گوجرانوالہ : پاکستان مسلم لیگ نواز کی سینئرنائب صدر مریم نواز نے گوجرانوالہ میں منعقدہ ورکرز کنونشن سے خطاب میں فواد چوہدری کی مبینہ آڈیو لیک کو تنقید کا نشانہ بناتے ہوئے عمران خان کے طرز سیاست پر بھی کڑی نکتہ چینی کی، اس موقع پر انہوں نے ایک کھلونا ٹرک بھی ہاتھ میں اٹھا رکھا تھا۔
یاد رہے کہ پی ٹی آئی رہنما فواد چوہدری کی سامنے آنے والی حالیہ مبینہ آڈیو لیک جس میں وہ اپنے بھائی فیصل چوہدری سے گفتگو کررہے ہیں دوران گفتگو وہ عطاء تارڑ کو سزا دلوانے کی بات کررہے ہیں۔ اسی گفتگو میں ایک ٹرک کا ذکر بھی کیا گیا ہے جس کا ذکر طنزیہ انداز میں مریم نواز نے اپنے خطاب میں کیا۔
مریم نواز نے فواد چوہدری کی مبینہ آڈیو لیک پر تنقید کرتے ہوئے کہا کہ "اب یہ نہ کہہ دینا جو ٹرک عدالت کے آگے کھڑا کردیا وہ مریم نواز چلارہی تھی”۔ گوجرانوالہ میں نون لیگ کے ورکرز کنونشن سے خطاب میں انہوں نے عوام کو مخاطب کرتے ہوئے کہا کہ "گوجرانوالہ والوں! کیا بات ہے آج بھی آپ ٹرک بھر کرلائے ہو”۔
چیئرمین پی ٹی آئی عمران خان پر تنقید کرتے ہوئے مریم نواز کا کہنا تھا کہ پاکستان کے سب سے بڑے فتنے اور فراڈ کو سب سے پہلے گوجرانوالہ نے پہچانا تھا۔ ان کا کہنا تھا کہ ان کو بڑی تکلیف ہوتی ہے کہ مریم نے یہ کہہ دیا وہ کہہ دیا، آپ لوگوں نے فواد چوہدری، پرویزالہٰی اور یاسمین راشد کی آڈیوز سن رکھی ہیں نا!! ہم اس ٹرک کے چاروں ٹائر پنکچر کرکے اس کو گھر بھیجیں گے، مجھے اب کچھ کہنے کی ضرورت نہیں، اب جہاں جہاں ٹرک دیکھو گے آپ خود سمجھ جاؤ گے۔
مریم نواز نے اپنے خطاب میں عدالتوں کو بھی تنقید کا نشانہ بنایا، انہوں نے کہا کہ نوازشریف بے گناہ ہوتے ہوئے بھی جھوٹے مقدمات میں عدالتوں میں پیش ہوتا تھا، میں اپنے باپ کا ہاتھ پکڑ کر ہفتے میں5بار پیش ہوتی تھی۔
"آئینہ دکھاتی ہوں تو توہین عدالت یاد آتی ہے”
ن لیگ کی رہنما نے کہا کہ "میں جب آئینہ دکھاتی ہوں تو ان کو توہین عدالت یاد آجاتی ہے، توہین عدالت اس وقت یاد کیوں نہیں آتی جب نوازشریف کو تنخواہ نہ لینے پر نکالا جاتا ہے، توہین عدالت تب ہوتی ہے جب ہر الیکشن فارم میں جھوٹ بولتے ہو، اپنی جائیداد چھپاتے ہو، اپنی بیٹی بھی چھپاتے ہو، نواز شریف کی بیٹی گوجرانوالہ کے سامنے کھڑی ہے، تمہاری بیٹی کہاں کھڑی ہے؟ اسی جھوٹ کے ساتھ تم نے چار بار الیکشن لڑے”۔
انہوں نے عمران خان کا نام لیے بغیر کہا کہ یہ لوگ نوازشریف اور اس کی بیوی کی بیماری کا مذاق اڑاتے تھے، قدرت کا انتقام دیکھو آج اسے عدالت بلاتی ہے تو وہ پلاسٹر والی ٹانگ دکھاتا ہے، پانچ ماہ ہوگئے اس کا پلستر اترنے کا نام نہیں لے رہا۔
مریم نواز کا کہنا تھا کہ "میں عمران خان کے سہولت کاروں سے پوچھنا چاہتی ہوں کہ کیوں ایسے شخص کو بچانا چاہتے ہو جس کی سیاسی کشتی گہرے پانیوں میں ڈوب چکی ہے، عمران خان اپنے انجام کو پہنچ چکا ہے، وہ تو ڈوب گیا ہے اور تمہیں بھی لے ڈوبے گا”۔
مزید پڑھیں : پی ٹی آئی رہنما فواد چوہدری کی بھی آڈیو سامنے آگئی
تحریک انصاف کی جیل بھرو تحریک پر طنز کرتے ہوئے مریم نواز نے کہا کہ جیل بھرو تحریک گزشتہ روز آہو اور سسکیوں کے ساتھ اپنے اختتام کو پہنچی، عمران خان کہتا ہے کہ جیل بھرو تحریک معطل کردی جبکہ وہ تو ابھی شروع ہی نہیں ہوئی تھی جب لیڈرگیدڑ بن کر گھر بیٹھا ہو تو کارکنان کو کیا پڑی ہے جو جیلیں بھریں۔ پہلے بھی لانگ مارچ کرکے کارکنان کو کہتا تھا کہ تم نکلو اور خود ہیلی کاپٹر میں بیٹھا رہتا تھا۔
جیو گجرانوالہ ♥️🙌 pic.twitter.com/YBOz1iJRyA
— Maryam Nawaz Sharif (@MaryamNSharif) March 3, 2023
زمان پارک نہیں ضمانت پارک
انہوں نے کہا کہ جس شخص کو بچایا جارہا ہےاس کی سیاست کو دیکھیں، حکومت سے نکالا گیا تو کہتا ہے دیکھو امریکا سے سائفر آگیا، اب خود امریکا کے پاؤں میں گر کر اس سے معافیاں مانگ رہا ہے، کل وہ "ضمانت پارک” میں بیٹھ کر امریکیوں سے میٹنگ کررہاتھا۔ ہماری حکومت کو امپورٹڈ کہتا تھا آج اسی امپورٹڈ کے ساتھ بیٹھ کر بےنقاب ہورہا ہے۔
مریم نواز کا فواد چوہدری کی مبینہ آڈیو پر طنزیہ ٹوئٹ
ان کا کہنا تھا کہ جس اسمبلی سے خود نکلا اب اس میں جانے کیلئے سب کی منتیں کررہا ہے، تم ہمیں کہتے ہو کہ الیکشن سے ڈرتے ہیں اور خود چوہے کی طرح بل میں چھپے بیٹھے ہو، اپنا انتخابی نشان چھوڑ کر ٹرک رکھ لو۔
مریم نواز نے خطاب میں کارکنان کے حوصلے بلند کرتے ہوئے کہا کہ جب بھی عام انتخابات ہوں گے گوجرانوالہ ڈویژن اور ن لیگ تیار بالکل ہے، ن لیگ واحد جماعت ہے جو الیکشن کیلئے میدان میں جیتنے کیلئے اترچکی ہے۔
انہوں نے ورکرز کنونشن میں بڑی تعداد میں شرکت کرنے پر گوجرانوالہ کے کارکنوں کا شکریہ ادا کرتے ہوئے کہا کہ اگر کسی کو شک ہے کہ مسلم لیگ ن نوجوانوں میں مقبول نہیں ہے تو وہ آکر یہ بڑا جلسہ دیکھ سکتا ہے۔
