کراچی : شہر قائد میں ٹارگٹ کلنگ کا واقعہ پیش آیا ہے جس میں تھم نہ سکے جس میں ہائی کورٹ کا ایک وکیل اپنی زندگی سے ہاتھ دھو بیٹھا۔
اس حوالے سے پولیس حکام کا کہنا ہے کہ کراچی کے علاقے سولجر بازار لسبیلہ کے قریب نامعلوم افراد نے فائرنگ کرکے ناصر ملک نامی وکیل کو دن دہاڑے قتل کردیا۔
پولیس کے مطابق ایڈووکیٹ ہائی کورٹ ناصر ملک پر پارکنگ ایریا میں فائرنگ کی گئی، وکیل کو ملزمان نے ٹارگٹ کرکے قتل کیا جائے وقوعہ سے گولیوں کے کئی خول ملے ہیں۔
پولیس حکام کا کہنا ہے کہ مقتول ناصر ملک کا کسی سے تنازع چل رہا تھا، اہل خانہ ملزمان کے نام بھی جانتے ہیں، مقتول کی لاش پوسٹ مارٹم کیلیے سول اسپتال منتقل کردی گئی ہے۔
پارک سے تشدد زدہ لاش برآمد
علاوہ ازیں کراچی کے علاقے گلشن اقبال بلاک13اے سے ایک شخص کی تشدد زدہ لاش ملی ہے، ریسکیو اہلکاروں کے مطابق 4دن پرانی لاش گراؤنڈ کے اندر سے ملی ہے جس کی تاحال شناخت نہیں ہوسکی۔
دوسری جانب گلستان جوہر بھٹائی آباد میں فائرنگ سے 2افراد زخمی ہوگئے، پولیس کا کہنا ہے کہ واقعہ ملیر کینٹ تھانے کی حدود میں پیش آیا، زخمی شخص کو اسپتال منتقل کردیا گیاہے۔
پولیس حکام کے مطابق پیدل آنے والے ایک شخص نے فائرنگ کرکے مقدم سومرو اور سجاد کو زخمی کیا، واقعہ ذاتی رنجش کا نتیجہ معلوم ہوتا ہے، مزید تحقیقات جاری ہیں۔
