ٹھٹھہ:محکمہ ایری گیشن کی نااہلی کے باعث مضر صحت زہریلا پانی نہروں میں شامل ہوگیا ہے ، زہریلے پانی کے باعث مچھلیوں کے تالابوں میں لاکھوں کی تعداد میں مچھلیاں مرگئیں۔
تفصیلات کے مطابق جامشورو سے ضلع ٹھٹھہ اور کراچی کو فراہم ہونے والا پانی کے بی فیڈر ٹھٹھہ اور مین برانچ سے چھوٹی چھوٹی نہروں میں آنے والا پانی زہریلا آنے کے باعث مختلف تالابوں میں لاکھوں کی تعداد میں مچھلیاں مرگئیں ہیں جبکہ مختلف دیہاتوں تک زہریلا پانی پہنچنے کے باعث متعدد جانور سخت بیمار ہوگئے۔
اس سلسلے میں محکمہ ایریگیشن ٹھٹھہ کے چیف ایگزیکیٹو انجنئیر نے سے رابطہ ہونے پر اپنا موقف دینے سے انکار کردیا جبکہ مقامی لوگوں نے صحافیوں کو بتایا ہے کہ زہریلا پانی استعمال کرنے کے باعث ہمارے بچوں میں ڈائریا بیماری ہوگئی ہے۔
اس سلسلے میں ؔسول اسپتال مکلی میں درجنوں افراد داخل ہوگئے ہیں، دوسری جانب فش فارم کے مالکان کا کہنا ہے کہ پچھلے پندرہ دنوں سے ایریگیشن والوں نے پانی بند کیا ہوا تھا اور آج زہریلا پانی چھوڑکر ہمیں لاکھوں کے نقصان سے دوچار کیا ہے۔
یا درہے کہ پانی میں شامل ہونے والی صنعتی فضلہ پانی کو زہریلا کرنے کا سبب بنتا ہے ، بالخصوص دیہی علاقوں میں یہ بہت زیادہ نقصان کا باعث بنتا ہے۔
یاد رہے کہ گزشتہ برس سندھ میں سندھ میں نکاسی آب کی ابتر صورتحال اور پانی کی آلودگی سے متعلق سپریم کورٹ میں کیس کی سماعت بھی ہوئی تھی جس میں سندھ حکومت کو یہ مسائل حل کرنے کا حکم دیا گیا تھا، تاہم ایک سال گزرنے کے بعد بھی یہ مسئلہ حل طلب ہے ۔
صنعتی آلودگی سے جہاں دریاؤں اور نہرو ں کا پانی آلودہ ہورہا ہے وہیں سندھ کی ساحلی پٹی بھی متاثر ہورہی ہے جس سے ماحولیاتی تبدیلیوں کا مسئلہ درپیش آرہا ہے۔
