دبئی : متحدہ عرب امارات میں آج بھی بارش کا امکان ہے، جس کے پیش نظر ڈرائیوروں کواحتیاط برتنے کی ہدایت کی گئی ہے جبکہ دبئی سمیت مختلف علاقوں میں اسکولز بند ہیں۔
تفصیلات کے مطابق عرب میڈیا کا کہنا ہے کہ متحدہ عرب امارات میں مزید بارشوں کی پیش گوئی کردی گئی ، محکمہ موسمیات کا کہنا ہے کہ سمندری ہوائیں چلنے کا سلسلہ جاری ہے، جس کے سبب جمعرات تک مزید بارشیں متوقع ہیں۔
متحدہ عرب امارات ٹریفک پولیس کی جانب سے ایڈوائزری جاری کی گئی، جس میں کہا گیا ہے کہ بارش کے دوران ڈرائیونگ میں احتیاط برتی جائے اور ڈرائیور اوور ٹیکنگ سے گریز کریں تاکہ کسی بڑے حادثے سے بچا جاسکے۔
گزشتہ روزکی متحدہ عرب امارات کے مختلف شہروں میں موسلا دھار بارش ہوئی تھی ، جس کے بعد سڑکوں پر پانی جمع ہوگیا تھا ، محکمہ موسمیات کی جانب سے بتایا گیا تھا کہ سب سے زیادہ بارش یو اے ای کے شہروں شارجہ، جبل علی اور راس الخیمہ میں ریکارڈ کی گئی۔
مزید پڑھیں : متحدہ عرب امارات میں موسلا دھار بارش، جل تھل ایک ہوگیا
بارش کے پیش نظر دبئی سمیت مختلف علاقوں میں اسکولز بند کرنے کا اعلان کردیا گیا تھا۔
خیال رہے این سی ایم، پولیس اور شہری دفاع نے اس سے قبل بدھ کے روز موسم کا انتباہ جاری کیا تھا، جس میں تیز ہواؤں اور سمندری ہواؤں کے ساتھ شدید بارش سے آگاہ کیا گیا تھا۔
واضح رہے کہ گزشتہ ہفتے بھی متحدہ عرب امارات میں موسلا دھار بارش ہوئی تھی، اسکول بند کردئیے گئے تھے اور دنیا کے سب سے بڑے دبئی مال میں بھی پانی بھر گیا تھا جس کی ویڈیو وائرل ہوگئی تھی۔
