لاہور : توشہ خانہ کیس میں چیئرمین پی ٹی آئی کو دی گئی سزا پر ردعمل دیتے ہوئے ترجمان تحریک انصاف کا کہنا ہے کہ آئین، قانون پر شب خون مارا گیا۔
اس حوالے سے جاری ترجمان پی ٹی آئی کے بیان میں کہا گیا ہے کہ فیصلہ لے کر عوام میں نکلیں، ساری حقیقت معلوم ہوجائے گی، آج کے فیصلے کے ذریعے آئین، قانون پر شب خون مارا گیا ہے۔
ان کا کہنا ہے کہ مذکورہ عدالتی فیصلے میں قوم لندن منصوبے کی بازگشت سن رہی ہے، قوم جانتی ہے کہ آج کا فیصلہ سیاست و ریاست کو اپاہج بنانے کی کوشش ہے۔
ترجمان نے کہا کہ شکست خوردہ عناصر نجات کا واحد وسیلہ سازشوں کو سمجھتے ہیں، قوم بیماری کا بہانہ کرکے بھاگنے والے بھگوڑے کی اصلیت جانتی ہے،
آئینی حقوق پامال کرتے ہوئے یہ فیصلہ دیا گیا، سیاسی شکست کو ریاستی جبر و فسطائیت سے بدلنے کی کوششیں ناکام ہوں گی۔
واضح رہے کہ اسلام آباد میں سیشن کورٹ نے توشہ خانہ کیس میں محفوظ فیصلہ سناتے ہوئے چیئرمین پی ٹی آئی کو 3 سال قید کی سزا سنا دی ہے اور ایک لاکھ جرمانہ عائد کر دیا، انھیں 5 سال کے لیے الیکشن ایکٹ کے تحت نا اہل بھی قرار دے دیا گیا ہے۔
عدالت نے توشہ خانہ کیس میں چیئرمین پی ٹی آئی کے وارنٹ گرفتاری بھی جاری کیے جس پر انھیں لاہور میں زمان پارک سے گرفتار کر کے کوٹ لکھپت جیل منتقل کر دیا گیا ہے۔
