کراچی: تربت انٹرنیشنل ایئرپورٹ کے حوالے سے خبر ہے کہ تازہ ترین اپ گریڈیشن کے بعد ہوائی اڈے پر اب بڑے جہاز بھی اتر سکیں گے۔
تفصیلات کے مطابق سول ایوی ایشن اتھارٹی نے تربت ایئرپورٹ کو اپ گریڈ کر دیا ہے، اور اب ایئر پورٹ پر بڑے جہاز لینڈ ہو سکیں گے۔
سی اے اے کا کہنا ہے کہ تربت ایئرپورٹ کو اب گریڈ کر کے ایروڈروم ریفرنس کیٹیگری 3C کر دیا گیا ہے، جس کی وجہ سے ایئر بس 320 اور بوئنگ 737 جہاز بھی لینڈ ہو سکیں گے، اس سے قبل تربت ایئرپورٹ پر اے ٹی آر اور دیگر چھوٹے طیارے لینڈ کرتے تھے۔
ذرائع کا کہنا ہے کہ اپ گریڈ ہونے کے بعد اب تربت ایئر پورٹ پر غیر ملکی ایئر لائنز کی پروازیں بھی شروع ہونے کا امکان ہے، سی اے اے نے تربت ایئرپورٹ کو اپ گریڈ کے جانے سے متعلق نوٹم جاری کر کے تمام ایئر لائنز کو آگاہ کر دیا ہے۔
