کیف: یوکرین نے جدہ میں امریکی حکام سے جنگ بندی مذاکرات سے قبل ماسکو پر سب سے بڑا ڈرون حملہ کر دیا ہے۔
روسی حکام کا کہنا ہے کہ یوکرین کی جانب سے منگل کو ماسکو پر 337 ڈرونز داغے گئے ہیں، جن سے رہائشی علاقوں کو نشانہ بنایا گیا، حملوں میں عمارتوں کو نقصان پہنچا اور پارکنگ ایریا میں آگ لگ گئی۔
ماسکو کے میئر کا کہنا ہے کہ شہر کی جانب آنے والے 73 ڈرونز کو مار گرایا گیا۔ روئٹرز کے مطابق گزشتہ رات ہونے والے ڈرون حملوں میں گوشت کے گودام میں کم از کم 2 کارکن ہلاک، اور 18 دیگر زخمی ہوئے۔
حملوں کے بعد ماسکو کے 4 ایئرپورٹس کو عارضی طور پر بند کر دیا گیا، روس نے جوابی کارروائی کرتے ہوئے یوکرین پر اپنا سب سے بڑا ڈرون حملہ کیا، اور کیف پر 126 ڈرون داغے گئے۔
روسی وزارت دفاع نے بتایا کہ روس پر کل 337 ڈرون گرائے گئے، جن میں سے 91 ماسکو کے علاقے میں اور 126 کرسک کے علاقے میں شامل ہیں، جہاں سے یوکرینی افواج پیچھے ہٹ رہی ہیں۔
یوکرین جنگ بندی اجلاس سے پُرامید ہوں، امریکی وزیرخارجہ
صبح کو حملہ اس وقت ہوا جب امریکی حکام تین سالہ جنگ کے خاتمے کے لیے سعودی عرب میں یوکرین کے ایک وفد سے ملاقات کرنے والے تھے اور جب روسی افواج مغربی روسی علاقے کرسک میں ہزاروں یوکرینی فوجیوں کو گھیرے میں لینے کی کوشش کر رہی تھیں۔
روئٹرز کے مطابق ایک سینئر روسی قانون ساز نے مشورہ دیا کہ روس کو منگل کے حملے کا بدلہ یوکرین پر ’اورشنک‘ ہائپرسونک میزائل مار کر لینا چاہیے، جو ماسکو نے گزشتہ نومبر میں اس وقت یوکرین پر فائر کیا تھا، جب امریکا اور برطانیہ نے کیف کو مغربی میزائلوں سے روس میں گہرائی میں حملہ کرنے کی اجازت دی تھی۔
