یونان: یورپ ایک کے بعد ایک مصیبت کی زد پر ہے، جنگلاتی آگ کے بعد یورپ میں شدید بارشوں اور سیلاب نے تباہی مچا دی ہے۔
غیر ملکی میڈیا رپورٹس کے مطابق سیلاب سے یونان، ترکیہ اور بلغاریہ میں 8 افراد ہلاک اور متعدد لاپتا ہو گئے ہیں، جنگلات میں آگ لگنے کے بعد یونان تباہ کن سمندری طوفان کی زد میں آ گیا ہے۔
طوفان ڈینیئل نے مغربی اور وسطی یونان میں تباہی مچا دی، سیلابی پانی راستے میں آنے والی ہر شے کو بہا لے گیا، مقامی میڈیا کا کہنا ہے کہ مختلف حادثات میں 2 افراد ہلاک اور متعدد لاپتا ہو گئے ہیں۔
سیلاب کے سبب مختلف حادثات میں ترکیہ میں 4 افراد جان سے گئے، استبول میں گلی محلے ندی نالوں میں تبدیل ہو گئے، گاڑیاں پانی میں ڈوب گئیں، لوگ تیرنے پر مجبور ہو گئے، شہریوں کی مدد کے لیے فوج کو طلب کر لیا گیا ہے۔
بلغاریہ میں 311 ملی میٹر بارش ریکارڈ کی گئی، موسلادھار بارش سے سرحد ی صوبہ سیلاب کی زد میں آ گیا ہے، جس کی وجہ سے حکام نے ایمرجنسی نافذ کر دی ہے۔ بارش کے باعث لاکھوں افراد بجلی سے محروم ہو گئے ہیں، اور سینکڑوں پروازیں منسوخ ہو گئیں، کاروبارِ زندگی ٹھپ ہو گیا، اسکول بھی بند ہو گئے ہیں۔
