اسلام آباد: وزیر اعظم عمران خان کے معاون خصوصی شہباز گل نے کرونا وائرس پھیلنے کی وارننگز کے باوجود اپوزیشن کے جلسے جلوس جاری رکھنے کے اعلان کو سخت تنقید کا نشانہ بنایا ہے۔
تفصیلات کے مطابق وزیر اعظم عمران خان کے معاون خصوصی شہباز گل نے سماجی رابطے کی ویب سائٹ ٹویٹر پر اپنے ٹویٹ میں کہا کہ این سی او سی اور اسلام آباد ہائیکورٹ کے فیصلے کے بعد بھی جلسوں کو جاری رکھنے کا عندیہ دیا گیا ہے۔
شہباز گل کا کہنا تھا کہ یہ اس بات کی گواہی ہے کہ پی ڈی ایم کی چھتری تلے اکھٹے ہوئے کرپشن کے پجاریوں کو عوام اور عوامی مسائل سے کوئی سروکار نہیں۔
کالے کردار کے حامل بے ضمیروں نے پہلے عوام کو لوٹ کھایااب عوام کو ذاتی مفاد اور سیاسی مقاصد کیلئے استعمال کر رہے ہیں،اُمید ہے قومی سلامتی کے اس معاملے کو حسبِ سابق سیاست کی نظر نہیں کیا جائے گا درباریت اور جاہلیت سے بالاتر ہوکر عوام کو موت کے منہ میں دھکیلنے سے اجتناب کیا جائے گا
— Dr. Shahbaz GiLL (@SHABAZGIL) November 19, 2020
انہوں نے کہا کہ ہمیشہ بیماری کی آڑ لینے والے آج اس خطرناک بیماری کے حوالے سے احکامات کو نظر انداز کر رہے ہیں۔
شہباز گل کا کہنا تھا کہ کالے کردار کے حامل بے ضمیروں نے پہلے عوام کو لوٹ کھایا، اب عوام کو ذاتی مفاد اور سیاسی مقاصد کے لیے استعمال کر رہے ہیں۔
انہوں نے مزید کہا کہ امید ہے قومی سلامتی کے اس معاملے کو حسب سابق سیاست کی نظر نہیں کیا جائے گا، درباریت اور جہالت سے بالاتر ہوکر عوام کو موت کے منہ میں دھکیلنے سے اجتناب کیا جائے گا۔
