اسلام آباد : پاکستان نے غیر ملکی سرمایہ کاری کے بجٹ تخمینے کا اٹھارہ فیصد رواں مالی سال کے ابتدائی دو ماہ میں ہی حاصل کر لیا، جولائی اگست میں 2ارب24 کروڑ ڈالر سے زائد غیرملکی فنانسنگ ہوئی۔
تفصیلات کے مطابق اکنامک افیئرز ڈویژن کا کہنا ہے کہ رواں مالی سال کے ابتدائی دو ماہ کے دوران غیرملکی بینکوں سمیت دیگر فنانسنگ ذرائع سے پاکستان میں دو ارب چوبیس کروڑ ڈالر سے زائد غیر ملکی سرمایہ کاری ہوئی، جو بجٹ میں مجموعی سالانہ تخمینے کا اٹھارہ فیصد ہے۔
.
اعدادو شمار کے مطابق مجموعی فارن انفلوز میں سے چھیانوے کروڑ دس لاکھ ڈالر بجٹ سپورٹ کے لئے، غیرملکی کمرشل بینکوں سے چودہ کروڑ نوے لاکھ ڈالر اور تیرہ کروڑ اسی لاکھ ڈالر ترقیاتی منصوبوں میں فنڈنگ کی مد میں حاصل ہوئے۔
رواں مالی سال کے لئے حکومت نے بجٹ میں مجموعی غیر ملکی فنانسنگ کا تخمینہ بارہ ارب تئیس کروڑ روپے لگایا ہے، جس میں سے غیر ملکی کمرشل بینکوں سے تین ارب بانوے کروڑ ڈالر اور ایک ارب ڈالر سعودی آئل فیسیلٹی کی مد میں رہنے کا تخمینہ ہے۔
یاد رہے اکنامک افیئرز ڈویژن کا کہنا تھا کہ کورونا وبا کے دوران بین الاقوامی ڈونرز اور دوست ممالک نے پاکستان کو تین ارب اناسی کروڑچالیس لاکھ ڈالرز فراہم کرنے کا وعدہ کیا تھا ، جس میں سے اب تک تین ارب ڈالرز موصول ہوچکے ہیں ۔
تین ارب ڈالرز میں سے بجٹ سپورٹ کے لئے دو ارب تریسٹھ کروڑ ساٹھ لاکھ ڈالرز آئی ایم ایف ، ایشیائی ترقیاتی بینک اور ایشین انفرا اسٹرکچر انویسٹمنٹ بینک کی جانب سے موصول ہوئے اور ساتھ ہی پراجیکٹ فنانسنگ کی مد میں اڑتیس کروڑ روپے ڈالرز حاصل ہوئے ۔
