ARYNews.tv | Urdu – Har Lamha Bakhabar

Tag: Twitter

  • ٹوئٹر کا ٹوئٹ میں حروف کی تعداد بڑھانے کا اعلان

    ٹوئٹر کا ٹوئٹ میں حروف کی تعداد بڑھانے کا اعلان

    اگر آپ سماجی رابطوں کی ویب سائٹ ٹوئٹر استعمال کرنے کے عادی ہیں لیکن بعض اوقات حروف کی محدود تعداد آپ کو الجھن میں مبتلا کردیتی ہے تو پھر آپ کے لیے خوشخبری ہے کہ ٹوئٹر نے اپنے صارفین کے لیے ایک ٹوئٹ میں حروف کی تعداد 140 سے بڑھا کر 280 کردی ہے۔

    ٹوئٹر انتظامیہ کے مطابق یہ فیصلہ صارفین کی آسانی کے لیے کیا گیا ہے جبکہ 280 الفاظ کی گنجائش تمام زبانوں بشمول انگریزی میں بھی دستیاب ہوگی۔

    ٹوئٹر نے ستمبر میں الفاظ کی گنجائش بڑھانے کا اعلان کیا تھا جس کی وجہ انہوں نے صارفین کی جانب سے کم الفاظ پر تنقید بتائی تھی، تاہم اب ٹوئٹر کے مطابق صارف کو اپنے جذبات کے اظہار کے لیے ایک سے زائد ٹوئٹ کرنے کی ضرورت نہیں ہے۔

    اس تبدیلی کا اطلاق فی الحال صرف منتخب کردہ گروپس اور اکاؤنٹس میں آزمائشی بنیادوں پر کیا گیا ہے تاہم جلد ہی یہ سہولت تمام صارفین کے لیے دستیاب ہوگی۔

    مزید پڑھیں: ٹوئٹر نے 3 لاکھ اکاؤنٹ بند کردیے

    یاد رہے کہ اس تبدیلی کا اعلان سب سے پہلے ستمبر میں کیا گیا تھا جس میں کہا گیا کہ اس تبدیلی کا اطلاق چند ممالک اور منتخب کردہ زبانوں پر ہوگا۔

    ٹوئٹر انتظامیہ کے مطابق جو لوگ جاپانی، کورین اور چینی زبان میں ٹوئٹ کریں گے ان کو 280 حروف میں ٹوئٹ کرنے کی سہولت میسر ہوگی جبکہ انگریزی، ہسپانوی، پرتگالی اور فرنچ زبان والے 140 حروف پر مشتمل ٹوئٹ ہی کرسکیں گے۔

    بعد ازاں ٹوئٹر کے اس فیصلے کو بے حد تنقید کا سامنا کرنا پڑا جس کے بعد اب ٹوئٹر انتظامیہ نے اس کا دائرہ کار تمام زبانوں تک بڑھا دیا ہے۔

    ٹوئٹر انتظامیہ کا مزید کہنا ہے کہ ٹوئٹ میں الفاظ کے اضافے کا فیصلہ کافی سوچ بچار کے بعد کیا گیا ہے۔ گروپ کے کئی ارکان اس فیصلے سے خوش نہیں تھے۔

    ان کا کہنا تھا کہ اس طرح روزانہ کی بنیاد پر ہونے والے ٹوئٹس میں کمی واقع ہوگی جس سے ٹوئٹر کی مقبولیت کم ہوجائے گی۔

    فیصلے پر اعتراض اٹھانے والے ارکان کا کہنا تھا کہ جو شخص اپنے جذبات کے اظہار کے لیے ایک سے زیادہ ٹوئٹ کرتا تھا اب اس تبدیلی کے بعد وہ ایک ہی ٹوئٹ میں اپنے دل کی بات کہہ دے گا۔

    مزید پڑھیں: سست رفتار انٹرنیٹ کے باوجود تیز ٹوئٹر چلانا ممکن

    تاہم ٹوئٹر کے سربراہ جیک ڈورسی کے مطابق ٹوئٹر اس حوالے سے ایک جائزہ بھی مرتب کر رہا ہے جس کے تحت 25 ستمبر سے 6 نومبر تک ہونے والی ٹوئٹس کا ڈیٹا محفوظ کیا گیا ہے۔ محفوظ شدہ ڈیٹا کے مطابق مذکورہ تاریخوں میں ٹوئٹر صارفین نے 2.7 ملین ٹوئٹس کیے ہیں اور اسی طرح اب آگے کا ڈیٹا بھی محفوظ کیا جائے گا جس کے بعد اس فیصلے کو حتمی شکل دی جائے گی۔

    ٹوئٹر کا یہ فیصلہ حسب معمول ٹوئٹر پر ہی موضوع بحث بن گیا۔ کچھ لوگوں کا کہنا ہے کہ ٹوئٹر کا یہ فیصلہ ایک مثبت تبدیلی ہے، کچھ لوگوں نے اس پر ناپسندیدگی کا اظہار بھی کیا ہے جبکہ کچھ صارفین نے اب ٹوئٹر میں ایڈٹ بٹن کا بھی مطالبہ کردیا ہے۔

    واضح رہے کہ مارچ 2017 میں کیے گئے سروے کے مطابق دنیا بھر میں اس وقت ٹوئٹر صارفین کی تعداد 33 کروڑ سے تجاوز کرچکی ہے جبکہ پاکستان میں ٹوئٹر استعمال کرنے والے افراد کی تعداد صرف 32 لاکھ ہے۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

  • عدالتی فیصلے سے قانون اورانصاف شرمندہ ہیں، مریم نواز کا ٹوئٹ

    عدالتی فیصلے سے قانون اورانصاف شرمندہ ہیں، مریم نواز کا ٹوئٹ

    لاہور : مریم نواز نے سپریم کورٹ کے تفصیلی فیصلے پر تنقید کرتے ہوئے کہا ہے کہ قانون اورانصاف شرمندہ ہیں اسی طرح اقلیت اکثریت کو بدنام کرتی ہے، شکارنوازشریف نہیں نظام عدل ہے۔

    یہ بات انہوں نے سماجی رابطے کی ویب سائٹ ٹوئٹر پر اپنے تازہ پیغام میں کہی۔

    تفصیلات کے مطابق سپریم کورٹ کا نوازشریف کی نااہلی کے معاملے پر نظر ثانی درخواستیں مسترد کرنے کا تفصیلی فیصلہ آتے ہی سابق وزیراعظم نواز شریف کی صاحبزادی مریم نواز نے ٹوئٹرکا محاذ سنبھال لیا۔

    مریم نواز نے سپریم کورٹ کے تفصیلی فیصلے پر تنقید کرتے ہوئے کہا کہ نواز شریف کیخلاف فیصلہ دباؤ میں کیا گیا۔

    ٹوئیٹ میں مزید کہا گیا ہے کہ یہ وہی مریم نواز ہے جس کا نام پہلے فیصلےمیں تھا ہی نہیں، میں نے ناانصافی کے خلاف آواز اٹھائی اسی لیے بدلہ لیا جارہاہے ورنہ انصاف کی ایسی شکل بدلنا ناقابل تصور ہے۔

    واضح رہے کہ سپریم کورٹ نے اپنے تفصیلی فیصلے میں کہا ہے کہ نوازشریف کی نااہلی سےمتعلق حقائق غیرمتنازع تھے، افسوس کی بات ہے کہ نواشریف نے پارلیمنٹ، عوام اور عدالت کو بے وقوف بنایا، بد دیانتی کے ساتھ جھوٹا بیان حلفی دیا گیا۔

    مزید پڑھیں: نوازشریف نے جان بوجھ کر اثاثے چھپائے، تفصیلی فیصلہ

    فیصلے کے مطابق کاغذات نامزدگی میں مکمل اثاثے ظاہر کرنا قانونی ذمہ داری ہے، نوازشریف نے کاغذات نامزدگی میں جھوٹا بیان حلفی دیا اور جان بوجھ کراثاثے چھپائے۔

    ساڑھے چھ سال کی تنخواہ نوازشریف کا اثاثہ تھی،یہ نہیں کہا جاسکتا کہ سپریم کورٹ کے فیصلےنے نوازشریف کوحیران کردیا۔

  • بین الاقوامی کرکٹ کی بحالی کا سہرا نواز شریف کو جاتا ہے، مریم نواز

    بین الاقوامی کرکٹ کی بحالی کا سہرا نواز شریف کو جاتا ہے، مریم نواز

    لاہور: مریم نواز نے کہا ہے کہ پاکستان میں بین الاقوامی کرکٹ کی بحالی کا سہرا نواز شریف کو جاتا ہے، ملک میں تحفظ اور امن سب کے لیے بحال ہوگیا۔

    یہ بات سابق وزیر اعظم کی صاحبزادی نے سماجی رابطے کی ویب سائٹ ٹوئٹر پر اپنے تازہ پیغام میں کہی۔

    ان کا کہنا تھا کہ نواز دور سے پہلے دہشت گردی کی کوئی نہ کوئی واردات ہوتی تھی، لیکن آج ملک میں امن بحال ہوچکا ہے، یہ سب نوازشریف کی وجہ سےممکن ہوا۔

    ان کا مزید کہنا تھا کہ آج قذافی اسٹیڈیم شائقین سے بھرچکا ہے، کیا5سال پہلے کوئی ایسا ہونے کا سوچ بھی سکتا تھا؟ جبکہ پاکستان میں انٹرنیشنل کرکٹ بھی لوٹ آئی ہے۔

    مزید پڑھیں: نواز شریف ن لیگ کی قیادت کررہے ہیں اورکریں گے‘ مریم نواز

    دیکھ لیں پاکستانیوں کی بہتری کے لئے چیزیں کیسے تبدیل ہوگئیں، مریم نواز نے کہا کہ یہ ہیں نوازشریف پاکستان کےلئے۔

    مزید پڑھیں: کارکن تیار رہیں، بڑے امتحان کا سامنا کرنا پڑسکتا ہے،مریم نواز

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

     

     

  • ٹویٹر پر ہراساں کرنے والے صارفین کو بلاک کرنے کا فیصلہ

    ٹویٹر پر ہراساں کرنے والے صارفین کو بلاک کرنے کا فیصلہ

    کیلی فورنیا: سماجی رابطے کی ویب سائٹ ٹویٹر نے ہراساں کرنے والے صارفین کے خلاف سخت اقدامات کرنے کا اعلان کردیا۔

    ٹویٹر انتظامیہ کے مطابق صارفین کی جانب سے بڑی تعداد میں ہراساں کرنے کی درخواستیں موصول ہوئیں جس کو مدنظر رکھتے ہوئے ہم نے اس معاملے پر سخت پالیسی مرتب دینے کا فیصلہ کیا ہے۔

    ٹویٹر کے سربراہ جیک دوسرے کا کہنا ہے کہ اس ضمن میں جلد باضابطہ پالیسی کا اعلان کیا جائے گا، جس صارف کی شکایت موصول ہوگی اُس کے اکاؤنٹ کو تحقیق کے بعد ڈی ایکٹیو کردیا جائے گا۔

    انہوں نے کہا کہ آن لائن ہراساں کرنے کی شکایات کافی حد تک بڑھ گئی ہیں جس کو مدنظر رکھتے ہوئے سخت پالیسی مرتب کی جارہی ہے، اب کسی کو ہراساں کرنے یا پھر غیر اخلاقی تصویر شیئر کرنے والی آئی ڈیز کی نشاندہی کے بعد انہیں مستقل بند کردیا جائے گا جس کے بعد وہ ٹویٹر کا مزید حصہ نہیں رہ سکیں گے۔

    پڑھیں: ٹوئٹر نے 3 لاکھ اکاؤنٹ بند کردیے

    ٹویٹر کے سیفٹی پالیسی کے سربراہ کا کہنا ہے کہ نیا قانون تیار ہوچکا ہے جس کو جلد لاگو کیا جائے گا، اس اقدام کا مقصد صارفین کو محفوظ بنانا اور اچھا ماحول فراہم کرنا ہے۔

    انہوں نے کہا کہ صارفین کی جانب سے رپورٹ کردہ آئی ڈیز کے خلاف فوری اقدام اٹھایا جائے گا تاہم سروس کو بہتر بنانے کے لیے مستقبل میں مزید اقدامات کیے جائیں گے۔

    یہ بھی پڑھیں: سست رفتار انٹرنیٹ کے باوجود تیز ٹوئٹر چلانا ممکن

    واضح رہے کہ ٹویٹر کی جانب سے حال ہی میں کچھ بڑی شخصیات کی آئی ڈیز بلاک کی گئیں ہیں، گزشتہ ہفتے انتظامیہ نے 201 اکاؤنٹس کو تفتیش کے لیے متعلقہ کمیٹی کے سپرد کیے ہیں تاکہ اُن کے خلاف کارروائی کی جاسکے۔

    یاد رہے کہ ٹویٹر کے اس وقت پوری دنیا میں 32 کروڑ 80 لاکھ صارفین موجود ہیں جن میں سے تقریباً 6 کروڑ 80 لاکھ صارفین صرف امریکا میں ہیں۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔

  • کرینہ سے تعلقات کا دعویٰ بھارتی اداکار کو مہنگا پڑ گیا

    کرینہ سے تعلقات کا دعویٰ بھارتی اداکار کو مہنگا پڑ گیا

    ممبئی: بھارتی اداکار  کمال آر خان (کے آر کے)  کو کرینہ سے تعلقات کا بے بنیاد دعویٰ مہنگا پڑ گیا۔

    تفصیلات کے مطابق بالی ووڈ ہدایت کار اور اداکار کے آر کے نے 10 اکتوبر کو سماجی رابطے کی ویب سائٹ پر ایک ٹوئٹ کے ذریعے دعویٰ کیا تھا کہ اُن کے اور کرینہ کپور کے مابین چار سال تک تعلقات رہے تاہم اُن کے پاس سوائے ایک تصویر کے کوئی ثبوت موجود نہیں ہے۔

    بالی ووڈ اداکار نے یہ بھی اعلان کیا تھا کہ وہ لائیو ٹی شو کے دوران اپنے اور کرینہ کے رشتے سے متعلق مزید انکشافات کریں گے۔

    کے آر کے کو کرینہ سے مبینہ تعلقات کا دعویٰ مہنگا پڑ گیا کیونکہ کرینہ کے مداحوں کی جانب سے اُن کے اکاؤنٹ کو مستقل رپورٹ کیا گیا جس کے بعد  ٹوئٹر انتظامیہ نے اُن کے ویریفائیڈ اکاؤنٹ کو ہراساں کرنے کے الزام میں بند کردیا تاہم بھارتی اداکار نے پہلے سے ہی دوسرا اکاؤنٹ بنا رکھا تھا جسے وہ اب استعمال کررہے ہیں۔

    انہوں نے اپنے دوسرے اکاؤنٹ پر پیغام جاری کرتے ہوئے کہا کہ کے آر کے کے اکاؤنٹ سے کسی کو گالی نہیں دی گئی اُس کے باوجود انتظامیہ نے ٹوئٹر اکاؤنٹ بند کردیا یہ ایک بلیک میلنگ کا طریقہ ہے۔

    انہوں نے میڈیا نمائندگان، ساتھی فنکاروں اور مداحوں کے نام ایک تفصیلی خط بھی تحریر کر کے سوشل میڈیا پر شیئر کیا۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔

  • انکل کو سلام کرنے گئی تھی، دراڑیں ڈالنے والےناکام ہوں گے، مریم نواز

    انکل کو سلام کرنے گئی تھی، دراڑیں ڈالنے والےناکام ہوں گے، مریم نواز

    لاہور : مریم نواز نے کہا ہے کہ اپنے انکل کو سلام اور چائے پینے گئی تھی، حیران ہوں کہ ان سے ملاقات کو کیا رنگ دے دیا گیا، ہمارے درمیان دراڑیں ڈالنے والےناکام ہوں گے۔

    یہ بات انہوں نے سماجی رابطے کی ویب سائٹ ٹوئٹر پر اپنے تازہ پیغام میں کہی، سابق وزیر اعظم کی صاحبزادی مریم نواز کا مزید کہنا تھا کہ ملاقات میں انکل شہبازشریف سے اچھی گفتگو رہی۔

    اس کے علاوہ حمزہ سلمان اور فیملی کے دیگرممبران سے بھی بات چیت ہوئی۔ انہوں نے کہا کہ ہمارے درمیان دراڑیں ڈالنے والے اپنے ارادوں میں ناکام ہوں گے۔

    مزید پڑھیں: مریم نوازکا این اے 120 کا دورہ، پارٹی رہنماؤں پربرہم

    مریم نواز کی اپنے چچا سے چھ ماہ بعد ملاقات

    واضح رہے کہ گزشتہ روز مریم نواز نے این اے 120کے دورے کے موقع پر اپنے چچا وزیر اعلیٰ پنجاب میاں شہباز شریف سے ملاقات کی۔

    چچا بھتیجی کی یہ ملاقات تقریباً چھ ماہ بعد ہوئی ہے، جس میں حمزہ شہباز بھی موجود تھے، وزیراعلیٰ پنجاب شہبازشریف نے مریم اورحمزہ کے تحفظات غور سے سنے۔

    اس موقع پر شہباز شریف نے کہا کہ اداروں سے محاذ آرائی ملک کے مفاد میں نہیں، ملک کسی ایڈونچر کا متحمل نہیں ہوسکتا، ہر ادارے کو اپنی حدود میں رہ کر کام کرناچاہئے، اداروں کے درمیان غلط فہمیاں دور ہونی چاہئیں۔

    مزید پڑھیں: پٹیشن پاناما کی، فیصلہ اقاما پر، مریم نوازکا عدالت پرطنز

    انہوں نے کہا کہ سیاسی ماحول میں استحکام ملک کے مفاد میں بہتر ہے، جمہوری نظام کاتسلسل ہی ملک کو آگے لے کرجائے گا۔

    ذرائع کے مطابق شہباز شریف نے اپنے بیٹے حمزہ شہباز اور بھتیجی مریم نواز کے درمیان اختلافات کو ختم کروا کے پارٹی کیلئے مل جل کر کام کرنے کی ہدایت کی۔

    ذرائع کا مزید کہنا ہے کہ شریف فیملی اور ن لیگ میں کھچڑی پک رہی ہے، چچا اور بھتیجی کی ملاقات اسی تناظرمیں ہوئی۔

    اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

  • پٹیشن پاناما کی، فیصلہ اقاما پر، مریم نوازکےٹوئٹ میں عدالت پرطنز

    پٹیشن پاناما کی، فیصلہ اقاما پر، مریم نوازکےٹوئٹ میں عدالت پرطنز

    لندن : سابق وزیر اعظم نواز شریف کی صاحبزادی مریم نواز نے اعلیٰ عدلیہ پر طنز کرتے ہوئے کہا ہے کہ نواز شریف کو نکالنےکیلئے پٹیشن پاناماکی، فیصلہ اقاما پر، انہوں نے کہا کہ آج ثابت ہوگیا کہ نوازشریف کے پیچھے پوری پارٹی متحد ہوکر کھڑی ہے۔

    یہ بات انہوں نے سماجی رابطے کی ویب سائٹ ٹوئٹر پر اپنے تازہ پیغام میں کہی،تفصیلات کے مطابق مریم نواز جو آج کل ٹوئٹر کے محاذ پر کافی سرگرم دکھائی دیتی ہیں۔

    انہوں نے سپریم کورٹ پر کھل کر طنز کرتے ہوئے اپنی پوسٹ میں عمران خان نااہلی کیس کی سماعت کے موقع پر اعلی عدلیہ کے ججز اور اکرم شیخ کے درمیان ہونے والی گفتگو کے اسکرین شاٹس لگائے ہیں۔

    جس میں لکھا ہے کہ ’’جس تناظرمیں بات ہوئی اسی تناظرمیں پڑھیں،چیف جسٹس‘‘ جس کے جواب مریم نواز نے لکھا کہ ’’جی! جیسے پاناما کے تناظر میں اقاما پر نااہلی،‘‘

    ایک اور ٹوئٹ میں دکھایا گیا کہ ’’جوآپ کہہ رہے ہیں وہ آپ کی پٹیشن میں نہیں،چیف جسٹس کےریمارکس‘‘ جس پر انہوں نے لکھا کہ ’’لیکن نوازشریف کو نکالنے کیلئےپٹیشن پاناما کی، فیصلہ اقاما پر‘‘ کیا گیا۔

    انہوں نے کہا کہ اگر 6 اعشاریہ 5 فیصد رقم کی ٹریل ثابت نہ ہونا کوئی جرم نہیں تو نوازشریف کے ظاہر کردہ اثاثوں میں دس ہزار درہم کا اوسط کیوں نہیں نکالا گیا؟

    مریم نواز نے اپنے ایک اور ٹوئٹ میں نواز شریف کو مسلم لیگ کا بلامقابلہ صدر منتخب کرنے کے حوالے سے کہا کہ آج ثابت ہوگیا کہ نوازشریف کے پیچھے پارٹی متحد ہوکر کھڑی ہے۔

    نوازشریف کے پارٹی صدر بننے سے خوف میں مبتلا لوگوں کو تکلیف ہے، یہ تکلیف ان لوگوں کو ہے جن کا نون لیگ سےدور کا بھی تعلق نہیں ہے، نوازشریف کے مخالف ان کے چاہنے والوں کے آگے بےبس ہیں۔

    انہوں نے کہا کہ اس سے ثابت ہوتا ہے کہ یہ کتنے بے بس ہیں کہ وہ نواز شریف کیخلاف کتنے ہی منصوبے بنا لیں مگر کامیاب نہیں ہوتے جبکہ وہ پاکستانی سیاست پر مسلسل راج کررہے ہیں۔

    انہوں نے مزید کہا کہ نوازشریف کو نکالنے کیلئےجمہوری آئین کو آمرکا آئین بنادیا گیا، ڈکٹیٹر کی بنائی ہوئی ایک شق ختم کرنے پرشور مچایا جارہا ہے۔

    دخل اندازی کرنیوالے پہلے اپنے پارٹی معاملات پرتوجہ دیں اور اپنی جماعت کو عوامی جماعت بنا کر دکھائیں۔

  • ٹوئٹر نے 3 لاکھ اکاؤنٹ بند کردیے

    ٹوئٹر نے 3 لاکھ اکاؤنٹ بند کردیے

    نیویارک : سماجی رابطے کی مشہور ویب سائٹ ٹوئٹر نے دنیا بھر کے ممالک کی جانب سے آن لائن دہشت گردی کے خلاف جنگ کے دباؤ کے نتیجے میں 3 لاکھ اکاؤنٹ بند کر دیے۔

    ٹویٹر کی جانب سے جاری کردہ بیان میں کہا گیا ہے کہ کمپنی نے دہشت گردی کے خلاف جنگ کو موثر بنانے کے لیے اپنی ویب سائٹ کے ایک ٹول کو مزید بہتر کیا ہے جس نے دنیا بھر میں پھیلے دہشت گردوں یا ان کے سہولت کاروں کے زیرِاستعمال 3 لاکھ اکاؤنٹ بند کرنے میں زبردست مدد فراہم کی اور تقریباً 95 فیصد اکاؤنٹ اسی ٹول کی مدد سے بند کیے گئے۔

    سوشل میڈیا پر بلاتصدیق پوسٹ سے انتہا پسندی پھیل رہی ہے*

    سماجی رابطے کی ویب سائٹ کے مطابق دہشت گردی کے خلاف برسرِ پیکار حکومتوں کی جانب سے دیے جانے والے ڈیٹا بیس میں مسلسل اضافہ ہورہا ہے‘ جس کے سبب اس عفریت پر قابو پانے میں مدد ملی ہے۔

    بیان میں کہا گیا ہے کہ انتہا پسندی کے خلاف جنگ میں اس نئے ٹول کا استعمال انتہائی ضروری ہے کیونکہ روزانہ کی بنیاد پر لاکھوں کی تعداد میں پیغامات کو پڑھنا ایک نا ممکن عمل ہے۔

    یاد رہے کہ ٹویٹر کے اس وقت پوری دنیا میں 32 کروڑ 80 لاکھ صارفین موجود ہیں جن میں سے تقریباً 6 کروڑ 80 لاکھ صارفین صرف امریکا میں ہیں۔

    اگر آپ بلاگر کے مضمون سے متفق نہیں ہیں تو برائے مہربانی نیچے کمنٹس میں اپنی رائے کا اظہار کریں اوراگرآپ کو یہ مضمون پسند آیا ہے تو اسے اپنی وال پرشیئرکریں