واشنگٹن (15 جولائی 2025) امریکی صدر ڈونلڈ ٹرمپ کا ایک بار پھر اپنے بیان میں کہنا تھا کہ تجارت جنگوں کے خاتمے کا بہترین ذریعہ ہے۔
غیر ملکی ذرائع ابلاغ کے مطابق امریکی صدر ڈونلڈ ٹرمپ نے وائٹ ہاؤس میں نیٹو چیف مارک روٹے سے ملاقات کے موقع پر میڈیا سے گفتگو کرتے ہوئے کہا کہ ہم نے پاکستان اور بھارت کے درمیان جنگ رُکوائی، دونوں ممالک تیزی سے جوہری جنگ کی طرف بڑھ رہے تھے۔
ٹرمپ کا کہنا تھا کہ تجارتی ٹیکسوں میں اضافے پر یورپی یونین اور دیگر ممالک سے بات چیت کے لیے تیار ہیں، یورپی یونین کے حکام بات چیت کے لیے آ رہے ہیں۔
یوکرین جنگ سے متعلق بات کرتے ہوئے ٹرمپ کا کہنا تھا کہ روسی صدر پیوٹن سے بہت مایوس ہوا ہوں، یوکرین جنگ روکنے کا معاہدہ نہ ہوا تو 50 روز میں روس پر سخت ٹیرف لگائیں گے۔
دوسری جانب ٹرمپ کا کہنا ہے کہ غزہ جنگ بندی کے حوالے سے پیش رفت‘کافی جلد’ہو سکتی ہے۔
امریکی صدر نے غزہ کی پٹی پر اسرائیل کی جنگ روکنے کے لیے ایک معاہدے کے بارے میں اُمید کا اظہار کیا ہے۔
اُنہوں نے کہا کہ ”ہم غزہ پر بہت اچھی کارکردگی کا مظاہرہ کر رہے ہیں، اسٹیو وٹکوف یہاں ہیں اور مجھے لگتا ہے کہ ہمارے پاس جلد ہی بات کرنے کے لیے کچھ ہو سکتا ہے۔
صدر ٹرمپ کو محکمہ تعلیم سے کھلواڑ کا مکمل اختیار مل گیا
واضح رہے کہ ٹرمپ نے جون کے آخر میں کہا تھا کہ اسرائیل نے 60 روزہ جنگ بندی کی شرائط پر اتفاق کیا ہے، اور غزہ پر اسرائیل کی 21 ماہ سے جاری جنگ کو ختم کرنے کے لیے قطر میں مذاکرات جاری ہیں۔
حماس مبینہ طور پر امریکی ضمانت چاہتی ہے کہ اسرائیل کے فضائی حملے اور زمینی حملے، جن میں دسیوں ہزار فلسطینی شہید ہوئے ہیں ہیں، دوبارہ شروع نہیں ہوں گے یہاں تک کہ جنگ کے مستقل خاتمے کے بغیر جنگ بندی ختم ہو جائے۔
