویر سوشل میڈیا پر وائرل ہوگئی۔
تفصیلات کے مطابق اے آر وائی ڈیجیٹل کے ڈراموں پیارے افضل، میرے پاس تم ہو، تھوڑا سا حق سے شہرت کی بلندیوں کو چھونے والی اداکارہ عائزہ خان بھی ہالی ووڈ اسٹار ٹام کروز کی مداح نکلیں۔
اداکارہ نے سماجی رابطے کی ویب سائٹ انسٹاگرام پر ٹام کروز کے ساتھ ترمیم شدہ تصویر پوسٹ کی جس کو مداحوں کی جانب سے خوب سراہا جارہا ہے۔
عائزہ کی جانب سے شیئر کی جانے والی تصویر میں دیکھا جاسکتا ہے کہ وہ ’ٹام کروز کے مجسمے کے کاندھے پر سر رکھی ہوئی مسکرا رہی ہیں، اداکارہ نے تصویر کے کیپشن میں ’ٹام کروز لکھا اور ایموجیز کا استعمال کیا۔
واضح رہے کہ عائزہ خان نے 2009 میں شوبز کی دنیا میں قدم رکھا، 18 برس کی عمر میں انہوں نے پہلے ڈرامے میں اداکاری کے جوہر دکھائے اس کے بعد اے آر وائی ڈیجیٹل کے ڈراموں پیارے افضل، میرے پاس تم ہو سے انہیں شہرت ملی۔
دوسری جانب ہالی ووڈ اداکار ٹام کروز بھی اپنی فلموں میں خطرناک اسٹنٹس کے باعث مشہور ہیں، ان کی فلم ’مشن امپاسیبل‘ سیریز میں خطرناک اسٹنٹس دیکھ کر مداح حیران رہ جاتے ہیں۔
یاد رہے کہ 58 سالہ ٹام کروز دنیا کی بلند ترین عمارت برج الخلیفہ پر حیران کن اسٹنٹ کرچکے ہیں جبکہ ایک اے 400 فوجی طیارے پر بھی ان کے خطرناک اسٹنٹ دیکھ کر مداح خوفزدہ ہوگئے تھے۔
