Tag: Traffic police

کراچی: ٹریفک پولیس کے ناقص سسٹم اور غفلت نے ایک اور شہری کی زندگی داؤ پر لگا دی ہے، یونیورسٹی روڈ پر طاقت کے نشے میں چور سیاسی جماعت میں یوتھ ونگ کے جنرل سیکریٹری نے موٹر سائیکل سوار پر گاڑی چڑھا دی، جس کے خلاف مبینہ ٹاؤن تھانے میں مقدمہ درج کر لیا گیا ہے۔

یونیورسٹی روڈ پر سمامہ شاپنگ سینٹر کے قریب غلط سمت سے آنے والے ریوو گاڑی نے صحیح سمت سے آنے والے کراچی میڈیکل اینڈ ڈینٹل کالج کے ملازم، دو بچوں کے باپ اطہر کو روند ڈالا، حادثے کے نتیجے میں موٹر سائیکل سوار شہری اطہر شدید زخمی ہوا، جسے شہری پہلے قریبی اسپتال لے گئے اور اس کے بعد سول اسپتال کے ٹراما سینٹر منتقل کیا گیا۔

سول اسپتال میں ابتدائی معائنے کے بعد پتا چلا کہ زخمی سر پر شدید چوٹوں کی وجہ سے کومے میں چلا گیا ہے اور انتہائی نگہداشت وارڈ میں مصنوعی تنفس پر منتقل کر دیا گیا ہے۔

حادثے کے موقع پر موجود پنکچر شاپ اور دیگر کے مطابق گاڑی میں 2 لڑکیاں بھی سوار تھیں، جو حادثے کے بعد پیدل فرار ہوئیں۔ دونوں خواتین بہ ظاہر نشے میں لگ رہی تھیں، جن سے متعلق مزید تحقیقات جاری ہیں۔

دوسری جانب پولیس نے مقدمہ اندراج کے بعد جب ملزم ریحان مصطفیٰ کے گھر پر چھاپا مارا تو پتا چلا وہ گھرسندھ پولیس کے ریٹائرڈ ڈی ایس پی کا ہے، جب کہ اس گھر میں ملزم اپنے ڈاکٹر والد اور فیملی کے ساتھ رہتا ہے، جب کہ ملزم ریحان واقعے کے بعد سے مفرور ہے۔ پولیس نے لیڈی کانسٹیبل کے ہمراہ گھر کی تلاشی بھی لی لیکن ملزم نہیں ملا۔

والد کے مطابق ان کا بیٹا اپنے ڈی ایس پی چچا کے ساتھ حیدرآباد گیا ہوا ہے، جب کہ پولیس نے چیک کیا تو ملزم کی آخری لوکیشن ڈرگ روڈ کینٹ کے قریب موصول ہوئی، ملزم کے والد نے یہ بھی بتایا کہ ان کو حادثے کے متعلق دو روز سے علم تھا اور حادثے کے وقت ان کا داماد بھی گاڑی میں موجود تھا۔

متاثرہ فیملی کے مطابق ملزم ریحان مصطفیٰ کا تعلق پاکستان مسلم لیگ ن سے ہے، جس میں وہ یوتھ ونگ میں جنرل سیکریٹری کے طور پر کام کرتا ہے اور گھر سے متصل دفتر بھی بنا رکھا ہے۔ پولیس کے مطابق ملزم کی گرفتاری کے لیے مزید کوششیں کی جا رہی ہیں۔

کراچی: ٹریفک پولیس افسر پر احاطہ عدالت میں وکلا کے تشدد کی فوٹیج سامنے آ گئی۔

تفصیلات کے مطابق سیکشن افسر پی آئی بی پر احاطہ عدالت میں تشدد کی سی سی ٹی وی فوٹیج سامنے آ گئی ہے، ویڈیو میں ایس او پر تشدد دیکھا جا سکتا ہے۔

ویڈیو میں ٹریفک پولیس افسر اور وکیل سمیت 4 افراد کو دیکھا جا سکتا ہے، محمد یوسف اپنے موبائل میں کچھ دیکھ رہا تھا، ساتھ کھڑے وکیل نے اچانک چہرے پر زوردار تھپڑ مار دیا۔

ویڈیو کے مطابق دوسرے زوردار تھپڑ میں یوسف کی ٹوپی پیچھے جا گری، ٹریفک افسر یوسف نے ہاتھ سے تھپڑ روکنے کی کوشش کی، وکیل نے ٹریفک افسر کے پیٹ میں لات دے ماری، درد کی شدت سے ٹریفک پولیس افسر زمین پر بیٹھ گیا۔

’’بچے مرتے ہیں تو مریں، ہم چالان نہیں کریں گے‘‘ وکلا کے ہاتھوں مبینہ پٹنے والے ٹریفک افسر کا بیان

اس دوران ایک شخص مسلسل وکیل کو روکنے کی کوشش کرتا رہا، دیکھتے ہی دیکھتے بڑی تعداد میں وکلا اور دیگر جمع ہو گئے، ایک پولیس اہلکار وکیل کو بیچ بچاؤ کے بعد لے جانے لگا۔

ویڈیو میں دیکھا جا سکتا ہے کہ جاتے جاتے بھی اہلکار کو پیچھے سے تھپڑ مارے گئے۔ دوسری طرف محمد یوسف نے سٹی کورٹ تھانے میں واقعے سے متعلق مقدمہ درج کروا دیا ہے۔

کراچی: شہر قائد میں موٹر سائیکل چلانے پر ایک بچے کا چالان کرنے والے ٹریفک پولیس کے سیکشن افسر کو وکلا نے مبینہ طور پر نشانہ بنایا، جس پر رد عمل میں اہلکار نے کہا ’’بچے مرتے ہیں تو مریں، اب ہم چالان نہیں کریں گے۔‘‘

اے آر وائی نیوز کے مطابق اس واقعے کے خلاف ڈی ایس پی ٹریفک جمشید شبیر کی جانب سے کراچی کے علاقے جمشید کوارٹر میں ایک پریس کانفرنس بھی کی گئی، جس میں اہلکار کی پھٹی ہوئی یونیفارم بھی دکھائی گئی۔

مبینہ تشدد کا نشانہ بننے والے اہلکار محمد یوسف کے مطابق وہ حسب معمول تین ہٹی پر ڈیوٹی کے فرائض انجام دے رہے تھے، کہ اس دوران دو کم عمر بچے جو غلط سمت سے موٹر سائیکل پر آ رہے تھے، ان کو روکا گیا۔

محمد یوسف نے بتایا کہ ٹریفک پولیس قوانین کے مطابق ان کے والدین کو حلف نامے سمیت طلب کیا گیا تاکہ آئندہ بچوں کو اس وقت تک ایسی سواری نہ دی جائے جب تک وہ قانون کے مطابق اس عمر تک نہیں پہنچ جاتے، لیکن اس دوران بچوں کا ماموں جس کے بارے میں بتایا گیا کہ وہ وکیل ہے، نے ٹریفک پولیس کو تڑیاں دیں اور پھر ایس اے کے خلاف عدالت کے ذریعے قانونی کارروائی بھی کروا دی۔

ایس او کا کہنا ہے کہ جب وہ عدالت پہنچے تو پہلے دو وکلا نے انھیں تشدد کا نشانہ بنایا، اس کے بعد درجن سے زائد وکلا اس پر پل پڑے اور احاطہ عدالت میں انھیں مارا پیٹا گیا، اور یونیفام پھاڑ دی۔

ایس او محمد یوسف کے مطابق اگر بچوں کے چالان کاٹنے پر ایسے رویوں کا سامنا کرنا پڑے گا تو ہم ڈی آئی جی اور بالا افسران کو کہہ دیں گے کہ چالان کرنے کی کیا ضرورت ہے، بچے مرتے ہیں تو مرنے دیں، اگر ہمیں ایک چالان کرنے پر ذلیل کیاجائے، مارا پیٹا جائے، تو ہم تو قانون پر عمل کروانے والے ہیں ہم تو قانون اپنے ہاتھ میں نہیں لیں گے۔

دوسری طرف ڈی ایس پی جمشید شبیر نے پریس کانفرنس میں بتایا کہ ایس او کو احاطہ عدالت میں مارا پیٹا گیا، ہم نے تو بچوں کو ہراساں نہیں کیا تھا نہ مارا پیٹا تھا، جب اے آر وائی نیوز نے ٹریفک کے اعلیٰ افسر سے رابطہ کیا تو ان کی جانب سے بھی یہ بات کہی گئی کہ اب بچوں کی ڈرائیونگ پر چالان نہیں ہوں گے، نہ ہی ماتحت عملے کے ساتھ ایسے رویوں کو برداشت کیا جائے گا، اور اس عمل کی ہر فورم پر بھرپور مذمت کی جائے گی۔