کامک بک کردار اسپائیڈر مین کی نئی فلم اسپائیڈر مین: نو وے ہوم کے ٹریلر نے 24 گھنٹوں میں 35 کروڑ 55 لاکھ ویوز لے کر نیا ریکارڈ قائم کر لیا اور ایونجرز کے تمام ہیروز کو شکست دے دی۔
اس سے قبل یہ ریکارڈ سنہ 2018 میں سائنس فکشن فلم اوینجرز: اینڈ گیم کے ٹریلر کے پاس تھا، جسے ایک دن میں 29 کروڑ 90 لاکھ بار دیکھا گیا تھا۔
اسپائیڈر مین کی نئی فلم کی جھلکیاں کافی عرصہ قبل ہی جاری کر دی گئی تھیں مگر 24 اگست کو اس کا پہلا ٹریلر جاری کیا گیا ہے، جو مداحوں کو اپنی طرف کھینچنے میں کامیاب ہوگیا۔
اسپائیڈر مین: نو وے ہوم کے ٹریلر کی جانب سے ایونجرز اینڈ گیم کے ٹریلر کا ریکارڈ توڑنے کے بعد خیال کیا جا رہا ہے کہ ممکنہ طور پر مذکورہ فلم کمائی کا بھی نیا ریکارڈ بنائے گی۔
ایکشن اور تھرل سے بھرپور فلم کو دسمبر میں کرسمس کے موقع پر ریلیز کیا جائے گا۔
اسپائیڈر مین سیریز کی پہلی فلم اسپائیڈر مین: ہوم کمنگ سنہ 2017 میں ریلیز کی گی تھی، جس کے بعد اس کے سیکوئل اسپائیڈر مین: فار فرام ہوم کو 2019 میں اور اب سیریز کی تیسری فلم اسپائیڈر مین: نو وے ہوم کو دسمبر 2021 میں ریلیز کیا جائے گا۔
2 سال قبل اپنی صلاحیتوں سے سب کو دنگ کردینے والی، تہلکہ مچادینے والی ونڈر وومن ایک بار پھر دھماکے دار انداز میں واپس آرہی ہے، ونڈر وومن 1984 کا ٹریلر ریلیز کردیا گیا۔
سنہ 2017 میں ڈی سی کامکس کی ونڈر وومن نے دنیا بھر میں تہلکہ مچا دیا تھا۔ اب تک تخلیق کیے گئے تمام سپر ہیروز کو ٹکر دیتی اور دشمنوں کو پچھاڑتی ونڈر ویمن نے سپر وومن کے تصور کو نئی جہت دی۔
اس سے پہلے سپر وومن پر بنائی گئی فلمیں اتنی زیادہ مقبول نہ ہوسکیں تاہم ونڈر وومن کی جاندار اداکاری اور اسکرین پلے نے مقبولیت اور پسندیدگی میں تمام سپر ہیروز فلموں کو بہت پیچھے چھوڑ دیا۔
سپر وومن یا ونڈر وومن کا آئیڈیا سب سے پہلے سنہ 1941 میں سامنے آیا جب ایک امریکی کامک سیریز میں ایک خاتون کو جادوئی اور ماورائی قوتوں کا حامل دکھایا گیا۔
امریکی پرچم سے مشابہہ لباس میں ملبوس اس ونڈر وومن نے نہ صرف اس وقت خواتین کے بارے میں قائم تصورات کو کسی حد تک تبدیل کیا بلکہ اس کی تخلیق خواتین کی خود مختاری کی طرف ایک اہم قدم تھی۔
بعد ازاں ڈی سی کامکس کی فلم ونڈر وومن نے سپر وومن کو ایک نئی شناخت دے دی۔
سنہ 2017 میں ریلیز کی جانے والی ونڈر وومن جنگ عظیم اول کے زمانے کی تھی جس میں ڈیانا (ونڈر وومن) کو اپنی صلاحیتوں کا ادراک ہوتا ہے جس کے بعد وہ دنیا کو بچانے والے افراد کی پہلی صف میں جا کھڑی ہوتی ہے اور اپنی صلاحیتوں سے سب کو دنگ کردیتی ہے۔
اب اگلی فلم سنہ 1984 کے زمانے کی ہے، جہاں دور تو نیا ہے تاہم ونڈر وومن پہلے سے بھی زیادہ مستعد اور حیران کن ہے اور بجلی کی سی تیزی سے اپنی راہ میں آنے والے دشمنوں کو پچھاڑ رہی ہے۔
فلم میں ونڈر وومن کا مرکزی کردار ادا کرنے والی گال گیڈوٹ نے اس بار بھی اس کردار کو بے مثال انداز میں پیش کیا ہے۔
گال گیڈوٹ کا تعلق اسرائیل سے ہونے کی وجہ سے پہلی فلم کو متنازعہ بنانے کی کوشش کرتے ہوئے اس پر کچھ ممالک میں پابندیاں بھی عائد کی گئی تھیں اس کے باوجود فلم نے بزنس میں کئی مشہور فلموں کو پیچھے چھوڑ دیا۔
اب فلم ونڈر وومن 1984 اگلے برس جون 2020 میں ریلیز کی جائے گی۔
لاس اینجلس : ہالی ووڈ کی مزاح سے بھرپور اینی میٹڈ ایڈونچر فلم’’ اگلی ڈولز‘‘ کا نیا ٹر یلرجاری کردیا گیا، فلم تین مئی کو امریکی سنیماؤں پر قہقے بکھیرے گی۔
تفصیلات کے مطابق ہالی ووڈ کی کامیڈی سے بھرپور نئی تھری ڈی اینی میٹڈ فلم ’اگلی ڈولز‘کا نیا ٹریلر جاری کردیا گیا، ڈائریکٹر کیلی ایسبری کی ہدایت کاری میں بننے والی فلم کی کہانی ایسی گڑیاؤں کے گرد گھوم رہی ہے جنہیں کوئی پیار نہیں کرتا ۔
اس کی وجہ یہ ہے کہ نہ تو وہ پرفیکٹ ہوتی ہیں اور نہ خوبصورت اسی لیے وہ ایسے ادارے کا رخ کرتی ہیں جہاں اپنی صلاحیتوں اور خوبصورتی میں نکھار لا سکیں، ان گڑیاؤں کی شرارتیں دیکھنے والوں کو ضرور ہنسنے پر مجبور کر دیں گی۔
اس کامیڈی فلم کیلئے ڈائیلاگ نامور ہالی ووڈ اداکارایما رابرٹ، نک جونز، گیبرئل اگلییسیاس سمیت کئی فنکاروں کی آوازمیں ریکارڈ کئے گئے ہیں، مزاح اور ایڈونچر سے بھرپور یہ فلم تین مئی کو پردہ سیمیں کی زینت بنے گی۔
کراچی : شائقین فلم کے لئے ایک اور خوشخبری آگئی، اے آر وائی کی فلم ’’شیردل‘‘ کا ٹریلر جاری کردیا گیا، پاک فضائیہ کی وطن کی خدمات کو خراج تحسین پیش کرتی فلم شیر دل بائیس مارچ کو سینما گھروں کی زینت بنے گی۔
تفصیلات کے مطابق وطن کے دفاع کرتے پاک فضایہ کی جوانوں، ان کی خدمات، جذبے اور قربانیوں پر مشتمل اے آر وائی کی فلم شیردل ریلیز ہونے کو تیار ہے۔
کراچی کے نجی ہوٹل میں شیر دل کے ٹریلر ریلیز ہونے کی تقریب منعقد کی گئی، اس موقع پر فلم شیردل کے پروڈیوسر اور رائٹر نعمان خان کا کہنا تھا کہ اس فلم کو بنانے میں بہت محنت کی ہے، یقیناً شیر دل شائقین کو بہت پسند آئے گی۔
فلم شیر دل کے ڈائِریکٹر اظفر جعفری اور کو پروڈیوسرنوشیں خان ہیں جبکہ مرکزی کردار میکال ذوالفقار نے ادا کیا ہے، دیگر فنکاروں میں ارمینہ رانا خان، حسن نیازی اور سبیکا امام اور دیگر شامل ہیں۔
تقریباً تین سال کے عرصے میں بننے والی اے آر وائی کی فلم شیر دل کے ٹریلر نے حاضرین کو بہت متاثر کیا۔ ان کا مزید کہنا تھا کہ بائیس مارچ کے دن کا بے چینی سے انتظار ہے جب شائقین شیردل کو سینما گھروں میں جا کر دیکھ سکیں گے۔
ہالی ووڈ کی مشہور فلم فرنچائز فاسٹ اینڈ فیورس کی نئی فلم ’ہوبز اینڈ شا‘ کا ٹریلر پیش کردیا گیا، یہ فلم سیریز کے مرکزی کرداروں کے بجائے 2 علیحدہ کرداروں کے گرد گھومتی ہے۔
سیریز میں ڈوم (ون ڈیزل) اور اس کے ساتھیوں کی مدد کرنے والے پولیس افسر ہوبز (ڈوائن جانسن) اور ان کے دشمن آئن شا (جیسن اسٹیتھم) کو اس نئی فلم میں پیش کیا جارہا ہے۔
گو کہ یہ دونوں ایک دوسرے کے دشمن ہیں تاہم اب ان کو ایک مشترکہ دشمن کا سامنا ہے جس سے لڑنے کے لیے انہیں مجبوراً متحد ہونا پڑتا ہے۔
ادریس البا نامی دشمن نہایت مضبوط، خطرناک اور بلٹ پروف ہے اور اس کے آگے یہ دونوں، جو خود بھی اپنے دشمنوں کو ناکوں چنے چبوا دیتے ہیں، بے بس نظر آتے ہیں چنانچہ ان کے پاس ایک یہی راستہ ہے کہ دونوں مل کر اس دشمن کا مقابلہ کریں۔
اس مقبول سیریز کا تسلسل پیش کرنے کے بجائے ایک نئی فلم کیوں پیش کی جارہی ہے جو ضمنی کرداروں کے گرد گھومتی ہے؟
اس سوال کا جواب دیتے ہوئے نئی فلم کے مصنف کرس مورگن نے برطانوی نشریاتی ادارے کو بتایا کہ سیریز کے آخری حصے میں جب یہ دونوں جیل میں اکٹھے ہوتے ہیں تو ان کے درمیان نہایت متاثر کن کیمسٹری سامنے آئی جسے فلم بینوں نے بے حد پسند کیا۔
مورگن کا کہنا ہے کہ آن اسکرین اور آف اسکرین ان دونوں اداکاروں کی جوڑی نہایت شاندار ہے جو کسی فلم کو ایکشن بنانے کے ساتھ ساتھ پر مزاح بھی بنا سکتی ہے۔
ان کا کہنا تھا کہ چونکہ فلم کی ٹیم اس سیریز کو ہمیشہ سے مزید وسعت دینا چاہتی تھی، اور ان دونوں کرداروں کی کیمسٹری کو بھی بہت پسند کیا گیا، یہی وجہ ہے کہ اس سیریز کی ضمنی فلم پیش کی جارہی ہے۔
خیال رہے کہ فاسٹ اینڈ فیورس فلم فرنچائز کا آغاز سنہ 2001 سے کیا گیا تھا جس کے بعد ہر نیا حصہ پہلے سے بہترین اور مداحوں کو دنگ کردینے والا ہوتا ہے۔
سنہ 2013 میں فلم کے کرداروں میں سے ایک پال واکر کی ناگہانی موت نے نہ صرف دنیا بھر میں ان کے مداحوں بلکہ فلم کی شوٹنگ کو بھی دھچکہ پہنچایا تھا۔ فیورس 7 کی بقیہ شوٹنگ پال واکر کی موت کے بعد ان کے بھائیوں کی مدد سے پوری کی گئی۔
سیریز کی آخری فلم ’فیٹ آف دی فیوریس‘ سنہ 2017 میں پیش کی گئی جس نے دنیا بھر میں 1 ارب 239 کروڑ ڈالر کی کمائی کی۔
سیریز کی تمام فلمیں اب تک 5 ارب ڈالر کا بزنس کر چکی ہیں اور یہ ہالی ووڈ کی سب سے زیادہ کمانے والی آٹھویں فلم سیریز ہے۔
دبنگ خان کی عید الفطر پر ریلیز ہونے والی فلم ریس تھری کا ٹریلر جاری کردیا گیا ہے، ٹریلر نے ریلیز ہوتے ہی سوشل میڈیا پر تہلکہ مچادیا ہے، ٹریلر میں فلم کی تمام کاسٹ ایکشن میں نظر آرہی ہے جس سے خیال کیا جارہا ہے کہ فلم میں بھرپور ایکشن ہوگا۔
تفصیلات کے مطابق فلم ’ریس تھری ‘ میں مرکزی کردار ادا کرنے والے سلمان خان اپنے ٹویٹر اکاؤنٹ سے ریس تھری کا لنک شیئر کرایا جہاں سے یوٹیوب پر اسے دیکھنے والوں کی تعداد دیکھتے ہی دیکھتے لاکھوں میں جا پہنچی، اس وقت ٹریلر کو 7.6 ملین افراد دیکھ چکے ہیں اور یہ تعداد روز بڑھ رہی ہے۔
فلم ’ریس تھری‘ میں سلمان خان اور جیکولین فرنینڈزمرکزی کردار ادا کررہے ہیں جبکہ فلم کی دیگر کاسٹ میں انیل کپور، جیکولین فرننڈس ،ڈیزی شاہ، بوبی دیول، ثاقب سلیم اور پوچا ہیکڈے شامل ہیں۔
اس سے قبل ’ریس‘ سیریز کو دو فلمیں کامیابی کے جھنڈے گاڑ چکی ہیں تاہم ابتدائی دو فلموں میں مرکزی کردار ادا کرنے والے سیف علی خان اس بار فلم کی کاسٹ کا حصہ نہیں ہیں اور ان کی جگہ دبنگ خان مداحوں کے جذبات کو ریس دیتے نظر آئیں گے۔
فلم کا ٹریلر 3 منٹ 31 سیکنڈ پر مشتمل ہے جس کے زیادہ تر دورانیے میں بالی وڈ فلموں میں ایکشن کے کنگ سمجھے جانے والے سلمان خان نمایا ں ہیں جبکہ ساتھ ہی ساتھ فلم کے دیگر کرداروں کو بھی ایکشن سے بھرپورمناظر میں دکھا یا گیا ہے۔ بوبی دیول ایک طویل عرصے بعد کسی بلاک بسٹر فلم میں ایکشن میں نظر آئیں گے۔
گذشتہ سال وہ اپنے والد دھرمندر اور بھائی سنی ڈیول کے ساتھ فلم ’’پوسٹر بوائز‘‘ میں جلوہ گر ہوئے تھے تاہم وہ فلم باکس آفس پر کوئی خاص کامیابی حاصل نہیں کرسکی تھی۔
ریس تھری سے امید کی جارہی ہے کہ یہ سال کی اب تک کی سب سے بڑی فلم ثابت ہوگی۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں
دنیا بھر میں ریپ کیپیٹل کے نام سے جانے جانے والے شہر نئی دہلی میں عورتوں سے زیادتی اور بعد ازاں نااںصافی کی بھیانک تصویر پیش کرتی بالی ووڈ فلم ’ماتر‘ کا ٹریلر جاری کردیا گیا۔ فلم میں روینہ ٹنڈن ایک طویل عرصے بعد نہایت مضبوط کردار میں نظر آرہی ہیں۔
فلم ماتر ایک ایسی ماں کی کہانی ہے جس کی نو عمر بیٹی ٹیا کو اجتماعی زیادتی و تشدد کا نشانہ بنایا جاتا ہے۔ ٹریلر میں نو عمر ٹیا کو نہایت ابتر حالت میں دکھایا گیا ہے جو بعد ازاں مر جاتی ہے۔
ٹریلر کے مطابق ٹیا اور اس کی ماں بھارتی عدلیہ سے انصاف پانے میں ناکام رہتی ہیں جس کے بعد ٹیا کی ماں اپنی بیٹی کا بدلہ لینے کے اٹھ کھڑی ہوتی ہے۔
فلم میں ماں کا کردار ادا کرنے والی روینہ ٹنڈن کی ایک طویل عرصے بعد فلموں میں واپسی ہوئی ہے اور ٹریلر کو دیکھ کر اندازہ ہو رہا ہے کہ وہ اپنے اس جاندار کردار کو نہایت بھرپور اور شاندار انداز سے نبھانے میں کامیاب رہی ہیں۔
فلم میں بھارتی نظام انصاف کی خامیوں کا پردہ چاک کیا گیا ہے کہ کس طرح زیادتی کا شکار لڑکی اور اس کا خاندان اندوہناک واقعے کے بعد دہری ذلت اور اذیت سے گزرتے ہیں، جب پولیس اسٹیشن اور عدالتوں میں انہیں اپنے ہی کردار کی گواہی کی ضرورت پڑ جاتی ہے۔
ٹریلر میں متعدد بار جج اور پولیس اہلکار ماں اور اس کی بیٹی کو ہی اس بھیانک واقعے کا ذمہ دار ٹہراتے نظر آتے ہیں۔
ٹریلر میں دکھایا گیا ہے کہ با اثر ملزمان ٹیا کے باپ کو تشدد کر کے اسے کیس واپس لینے پر مجبور کرتے ہیں جس کے بعد وہ اپنی بیوی سے علیحدگی اختیار کرلیتا ہے، اور اس کے بعد روینہ اکیلی اپنی بیٹی کو انصاف دلانے کی جنگ لڑتی ہیں۔
واضح رہے کہ بھارتی کرائم ریکارڈ بیورو کے مطابق بھارت میں اس وقت خواتین سے زیادتی چوتھا بڑا اور عام جرم بن چکا ہے۔
اعداد و شمار کے مطابق سنہ 2013 میں لگ بھگ 25 ہزار خواتین کو زیادتی کا نشانہ بنایا گیا۔
کراچی : اے آر وائی فلمز اور سکس سگما کی مشترکہ پیشکش فلم جوانی پھر نہیں آنی کا ٹریلرریلیز کردیاگیا۔
تفصیلات کے مطابق ایکشن، ڈرامہ، مستی اور رومانس کا تڑکا لئے مووی لورز کے لئے آرہی ہے، اے آر وائی اور سکس سگما کی پیشکش فلم جوانی پھر نہیں آنی کا ٹریلرریلیز کردیاگیاہے۔
فلم کے ٹریلر نے ریلیز ہوتے ہی دھوم مچادی، فلم میں ہمایوں سعید ، حمزہ علی عباسی، واسع چوہدری،جاوید شیخ ،عائشہ خان اور مہوش حیات سمیت کئی جانے مانےچہرے اداکاری کے جوہر دکھا رہے ہیں ۔
ندیم بیگ کی ڈائریکشن میں بننے والی فلم کے پروڈیوسرز میں سلمان اقبال، جرجیس سیجا ، شہزاد ناسب اور ہمایوں سعید بھی شامل ہیں۔
فلم اے آر وآئی میڈ ان پاکستان کمپین کے تحت عید الاضحیٰ پر پاکستان سمیت امریکا، انگلینڈ، انڈیا، افریقہ اور آسٹریلیا میں ریلیز کی جائیگی۔
گزشتہ کئی سال سے سب سے زیادہ انتظار کی جانے والی فلم بیٹ مین ورسزسپرمین ڈان آف جسٹس کا ٹریلرجاری کردیا گیا ہے۔
بیٹ مین ورسز سپرمین ڈان آف جسٹس کا ٹریلر کومک کون نامی کامک میلے میں جاری کیا گیا۔
یہ فلم کامک دنیا کے تین مشہور سپر ہیروز بیٹ مین ، سپرمین اور ونڈرویمن کے گرد گھومتی ہے اور اس سے زیادہ دلچسپ بات یہ ہے کہ مارول کامکس کے دونون سب سے بڑے ہیرو یعنی بیٹ مین اور سپرمین آپس میں دست و گریباں نظر آئیں گے۔
ٹریلر میں پہلی بار آشکار کیا کہ آخربیٹ مین اورسپرمین کے درمیان تنازعے کا سبب کیا ہے؟۔
اس فلم کا اعلان 2013 میں کیا گیا تھا، اس کی مرکزی کاسٹ میں بین ایفلک ( بیٹ مین)، ہنری کیول ( سپرمین)،اورڈائنا پرنس (ونڈر ویمن کے روپ میں جلوہ گر ہوں گے۔ فلم کے ہدایت کار زیک سنائڈر ہیں۔
بیٹ مین ورسز سپرمین ڈان آف جسٹس آئندہ سال 2016 میںریلیز ہوگی اسے اس دہائی کی سب سے زیادہ انتظارکی جانے والے فلم کہا اور سمجھا جارہا ہے۔
ٹریلر کے ریلیز ہوتےہی مداحوں کا ہجوم ٹویٹر پر امڈ آیاہے جس نے اپنے جذبات کا اظہار کیا ہے۔
