Tag: Traffic accidents

کراچی: شہر قائد میں ٹریفک حادثات میں پے در پے اموات کے بعد روڈ سیفٹی کمیٹی نے ٹریفک خلاف ورزیوں پر ایکشن لے لیا۔

تفصیلات کے مطابق کراچی میں صوبائی وزیر شرجیل میمن کی ہدایت پر روڈ سیفٹی کمیٹی ایکشن میں آ گئی ہے، اوور لوڈنگ، اوور اسپیڈنگ اور غیر معیاری کمرشل گاڑیوں کے خلاف کریک ڈاؤن شروع ہو گیا ہے۔

کریک ڈاؤن کے دوران 33 گاڑیوں کی جانچ کی گئی، 20 کا چالان کیا گیا، اور 4 گاڑیاں تحویل میں لے لی گئیں، مجموعی طور پر خلاف ورزی کرنے والے ڈرائیورز پر ایک لاکھ سے زائد جرمانہ کیا گیا۔

شرجیل میمن نے کہا ہے کہ شہر میں اوور لوڈنگ، اوور اسپیڈنگ یا ان فٹ گاڑیوں کو سڑکوں پر برداشت نہیں کیا جائے گا۔

ادھر چیف سیکریٹری سندھ نے شہر میں بڑھتے ٹریفک حادثات پر اعلیٰ سطح کا اجلاس 10 فروری کو طلب کر لیا ہے، اجلاس میں آئی جی سندھ، کمشنر کراچی، سیکریٹری ٹرانسپورٹ، ڈی آئی جی ٹریفک اور دیگر حکام شریک ہوں گے، ترجمان نے کہا کہ اجلاس میں ہیوی ٹریفک ریگولیٹ کرنے کے اقدامات زیر غور آئیں گے، چیف سیکریٹری نے کہا کہ شہر میں حادثات کی روک تھام کے لیے ٹریفک پولیس کی نفری بڑھائی جائے گی۔

کراچی : ایک اور خونی ڈمپر نے موٹر سائیکل سوار بہن بھائی کو کچل دیا

واضح رہے کہ کراچی میں بے قابو خونی ڈمپر لوگوں کی جانوں سے کھیلنے لگے ہیں، گزشتہ رات شاہ لطیف ٹاؤن میں ایک اور تیز رفتار ڈمپر نے موٹر سائیکل سوار بہن بھائی کو ٹکر مار دی۔ حادثے میں موٹر سائیکل سوار بھائی جاں بحق اور اس کی بہن شدید زخمی ہو گئی۔

کراچی سب کا ہے لیکن کراچی کا کوئی نہیں، تباہ حال انفراسٹرکچر اور اسٹریٹ کرائمز کے بعد اب بڑھتے ٹریفک حادثات کو دیکھتے ہوئے یہ مقولہ ایک تکلیف دہ حقیقت بن چکا ہے۔

رواں سال 2025 کی شروعات ہی میں ٹریفک حادثات میں اتنی تیزی آ گئی ہے کہ شہر قائد کے پورے سسٹم کو حرکت میں آ جانا چاہیے تھا لیکن ایسا کچھ ہوتا دکھائی نہیں دے رہا ہے۔

کراچی میں سال 2025 کے صرف 35 روز میں 83 شہری تیز رفتار گاڑیوں کے نیچے کچل کر جاں بحق جب کہ 1 ہزار 220 سے زائد زخمی ہو چکے ہیں۔

مجموعی طور پر رواں سال اب تک 1304 حادثات ہو چکے ہیں، اگر یومیہ اوسط نکالا جائے تو کراچی میں روانہ 37 سے زائد حادثات ہو رہے ہیں، اگر ہلاکتوں کا تناسب نکالا جائے تو ہر روز 2 شہری قاتل ڈمپر، بسوں، ٹرالر اور دیگر گاڑیوں کا نشانہ بنے۔

کراچی : خونی ڈمپر نے 3 موٹرسائیکل سواروں کو کچل ڈالا

چھیپا فاؤنڈیشن سمیت دیگر فلاحی ادارے 24 گھنٹے اپنا آپریشن چلا رہے ہیں، پتا نہیں چلتا کس وقت کہاں حادثہ ہو جائے اور ان کو لاشیں اٹھانے کے لیے روانہ ہونا پڑے، لیکن سوال یہ ہے کہ ان حادثات کے بعد حکومت سندھ کے محکمہ ٹرانسپورٹ اور ٹریفک پولیس کا کیا کردار ہوتا ہے؟

جس گاڑی کا حادثہ ہوتا ہے کیا ان گاڑیوں کے روڈ پرمٹ، فٹنس سرٹیفکیٹ، ڈرائیور کا لائسنس اور دیگر تمام چیزوں کو چیک کیا جاتا ہے؟ بغیر فٹنس جن گاڑیوں کا بریک فیل ہونے کے بعد حادثہ ہوتا ہے، کیا اس کا ذمہ دار صرف ڈرائیور ہوتا ہے؟ اس میں اس ٹریفک افسر یا جعلی فٹنس جاری کرنے والے کو کیوں ذمہ دار نہیں ٹھہرایا جاتا؟ جن کی آشیرباد سے یہ شہر میں قتل عام کرتے پھرتے ہیں، کیوں سیکشن افسر کے خلاف محکمہ جاتی کارروائی نہیں کی جاتی؟

کراچی میں ایک گھنٹے کے دوران 4 شہری جاں بحق

حادثات کے بعد چند ٹریفک پولیس افسران کو تبدیل کرنے کی پالیسی برے طریقے سے ناکام ہو چکی ہے۔ ایک دور تھا جب گولی لگی لاشیں سڑکوں پر ملتی تھیں، اس لیے کراچی کا شہری جب گھر سے نکلتا تھا تو گھر والے دعا کرتے تھے کہ ان کا بھائی، بیٹا، شوہر جو کسی بھی کام سے باہر گیا ہے وہ زندہ سلامت واپس آ جائے، لیکن اب یہ دعا کرتے ہیں کہ وہ کسی حادثے کا شکار نہ ہو جائے۔