Tag: turkey

  • اختلافات کے باوجود سعودی عرب کو جرمن اسلحے کی فروخت میں اضافہ ہوا

    اختلافات کے باوجود سعودی عرب کو جرمن اسلحے کی فروخت میں اضافہ ہوا

    برلن: سعودی عرب اور جرمنی کے درمیان اختلافات کے باوجود سعودی عرب نے جرمن اسلحے کی ریکارڈ خریداری کی۔

    تفصیلات کے مطابق پچھلے سال کے مقابلے میں سعودی عرب نے اس سال جرمنی سے زیادہ اسلحہ خریدا، جرمن اسلحے کی خریداری میں ترکی بھی شامل ہے۔

    غیر ملکی خبر رساں ادارے کے مطابق جرمنی میں داخلی سطح پر سخت مخالفت کے باوجود سعودی عرب اور ترکی کو جرمن اسحلے کی فروخت ميں گزشتہ برس اضافہ ہوا ہے۔

    جرمن حکام کا کہنا ہے کہ سال 2018ء کے دوران جرمن کمپنيوں نے سعودی عرب کو 160 ملین یورو کا اسلحہ فروخت کیا، جو سال 2017ء کے مقابلے 50 ملین یورو زائد ہے۔

    واضح رہے کہ سعودی صحافی خاشقجی کے قتل کے بعد جرمنی اور سعودی عرب کے درمیان شدید اختلافات ہوئے تھے، بعد ازاں برلن حکومت نے سعودی عرب کو اسلحے کی فروخت پر مکمل پابندی عائد کر دی تھی۔

    علاوہ ازیں سعودی عرب پر یہ بھی الزام ہے کہ وہ یمن جنگ میں بھی اسلحے کو استعمال کرتا ہے، یمن میں جاری اس جنگ کے سبب سعودی عرب کو عالمی سطح پر بھی دباؤ کا سامنا ہے۔

    خیال رہے کہ گذشتہ سال نومبر میں یمن میں حوثی باغیوں کی جانب سے جنگ بندی کے اعلان کے باوجود سعودی عسکری اتحاد کے فضائی حملے میں 10 عام شہری ہلاک ہوگئے تھے۔

  • دنیا کا سب سے بڑا بکلاوا

    دنیا کا سب سے بڑا بکلاوا

    ترکی میں دنیا کا سب سے بڑا بکلاوا بنا کر ترک شیفس نے اپنا نام گنیز بک آف ورلڈ ریکارڈز میں درج کروا لیا۔

    بکلاوا مشرق وسطیٰ اور ترکی میں کھائی جانے والی مشہور مٹھائی ہے۔ تہہ در تہہ بنائی جانے والی اس مٹھائی کو شہد کے ساتھ کھایا جاتا ہے۔

    ترکی کے شہر انقرہ میں بنائی جانے والی اس مٹھائی کا وزن 700 پاؤنڈز تھا۔ اسے بنانے کے لیے 330 پاؤنڈز مکھن اور 175 پاؤنڈز اخروٹ استعمال ہوئے۔

    جس ٹرے میں اسے بیک کیا گیا وہ 8 فٹ چوڑی اور 25 فٹ طویل تھی۔

    بکلاوے کو 14 شیفس نے 5 گھنٹوں میں تیار کیا اور اسے انقرہ میں ہونے والے ایک سمٹ میں پیش کیا گیا۔

    اس مزیدار مٹھائی کے اصل خطے کے بارے میں متضاد آرا پائی جاتی ہیں۔ یونان اور ترکی دونوں ہی اسے اپنی سوغات مانتے ہیں۔

    جانیں بکلاوا بنانے کی ترکیب

  • شام کی صورت حال، ترکی اور روسی صدور کے درمیان اہم ملاقات متوقع

    شام کی صورت حال، ترکی اور روسی صدور کے درمیان اہم ملاقات متوقع

    انقرہ: شام کی موجودہ صورت حال سے متعلق ترک صدر رجب طیب اردوان کی روسی ہم منصب ولادی میرپیوٹن سے جلد اہم ملاقات متوقع ہے۔

    تفصیلات کے مطابق روسی صدر ولادی میرپیوٹن اور ترک ہم منصب رجب طیب اردوان کے رمیان اہم ملاقات جلد متوقع ہے جس میں شام میں چیلنچز سے نمٹنے کے لیے لائحہ عمل ترتیب دیا جائے گا۔

    غیر ملکی خبر رساں ادارے کے مطابق اس اہم ملاقات میں امریکی صدر ڈونلڈ ٹرمپ کے شام سے اپنی فوج کے انخلا کے بیان پر بھی تبادلہ خیال کیا جائے گا۔

    داعش کے بڑھتے ہوئے دہشت گرد حملوں کی روک تھام اور گروہ کے خاتمے کے لیے بھی بھرپور لائحہ عمل پر گفتگو ہوگی، عالمی منظرنامے پر اس ملاقات کو اہم تصور کیا جارہا ہے۔

    شام کیمیائی ہتھیاروں کے استعمال سے گریز کرے، امریکا نے خبردار کردیا

    خبر رساں ادارے کا کہنا تھا کہ شامی خانہ جنگی کے دو اہم فریق ان ممالک کے صدور نے حال ہی میں جی ٹوئنٹی اجلاس کے حاشیے میں ملاقات کی تھی۔

    دوسری جانب امریکا کے قومی سلامتی کے مشیر جان بولٹن نے شامی حکومت کو خبردار کیا ہے کہ وہ اپنے ملک سے امریکی فوجیوں کے انخلا کے بعد کیمیائی ہتھیاروں کے استعمال سے گریز کرے۔

    خیال رہے کہ گذشتہ روز ان کا کہنا تھا کہ اگر شام میں کیمیائی ہتھیاروں کا استعمال کیا جاتا ہے تو جس طرح ہم پہلے دو مرتبہ سخت ردعمل کا اظہار کرچکے ہیں تو ایک بار پھر ایسا ہی کریں گے۔

  • بھارتی قیادت کے غیرذمہ دارانہ بیانات سے خطے کا امن متاثر ہوسکتا ہے: شاہ محمود قریشی

    بھارتی قیادت کے غیرذمہ دارانہ بیانات سے خطے کا امن متاثر ہوسکتا ہے: شاہ محمود قریشی

    اسلام آباد: وزیر خارجہ شاہ محمود قریشی نے کہا ہے کہ بھارت نے کوئی جارحانہ کارروائی کی، تو جواب دینےکی اہلیت رکھتے ہیں۔

    ان خیالات کا اظہار انھوں نے میڈیا سے گفتگو کرتے ہوئے کیا. اس موقع پر انھوں نے وزیر اعظم کے دورہ ترکی پر روشنی ڈالی۔ 

    [bs-quote quote=” افغانستان میں امن کے لئے پاکستان، ترکی اور افغانستان مل کر کام کریں گے” style=”style-7″ align=”left” author_name=”شاہ محمود قریشی”][/bs-quote]

    شاہ محمود قریشی نے کہا کہ ترکی کے ساتھ 5 سال کے لئے جوائنٹ معاشی فریم ورک تیار کیا گیا ہے، دونوں‌ ممالک میں معاشی تعلقات کےفروغ پر اتفاق ہوا ہے، افغانستان میں امن کے لئے پاکستان، ترکی اور افغانستان مل کر کام کریں گے، سہہ فریقی سمٹ کی میزبانی ترکی کرے گا.

    ان کا کہنا تھا کہ وزیراعظم عمران خان اور ترک صدرکی ون آن ون ملاقات دو گھنٹے سے زائد جاری رہی، دورہ مفید اور کامیاب رہا، امید ہے، ترک صدرجلد پاکستان کا دورہ کریں گے اور ترک سرمایہ کاروں کو بھی ساتھ لائیں گے.


    مزید پڑھیں: ترکی پاکستان کا بہت قریبی ساتھی اور پراعتماد دوست ہے: شاہ محمودقریشی


    وزیر خارجہ نے کہا کہ بھارت کی جانب سے حالیہ بیانات غیرذمہ دارانہ ہیں، بھارتی قیادت کے غیرذمہ دارنہ بیانات سے خطےکا امن متاثر ہوسکتا ہے، عالمی برادری کو بھارتی بیانات کا نوٹس لینا چاہیے، کوئی جارحانہ کارروائی کی گئی توجواب دینےکی اہلیت رکھتے ہیں.

    شاہ محمود قریشی نے کہا کہ بھارت پروپیگنڈا کر رہا ہے کہ سرجیکل اسٹرائیک کا ارادہ ہے، یہ غیر ذمے دارانہ اور افسوس ناک رویہ ہے.

    انھوں نے کہا کہ ابوظبی کے ولی عہد کل پاکستان کےدورے پر آرہے ہیں، یواےای پاکستان کے ساتھ اسٹریٹجک تعلقات بڑھانے کا ارادہ رکھتا ہے.

  • ترکی : خاتون کی ہیرے کی انگوٹھی نگل کر چوری کی کوشش ناکام

    ترکی : خاتون کی ہیرے کی انگوٹھی نگل کر چوری کی کوشش ناکام

    انقرہ : ترکی میں خاتون نے ہیرے کی انگوٹھی چرانے کےلیے اسے نگل لیا لیکن دکان میں موجود ملازم نے خاتون کو انگوٹھی نگلتے ہوئے پکڑ لیا۔

    تفصیلات کے مطابق ترکی کے دارالحکومت استنبول میں واقع صرافہ بازار میں چوری کا انوکھا واقعہ پیش آیا جسے دیکھ کر پولیس والے بھی دنگ رہ گئے۔

    یوں تو دنیا بھر کے چور چوری کےلیے نئے نئے طریقے استعمال کرتے ہیں لیکن استنبول میں ایک خاتون ہیرے کی انگوٹھی خریدنے کے بہانے جیولری کی دکان میں داخل ہوئی اور انگوٹھی دیکھنے کے دوران پرس سے پانی کی بوتل نکالی اور انگوٹھی نگل گئی۔

    غیر ملکی خبر رساں ادارے کا کہنا تھا کہ خاتون نے بہت چالاکی سے ہیرے کی انگوٹھی چوری کرنے کی کوشش کی لیکن دکان موجود ایک ملازم نے اپنی عقابی نگاہوں سے خاتون کو ہیرے کی قیمتی انگوٹھی نگلتے ہوئے پکڑ لیا تھا۔

    غیر ملکی میڈیا کا کہنا تھا کہ ملازم نے پولیس کو چوری کی اطلاع دی جس کے بعد پولیس خاتون کو گرفتار کرکے اسپتال لے گئی، جہاں اس کا طبی معائنہ کیا گیا۔

    نجی خبر رساں ادارے کی رپورٹ کے مطابق طبی معائنے کے دوران معلوم ہوا کہ انگوٹھی خاتون کے پیٹ میں موجود ہے جس کے بعد پولیس نے خاتون کے خلاف چوری کا مقدمہ درج کرلیا۔

    غیرملکی میڈیا کا کہنا ہے کہ خاتون ضمانت پر رہا ہوگئی تاہم انگوٹھی اب بھی خاتون کے پیٹ میں ہے، جو خاتون کو واپس کرنا ہوگی یا اس کی قیمت دکان مالک کو ادا کرنا ہوگی۔

    مزید پڑھیں : روس:‌ تھکاوٹ کا شکار چور پولیس کے ہاتھوں‌ گرفتار

    مزید پڑھیں : تائیوان: پولیس نے دہی چور کی گرفتاری کے لیے سینکڑوں ڈالر خرچ کردئیے

    غیر ملکی میڈیا کا کہنا ہے کہ خاتون کو ہیرے کی انگوٹھی چوری کرنے کے جرم میں کئی سال قید اور جرمانے کی سزا سامنا کرنا پڑسکتا ہے.

    مزید پڑھیں برطانیہ: چوری کرنے پر انعام کا انوکھا اعلان

    خیال رہے کہ گذشتہ برس اکتوبر میں پولیس 54 سالہ آئرلینڈ کے شہری کو ترکی کے جنوب مغربی شہر میں واقع ریزوٹ سے گرفتار کیا تھا جس نے 30 ہزار پاؤنڈ مالیت کی ہیرے کی انگوٹھی چوری کرنے کےلیے نگل لی تھی۔

  • پاکستان ترکی بھائی چارہ زندہ باد، حکومت پاکستان کاترکش زبان میں ٹوئٹ

    پاکستان ترکی بھائی چارہ زندہ باد، حکومت پاکستان کاترکش زبان میں ٹوئٹ

    اسلام آباد : وزیراعظم عمران خان کے کامیاب دورہ ترکی کے بعد حکومت پاکستان کےآفیشل ٹویٹراکاؤنٹ سےپاکستان ترکی بھائی چارہ زندہ بادکاترکش زبان میں ٹوئٹ کیا گیا۔

    تفصیلات کے مطابق وزیراعظم عمران خان کےدورہ ترکی کے اختتام پر حکومت پاکستان کی جانب سے سماجی رابطے کی ویب سائٹ ٹوئٹر پر آفیشل اکاؤنٹ سےترکش زبان میں ٹوئٹ کیا گیا۔

    ٹوئٹ میں کہا گیا کہ وزیراعظم عمران خان انقرہ میں ترک صدرطیب اردگان سےملے، پاکستان ترکی بھائی چارہ زندہ باد۔

    یاد رہے وزیراعظم عمران خان کے دورہ ترکی سے متعلق دونوں ممالک کا مشترکہ اعلامیہ جاری کیا گیا تھا ، جس میں کہا گیاکہ وزیراعظم عمران خان نے صدر رجب طیب اردوان کی دعوت پر ترکی کا دورہ کیا، وزیراعظم عمران خان کے ہمراہ اعلیٰ سطح کے وفد میں شاہ محمود قریشی، اسد عمر اور خسرو بختیار بھی شامل تھے۔

    عمران خان اورترک صدر کےدرمیان ون آن ون اور وفود کی سطح پر ملاقات ہوئی، ملاقات میں دونوں ممالک کے درمیان باہمی دلچسپی کے امور پرتبادلہ خیال کیا گیا، دونوں رہنماؤں نے علاقائی اور عالمی امور پر بھی بات چیت کی، دونوں رہنماؤں نے دیرینہ تعلقات کو تزویراتی شراکت داری میں بدلنے پر اظہاراطمینان اور قومی مفاد کے تمام مسائل پرباہمی تعاون کو بڑھانے کےعزم کا اعادہ کیا۔

    مزید پڑھیں : پاکستان ترکی اقوام متحدہ اور او آئی سی میں ایک دوسرے کی حمایت کریں گے، مشترکہ اعلامیہ

    اس موقع پر دونوں ممالک کے عوام کیلئے اقتصادی تعاون بڑھانے اور اسٹریٹجک تعاون کونسل کا چھٹا اجلاس پاکستان میں منعقد کرانے کا فیصلہ کیا گیا اور اجلاس کی تاریخ دونوں ممالک باہمی مشاورت سےطے کریں گے جبکہ عوامی مفاد کے شعبوں میں باہمی تعلقات کو مزید بڑھانے اور پاک ترک اعلیٰ سطح اسٹریٹجک تعاون کونسل کے میکانزم کی اہمیت پر زور دیا گیا، دونوں ممالک کے درمیان دفاعی شعبوں میں تعاون بڑھانے پراتفاق کیا گیا، موجودہ اقتصادی اورتجارتی تعلقات کو مزید مضبوط بنانے پر زور دیا گیا۔

    رہنماؤں نے اس بات کا عزم کیا کہ دہشت گرد تنظیموں کے خلاف مشترکہ حکمت عملی اپنائی جائے گی، ملاقات میں اس بات پر اتفاق کیا گیا کہ اقوام متحدہ اور او آئی سی میں ایک دوسرے کی حمایت جاری رہے گی اور عالمی سطح پر امن سلامتی اور استحکام کیلئے مشترکہ کردار اداکیا جائے گا۔

    مسئلہ کشمیر کے حل کیلئے اقوام متحدہ کی قراردادوں پرعمل ضروری قرار دیا گیا، ہرقسم کی دہشت گردی سے نمٹنے کیلئے دوطرفہ عزم کا اظہار کیا گیا، اس کے علاوہ فتح اللہ گولن کی دہشت گرد تنظیم کےخلاف مؤثرکارروائی کرنے پر اتفاق کیا گیا۔

    پاکستان کی جانب سے نیوکلیئر سپلائرز گروپ کی رکنیت کیلئے ترکی کی حمایت پرشکریہ ادا کیا گیا، پاکستان کی طرف سے این ایس جی کی ہدایت پر مکمل عملدرآمد کایقین دلایا گیا۔

    اعلامیہ میں کہا گیا کہ پاکستان کی نیوکلیئر سپلائرز گروپ میں شمولیت سے ایٹمی عدم پھیلاؤ کے مقاصد کو تقویت ملے گی، افغانستان میں امن، استحکام افغان عوام کےتعاون کے بغیر ممکن نہیں، افغان امن کیلئے علاقائی اور عالمی برادری کی حمایت ضروری ہے۔

  • وزیر اعظم کا دورہ ترکی دونوں ممالک کو پہلے سے زیادہ قریب لایا: وزیر خارجہ

    وزیر اعظم کا دورہ ترکی دونوں ممالک کو پہلے سے زیادہ قریب لایا: وزیر خارجہ

    اسلام آباد: وزیر خارجہ شاہ محمود قریشی نے ترکی کے دورے کو کامیاب قرار دیتے ہوئے کہا کہ ترکی کی میزبانی میں روایتی انداز سے بڑھ کر گرمجوشی دیکھی۔ دورہ ترکی دونوں ممالک کو پہلے سے زیادہ قریب لایا۔

    تفصیلات کے مطابق وزیر خارجہ شاہ محمود قریشی نے 2 روزہ دورہ ترکی سے واپسی پر اپنے تاثرات میں کہا کہ 4 ممالک کے دوروں کی نوعیت الگ جبکہ دورہ ترکی کی اور نوعیت تھی۔

    وزیر خارجہ نے ترکی کے دورے کو کامیاب قرار دیتے ہوئے کہا کہ وزیر اعظم کا دورہ ترکی دونوں ممالک کو پہلے سے زیادہ قریب لایا، مسئلہ کشمیر، مسئلہ فلسطین اور افغانستان پر دونوں ممالک کا نقطہ نظر ایک ہے۔

    انہوں نے کہا کہ ترکی کے ساتھ افغانستان میں قیام امن پر مثبت بات چیت ہوئی، دورہ ترکی کا مقصد دو طرفہ تعلقات کو فروغ دینا اور باہمی تعاون کو بڑھانا تھا۔

    وزیرخارجہ کا کہنا تھا کہ ترکی کی میزبانی میں روایتی انداز سے بڑھ کر گرمجوشی دیکھی۔ 5 ممالک کے دورے میں ترجیحات اقتصادی اور سفارتی تھیں۔ دونوں ممالک عالمی فورم پر ہر مسئلے میں ایک ساتھ کھڑے ہوں گے۔

    خیال رہے کہ وزیر اعظم عمران خان نے وفاقی وزرا شاہ محمود قریشی، اسد عمر، خسرو بختیار اور مشیر تجارت رزاق داؤد کے ہمراہ ترکی کا 2 روزہ دورہ کیا تھا۔

    ترکی میں وزیر اعظم نے تاجروں اور صنعت کاروں کی تقریب سے خطاب کرتے ہوئے کہا کہ پاکستان میں سرمایہ کاری کے وسیع مواقع ہیں، پاکستان اور ترقی کے درمیان دو طرفہ تجارت کا فروغ ضروری ہے، ترکی کی تحریک آزادی میں بھی پاکستان کے لوگوں کا بڑا کردار ہے۔

    پاکستان ترک بزنس کاؤنسل سے خطاب میں وزیر اعظم کا کہنا تھا کہ 60 کی دہائی میں پاکستان ملائشیا اور جنوبی کوریا کے لیے رول ماڈل تھا۔ 60 کی دہائیکے بعد منافع کمانے کو برا سمجھا جانے لگا، معیشت کو نقصان پہنچا۔

    وزیر اعظم نے کہا کہ 80 کی دہائی میں کچھ سیاستدان اور بیورو کریٹ کاروبار میں منافع کے خلاف تھے۔ ہم سمجھتے ہیں کاروبار سے منافع کمانا کوئی بری بات نہیں، منافع سے لوگوں کو غربت سے نکالنے میں مدد ملتی ہے۔

    وزیر اعظم نے وفد کے ہمراہ مولانا جلال الدین رومی کے مزار پر حاضری بھی دی جہاں انہوں نے مزار پر پھول چڑھائے اور فاتحہ خوانی کی۔

    بعد ازاں وزیر اعظم اور ترک صدر رجب طیب اردوان کی ملاقات بھی ہوئی جس میں‌ پاکستان اور ترکی کے درمیان دو طرفہ تعلقات پر تبادلہ خیال کیا گیا۔

    مشترکہ پریس کانفرنس میں طیب اردوان نے کہا کہ وقت کے ساتھ پاکستان اور ترکی کے تعلقات مزید مضبوط ہو رہے ہیں، عمران خان نے پاکستان میں تبدیلی کے لیے طویل جدوجہد کی۔

  • پاکستان ترکی اقوام متحدہ اور او آئی سی میں ایک دوسرے کی حمایت کریں گے، مشترکہ اعلامیہ

    پاکستان ترکی اقوام متحدہ اور او آئی سی میں ایک دوسرے کی حمایت کریں گے، مشترکہ اعلامیہ

    اسلام آباد : وزیر اعظم عمران خان کے دورہ ترکی کے مشترکہ اعلامیے میں کہا گیا ہے کہ اقوام متحدہ اور او آئی سی میں ایک دوسرے کی حمایت جاری رہے گی، پاکستان نیوکلئیر سپلائر گروپ میں شمولیت کیلئے ترکی کی حمایت کو سراہتا ہے۔

    تفصیلات کے مطابق وزیراعظم عمران خان کے دورہ ترکی سے متعلق دونوں ممالک کا مشترکہ اعلامیہ جاری کردیا گیا، اعلامیہ کے مطابق وزیراعظم عمران خان نے صدر رجب طیب اردوان کی دعوت پر ترکی کا دورہ کیا، وزیراعظم عمران خان کے ہمراہ اعلیٰ سطح کے وفد میں شاہ محمود قریشی، اسد عمر اور خسرو بختیار بھی شامل تھے۔

    عمران خان اورترک صدر کےدرمیان ون آن ون اور وفود کی سطح پر ملاقات ہوئی، ملاقات میں دونوں ممالک کے درمیان باہمی دلچسپی کے امور پرتبادلہ خیال کیا گیا، دونوں رہنماؤں نے علاقائی اور عالمی امور پر بھی بات چیت کی، دونوں رہنماؤں نے دیرینہ تعلقات کو تزویراتی شراکت داری میں بدلنے پر اظہاراطمینان اور قومی مفاد کے تمام مسائل پرباہمی تعاون کو بڑھانے کےعزم کا اعادہ کیا۔

    اس موقع پر دونوں ممالک کے عوام کیلئے اقتصادی تعاون بڑھانے اور اسٹریٹجک تعاون کونسل کا چھٹا اجلاس پاکستان میں منعقد کرانے کا فیصلہ کیا گیا اور اجلاس کی تاریخ دونوں ممالک باہمی مشاورت سےطے کریں گے۔

    اس کے علاوہ عوامی مفاد کے شعبوں میں باہمی تعلقات کو مزید بڑھانے اور پاک ترک اعلیٰ سطح اسٹریٹجک تعاون کونسل کے میکانزم کی اہمیت پر زور دیا گیا، دونوں ممالک کے درمیان دفاعی شعبوں میں تعاون بڑھانے پراتفاق کیا گیا، موجودہ اقتصادی اورتجارتی تعلقات کو مزید مضبوط بنانے پر زور دیا گیا۔

    تعلیم، ثقافت، سیاحت اور زراعت کے شعبوں میں تجربات کے تبادلے پر بھی اتفاق کیا گیا، پاکستان اور ترکی کی جانب سے نوجوانوں سے متعلق شعبوں میں تعاون بڑھانے کا فیصلہ کیا گیا، اس موقع پر خطے میں دہشت گردی کےخاتمے کیلئے مشترکہ کوششوں پر اتفاق کیا گیا۔

    رہنماؤں نے اس بات کا عزم کیا کہ دہشت گرد تنظیموں کے خلاف مشترکہ حکمت عملی اپنائی جائے گی اس موقع پر دونوں ممالک کے عالمی سطح پرجاری تعاون پر اطمینان کا اظہار کیا گیا، ملاقات میں اس بات پر اتفاق کیا گیا کہ اقوام متحدہ اور او آئی سی میں ایک دوسرے کی حمایت جاری رہے گی اور عالمی سطح پر امن سلامتی اور استحکام کیلئے مشترکہ کردار اداکیا جائے گا۔

    مسئلہ کشمیر کے حل کیلئے اقوام متحدہ کی قراردادوں پرعمل ضروری قرار دیا گیا، ہرقسم کی دہشت گردی سے نمٹنے کیلئے دوطرفہ عزم کا اظہار کیا گیا، اس کے علاوہ فتح اللہ گولن کی دہشت گرد تنظیم کےخلاف مؤثرکارروائی کرنے پر اتفاق کیا گیا، پاکستان کی جانب سے نیوکلیئر سپلائرز گروپ کی رکنیت کیلئے ترکی کی حمایت پرشکریہ ادا کیا گیا، پاکستان کی طرف سے این ایس جی کی ہدایت پر مکمل عملدرآمد کایقین دلایا گیا۔

    اعلامیہ میں کہا گیا ہے کہ پاکستان کی نیوکلیئر سپلائرز گروپ میں شمولیت سے ایٹمی عدم پھیلاؤ کے مقاصد کو تقویت ملے گی، افغانستان میں امن،استحکام افغان عوام کےتعاون کے بغیر ممکن نہیں، افغان امن کیلئے علاقائی اور عالمی برادری کی حمایت ضروری ہے، القدس کی قانونی حیثیت اورتاریخی کردارکو تبدیل کرنے کی کوششیں مسترد کرتے ہیں، فلسطین کےعوام کی آزادی اور خود مختاری کیلئے حمایت جاری رکھنے پر زور دیا گیا

    دونوں ممالک کے درمیان اعلیٰ ترین سطح پر رابطوں کو بڑھانے پر اتفاق کیا گیا، اسلام کی حقیقی اقدار کو برقرار رکھنے کیلئے کوششیں جاری رکھنے پر زور دیا گیا، اعلامیہ کے مطابق اسلامی تشخص کومسخ کرنے کی کوششوں کو خلاف حکمت عملی بنائی جائے گی، دونوں ملکوں کے تاریخی تعلقات کو مضبوط تجارتی تعلقات میں بدلنے پر اتفاق کیا گیا۔

  • ترکی پاکستان کا بہت قریبی ساتھی اور پراعتماد دوست ہے: شاہ محمودقریشی

    ترکی پاکستان کا بہت قریبی ساتھی اور پراعتماد دوست ہے: شاہ محمودقریشی

    اسلام آباد: وزیرخارجہ شاہ محمود قریشی کا کہنا ہے کہ ترکی نے افغانستان میں قیام امن کے لیے ہمیشہ مثبت کردار ادا کیا، ترکی پاکستان کا بہت قریبی ساتھی اور پراعتماد دوست ہے۔

    ان خیالات کا اظہار انہوں نے ترکی روانگی سے قبل صحافیوں سے گفتگو کرتے ہوئے کیا، وزیراعظم عمران خان، وزیرخارجہ شاہ محمود قریشی اور وزیرخزانہ اسدعمر دورہ روزہ دورے پر ترکی روانہ ہوچکے ہیں۔

    وزیر خارجہ کا کہنا تھا کہ خطے کی صورت حال پر ترکی کی قیادت کو اعتماد میں لیں گے، سیاسی رفاقت اور دوستی کو تزویراتی اقتصادی شراکت داری میں بدلنا ہے، ترکی کے صدر سے دوطرفہ معاملات پر گفتگو ہوگی۔

    انہوں نےکہا کہ ترک قیادت سے وفود کی سطح پر بھی مذاکرات ہوں گے، تجارت، سرمایہ کاری، معیشت اور تعاون بڑھانے پر تبادلہ خیال ہوگا۔

    شاہ محمود قریشی کا کہنا تھا کہ ترکی نے پاکستان کے نقطہ نظر کی ہمیشہ حمایت کی ہے، دونوں ممالک نے خطے کی صورت حال پر اعتماد میں لیا، ترکی نے سہ فریقی مذاکرات میں بھی پاکستان کی حمایت کی۔

    وزیراعظم عمران خان 2 روزہ دورے پرترکی روانہ

    ان کا یہ بھی کہنا تھا کہ جنوری میں ترکی اور آذربائیجان کے وزرائے خارجہ پاکستان آئیں گے، پاکستان ترکی اور آذربائیجان سہ افریقی مذاکرات ہوں گے، مذاکرات میں افغان امن عمل اور خطے کی صورت حال پر تبادلہ خیال ہوگا۔

    خیال رہے کہ وزیراعظم دورے کے دوران برنس فورم سے خطاب کریں گے اور تری کی کاروباری شخصیات کے علاوہ ممکنہ سرمایہ کاروں سے بھی ملاقاتیں کریں گے۔

    وزیراعظم ترکی دورے میں قونیہ شہر میں مولانا رومی عجائب گھر جائیں گے اور جدید ترکی کے بانی کمال اتاترک کے مزار پرحاضری بھی دیں گے۔

  • ترکی اور روس کا شام میں داعش کے خلاف فوجی آپریشن جاری رکھنے کا اعلان

    ترکی اور روس کا شام میں داعش کے خلاف فوجی آپریشن جاری رکھنے کا اعلان

    ماسکو: ترکی اور روسی حکام نے اعلان کیا ہے کہ شام میں دولت اسلامیہ کے خاتمے تک فوجی آپریشن جاری رہے گا۔

    تفصیلات کے مطابق ترکی اور روسی حکام نے واضح کیا ہے کہ امریکی فوج کے شام سے انخلا کے علان کے باوجود ہماری افواج مشترکہ طور پر شام میں آپریشن جاری رکھے گی۔

    غیر ملکی خبر رساں ادارے کے مطابق روسی وزیر خارجہ سرگئی لاروف کا کہنا ہے کہ شام میں موجودہ صورت حال کا جائزہ لے رہے ہیں، دہشت گردی کو منتقی انجام تک پہنچائیں گے۔

    عراق میں امریکی فوجیں تعینات رہیں گے، ڈونلڈ ٹرمپ

    ان خیالات کا اظہار انہوں نے ترک ہم منصب میولٹ کاؤسوگلو سے رابطے کے بعد مقامی مڈیا سے گفتگو کرتے ہوئے کیا، روسی وزیر خارجہ کا کہنا تھا کہ شام میں نئے جیلنجز اور مسائل کا سامنا ہے، جسے مدنظر رکھتے ہوئے مشترکہ افواج نے حکمت عملی تیار کرلی۔

    ان کا کہنا تھا کہ دونوں ممالک شام میں بے گھر ہونے والے افراد کو ان کے گھر واپسی کے لیے بھی لائحہ عمل پر غور کررہے ہیں، آستانہ امن عمل ہماری اولین ترجیح ہے، جس کے تحت شام کی سیاسی ساخت کو بچانے کے لیےہرممکن اقدامات کیے جائیں گے۔

    واضح رہے کہ کچھ روز قبل ہی صدر ٹرمپ نے شام میں تعینات امریکی افواج کو واپس بلانے کا فیصلہ کیا تھا، امریکی حکام کے مطابق افواج نے وہاں اپنے اہداف حاصل کرلیے ہیں اس لیے افواج کو واپس بلانے کا فیصلہ کیا جارہا ہے۔

    بعد ازاں عراق نے عندیہ دیا تھا کہ وہ اپنی فوج شام میں بھیجنے کے لیے غور کررہا ہے۔