آنکھوں کے نیچے پڑنے والے سیاہ حلقے خواتین کی خوبصورتی کو ماند کردیتے ہیں، یہی وجہ ہے کہ خواتین آنکھوں کی دلکشی اور خوبصورتی بڑھانے پر زیادہ توجہ دیتی ہیں۔
آنکھیں انسان کی روح کی عکاس ہوتی ہیں، جو زندگی کو مؤثر انداز میں منعکس کرنے کی صلاحیت رکھتی ہیں، کسی کی بھی پہلی نظر آپ کی آنکھوں کا ہی جائزہ لیتی ہے۔
آج کے دور میں روز مرہ کی مصروفیات، ذہنی و جسمانی صحت، غذائی عادات اور رہن سہن میں پہلے کی نسبت کافی حد تک نمایاں تبدیلی پیدا ہوگئی ہے، مصروفیت کے اس دور میں اب انسان اپنی ظاہری خوبصورتی اور دلکشی سے بھی غافل ہو گیا ہے۔
آنکھوں کے گرد سیاہ حلقوں کا اہم اور نمایاں سبب غیر متوازن غذاؤں کا کھانا بھی ہے، خواتین میں حمل اور ایام کے دوران بھی یہ حلقے واضح اور نمایاں نظر آنے لگتے ہیں۔
علاوہ ازیں ہارمونز کی تبدیلی کے عمل اور جلد کی رنگت سے بھی یہ حلقے نمودار ہو سکتے ہیں، گندمی اور سانولی جلد کی نسبت سفید رنگت والے افراد میں ان حلقوں کے نمودار ہونے کے امکانات زیادہ ہوتے ہیں۔
سورج کی تمازت یا دھوپ میں زیادہ دیر تک کام کرنے والے افراد بھی سیاہ حلقوں کا شکار ہوجاتے ہیں،اس لئے کہ اس کی وجہ سے ان کی جلد کی رنگت متاثر ہوتی ہے۔
مکمل اور بھرپور نیند نہ لینے والے افراد کی آنکھوں کے گرد حلقے نمودار ہو جاتے ہیں اور نیند کی کمی آنکھوں کے نچلے حصے میں موجود رگوں کو زیادہ سیاہ اور نمایاں کر دیتی ہے اور بہت زیادہ تھکاوٹ سے بھی آنکھیں فوری متاثر ہوتی ہیں, مناسب آرام نہ لینے سے آنکھوں کے گرد جلد زرد اور بے رونق نظر آتی ہے۔
یہی وجہ ہے کہ کم عمر لڑکیوں میں آنکھوں کی خوبصورتی برقرار رکھنے سے متعلق مسائل منظر عام پر آرہے ہیں جن میں آنکھوں کے گرد نمودار ہونے والے سیاہ حلقے سر فہرست ہیں لیکن چند گھریلو ٹوٹکوں سے ان حلقوں سے نجات حاصل کی جاسکتی ہے۔
بادام کا تیل
بادام کا تیل سیاہ حلقوں کو دور کرنے میں اہم کردار ادا کرتا ہے، رات کو سونے سے پہلے بادام کے تیل سے آنکھوں کے نیچے ہلکا ہلکا مساج کریں اور سو جائیں، بادام روغن سیاہی دور کرتا ہے، ملائمت اور نرمی لاتا ہے۔
کھیرا
کھیرے کے سلائس کرکے فریج یا فریزر میں رکھ دیں اور پھر انکو آنکھوں پر اچھی طرح جما کر رکھ لیں۔ کھیرے سے آنکھوں کو ٹھنڈک ملے گی اور اس سے نکلنے والا رس آنکھوں کی جلد کو سکون فراہم کرے گا۔ ہفتے میں دو تین بار یہ عمل کرنے سے بہت جلد سیاہ حلقے نہ صرف صاف ہونا شروع ہو جائیں گے۔
آلو
آلوؤں کو چھیل کر ان کا جوس نکال لیں پھر اس جوس میں روئی کے ٹکڑے کو بھگو کر آنکھوں کے نیچے رکھ دیں اور اس بات کو یقینی بنالیں کہ تمام سیاہ حصہ روئی سے ڈھکا ہوا ہو بعد میں ٹھنڈے پانی سے اسے صاف کرلیں۔
عرقِ گلاب
عرق گلاب جلد اور انکھوں کے گرد سیاہ حلقوں کو دور کرنے میں اہم ہے، روئی کے ٹکڑوں کو کچھ دیر کیلئے عرقِ گلاب میں بھگودیں پھر ان کو انکھوں پر رکھ کر 15 سے 20 منٹ کیلئے چھوڑ دیں،اچھے نتائج حاصل کرنے کیلئے دن میں 2 بار اس عمل کو دہرائیں۔
ٹماٹراور لیموں
ٹماٹراور لیموں میں بلیچنگ خصوصیات پائی جاتی ہیں، جو سیاہ حلقوں سے نجات حاصل کرنے کا بہترین ذریعہ ہے ، یہ نہ صرف حلقوں کو ختم کرتا ہے بلکہ آپ کی جلد کو ملائم اور چکمدار بھی بناتا ہے۔
ایک چمچہ ٹماٹر جوس کو ایک چمچہ لیموں کے جوس میں ملاکر آنکھوں کے نیچے لگالیں اور اسے 10 منٹ تک لگے رہنے دیں بعد میں اسے پانی سے صاف کرلیں۔
