بھارت میں خاتون ریلوے ٹریک عبور کرنے کے دوران نو ماہ کے بچے سمیت پٹری پر گر پڑی، اسی وقت تیز رفتار ٹرین وہاں آگئی لیکن دونوں کی زندگی محفوظ رہی۔
کبھی کبھی ہماری اطراف میں ایسے واقعات پیش آتے ہیں جنہیں سن کر یقین نہیں آتا لیکن جب یہ واقعات ہماری آنکھوں کے سامنے ہوں تو عقل حیران ہوجاتی ہے۔
ایسا ہی کچھ ہوا بھارتی ریاست تامل ناڈو کے علاقے کٹپاڈی میں جہاں ایک خاتون اپنے 9ماہ بچے سمیت ریلوے ٹریک عبور کرتے ہوئے گرپڑی اور اسی وقت وہاں ایک ٹرین آگئی۔
37 سالہ یوارانی نے اپنے 9 ماہ کے بچے کو گود میں اٹھائے ریلوے ٹریک عبور کرکے دوسری طرف جانے کی کوشش کی اسی دوران غیرمتوقع طور پر وہ پھسل کر پٹریوں پر گر گئی۔
اچانک یہ دیکھ کر اس کے اوسان خطا ہوگئے کہ ایک تیز رفتار ٹرین اسی ٹریک پر آرہی ہے۔
اس موقع پر ماں نے کمال پھرتی کا مظاہرہ کرتے ہوئے خود کو بچے سمیت ٹریک کے بالکل وسط میں کرلیا۔
حادثے کی اطلاع ملنے پر ریلوے حکام نے فوری طور پر ارناکولم ایکسپریس کو روک دیا اور خاتون اور بچے کو ریسکیو کیا۔
ریلوے حکام نے مسافروں کے ساتھ مل کر خاتون اور بچے کو ٹرین کے نیچے سے نکالا تو بچی تو محفوظ تھی تاہم اسکی ماں یوارانی کو سر میں چوٹ آئی تھی۔
ریلوے حکام کا کہنا ہے کہ حادثے کے بعد خاتون سکتے جیسی کیفیت میں ہے۔
خاتون اور بچے کو ریسکیو کرنے کے بعد طبی امداد کے لیے ویلور اسپتال منتقل کردیا گیا۔
