واشنگٹن (07 اگست 2025): وائٹ ہاؤس نے صدر ٹرمپ اور پیوٹن کی متوقع ملاقات کی تصدیق کر دی۔
امریکی میڈیا کے مطابق صدر ڈونلڈ ٹرمپ کی روسی صدر ولادیمیر پیوٹن سے آئندہ ہفتے ملاقات متوقع ہے، وائٹ ہاؤس کے سینئر اہلکار نے بھی اس ملاقات کی تصدیق کر دی ہے۔
صدر ٹرمپ کے خصوصی ایلچی اسٹیو وٹکوف روسی صدر پیوٹن سے گزشتہ روز ملاقات کے بعد واشنگٹن واپس پہنچ گئے ہیں، انھوں نے میڈیا سے گفتگو میں کہا روسی صدر امریکی صدر سے ملنا چاہتے ہیں۔
امریکی میڈیا کے مطابق صدر ٹرمپ نے روسی ہم منصب سے ملاقات کے لیے رضا مندی ظاہر کر دی ہے، تاہم وہ اس شرط پر پیوٹن سے ملاقات کریں گے کہ وہ زیلنسکی سے بھی ملیں۔
ٹرمپ کا روس سے تیل خریدنے والے ممالک پر پابندیاں لگانے کا اعلان
امریکی صدر ڈونلڈ ٹرمپ نے اوول آفس میں وٹکوف کی ملاقات کے حوالے سے میڈیا سے گفتگو کے دوران کہا کہ روسی صدر کے ساتھ بہت اچھی بات چیت ہوئی ہے، تاہم آج کی ملاقات کو بڑا بریک تھرو نہیں کہوں گا، انھوں نے کہا جوبائیڈن نے یوکرین جنگ شروع کی تھی اور یوکرین میں اب بھی اموات ہو رہی ہیں۔
ٹرمپ کا یہ بھی کہنا تھا کہ روس پر ٹیرف کا تعین بعد میں کریں گے، چین پر ٹیرف کا اعلان کر سکتے ہیں، اور ایران نے دوبارہ جوہری پروگرام شروع کیا تو اس پر پھر حملہ کر دیں گے۔
