کراچی : سوشل میڈیا پر پاکستانی نوجوان سے دوستی کے بعد شادی کیلیے تیونس سے پاکستان آنے والی لڑکی سفارت خانے کے حوالے کردی گئی۔
اے آر وائی نیوز کی رپورٹ کے مطابق ویمن تھانہ لیاقت آباد میں پناہ لینے والی تیونس کی 19 سالہ سندا ایاری سفارت خانے کے حوالے کردی گئی۔
اس حوالے سے ایس ایچ او عظمیٰ خان نے میڈیا کو بتایا کہ سفارت خانے کے دو ملازمین ویمن پولیس اسٹیشن سے لڑکی کو اپنے ساتھ لے گئے ہیں۔
پولیس کے مطابق سندا ایاری سوشل میڈیا پر لیاری کے عامر نامی نوجوان سے دوستی کے بعد شادی کیلیے گزشتہ سال نومبر میں تیونس سے کراچی پہنچی تھی۔
سندا نے 29 نومبر کو لیاری کے نوجوان عامر سے محبت کی شادی کی، میاں بیوی کے درمیان جھگڑے کے بعد عامر نے 7 ماہ بعد اسے طلاق دے دی اور ایک ریسٹورنٹ پر چھوڑ کر چلا گیا۔
بعد ازاں 19 سالہ سندا ایاری ویمن تھانہ لیاقت آباد پہنچی جس کے بعد تیونس کے سفارت خانے کے عہدیدار نے ایس ایچ او عظمیٰ خان سے رابطہ کیا۔
ایڈیشنل آئی جی کی ہدایت پر لڑکی کو سفارت خانے کے عملے کے حوالے کردیا گیا، سندا ایاری اسلام آباد میں سفارت خانے کے اعلیٰ حکام سے ملاقات کرے گی، سفارت خانے کی جانب سے سندا کو واپس تیونس بھجوایا جائے گا۔
ایس ایچ او کے مطابق تیونس کے سفارتخانے نے سندا ایاری کی وطن واپسی کی مکمل ذمہ داری اٹھالی ہے اور اس کے ایگزٹ پرمٹ اور واپسی کے ٹکٹ کا بندوبست بھی تیونس سفارتخانہ کرے گا۔
