Tag: train accident

کراچی: رن پٹھانی کے مقام پر خوفناک ٹرین حادثہ میں ایک شخص جاں بحق ہوگیا، تفصیلات کے مطابق کراچی سے لاہور جانے والی بزنس ٹرین رن پٹھانی کے مقام پر مین لائن پر کھڑی مال گاڑی سے جا ٹکرائی ، جس کے نتیجے میں ٹرین کا اسسٹنٹ ڈرائیور جاں بحق ہو گیا ۔

کراچی سے بروقت روانہ ہونے والی بزنس ٹرین نے ابھی سفر شروع کیا ہی تھا کہ اسے حادثہ پیش آگیا،کراچی چھاؤنی جنکشن سے روانہ ہونے والی بزنس ٹرین کو تمام سگنل کھلے ملتے گئے اور اس نے اسپیڈ پکڑ لی لیکن کسے خبر تھی کہ رن پٹھانی پر سگنل کی منتظر مال گاڑی اس کا راستہ روک لے گی ۔

بزنس ٹرین کے ڈرائیور نے مال گاڑی دیکھ کر ٹرین کو روکنے کی کوشش کی لیکن ناکام رہا اور بزنس ٹرین سامنے کھڑی مال گاڑی سے جا ٹکرائی،جی ایم ریلویز کا کہنا ہے کہ ٹرین کی چھ بوگیاں پٹری سے اتر گئیں ، لیکن خوش قسمتی سے کسی مسافر کی جان ضائع نہیں ہوئی.

انکا کہنا تھا کہ دونوں ٹرینوں کے ایک ٹریک پرآنے کی تحقیقات شرو ع کر دی گئی ہیں ۔حادثہ کی اطلاع ملتے ہی امدادی ٹرین رن پٹھانی روانہ کر دی گئی ، جبکہ ٹرین کے مسافروں کو کراچی اور حیدر آباد روانہ کر دیا گیا۔

حادثےکےباعث کراچی سےاندرون ملک ٹرینوں کی آمدودرفت معطل ہو گئی اور قراقرم ایکسپریس کوبن قاسم ریلوے اسٹیشن پر روک لیا گیا ، جبکہ کراچی سے روانہ ہونے والی ،ملت ایکسپریس ۔کراچی ایکسپریس ،شالیمار،تیزگام اورنائٹ کوچ کی کینٹ اسٹیشن سے روانگی موخر کر دی گئی ۔

وفاقی وزیرریلوے خواجہ سعد رفیق نے حادثہ کی رپورٹ چوبیس گھنٹے میں طلب کر لی ہے۔