لاہور: وائس چانسلر پنجاب یونیورسٹی پروفیسر نیاز احمد نے کہا کہ کائنات اور زندگی کا مستقبل درختوں سے وابستہ ہے۔
تفصیلات کے مطابق وائس چانسلر پنجاب یونیورسٹی پروفیسر نیاز احمد نے نیو کیمپس میں اکیڈیمک اسٹاف ایسوسی ایشن کے زیر اہتمام درخت اپناؤ مہم کا آغاز کر دیا۔
اس موقع پر پر پروفیسر ڈاکٹر سلیم مظہر، صدر آسا پروفیسر ڈاکٹر ممتاز انور چوہدری، سیکرٹری جاوید سمیع، اقامتی آفیسر دوئم ملک محمد ظہیر، فیکلٹی ممبران اور ان کی فیمیلیز موجود تھیں۔
تقریب سے خطاب کرتے ہوئے پروفیسر نیاز احمد نے کہا کہ کائنات اور زندگی کا مستقبل درختوں سے وابستہ ہے۔ انہوں نے کہا کہ درخت ماحولیاتی آلودگی کا خاتمہ کرنے میں اہم کردار ادا کرتے ہیں۔
انہوں نے کہا کہ درخت فضاء میں موجود کاربن ڈائی آکسائیڈ کو جذب کرتے ہیں اور آکسیجن خارج کرتے ہیں جو کہ ہماری زندگی کے لیے لازمی جزو ہے۔
وائس چانسلر پنجاب یونیورسٹی نے کہا کہ اگر فوری طور پر درخت نہیں لگائے جائیں گے تو ماحول کا توازن خطرناک حد تک بگڑ جائے گا جو کہ سیارہ زمین کے لیے تباہ کن ثابت ہو گا۔
تقریب سے خطاب کرتے ہوئے صدر آسا پروفیسر ڈاکٹر ممتاز انوار چوہدری نے کہا کہ درخت لگانا اور اسے اپنانا ہر پاکستانی خاندان کا فرض ہے۔
انہوں نے کہا کہ پنجاب یونیورسٹی اکیڈیمک اسٹاف ایسوسی ایشن نے درخت اپناؤ مہم کا آغاز کیا ہے تا کہ عوام میں درختوں کو لگانے ، انہیں اپنانے اور زندگی کے لیے ان کے کردار سے متعلق شعور اجاگر کیا جا سکے۔
پروفیسر ڈاکٹر ممتاز انوار چوہدری نے کہا کہ اگر ہمیں آئندہ آنے والی نسلوں کو صاف ماحول دینا ہے اور انہیں صحت مند زندگی دینی ہے تو ہمیں اربوں درخت لگانے ہوں گے۔
قبل ازیں وائس چانسلر ڈاکٹر نیاز احمد نے پودا لگا کر شجر کاری مہم کا افتتاح کیا اس موقع پر اساتذہ اور ان کے خاندانوں نے بڑی تعداد میں درخت لگائے۔
