Tag: Umar Gul

کراچی: قومی ٹیم کے سابق فاسٹ بولر عمر گل کا کہنا ہے کہ 2011 کے ورلڈ کپ میں بھارت کے خلاف سیمی فائنل کی شکست کا دکھ آج تک ہے اور ہمیشہ رہے گا، سیمی فائنل کی شکست فراموش نہیں کرسکتا۔

اے آر وائی نیوز کے پروگرام ’باخبر سویرا‘ میں گفتگو کرتے ہوئے سابق فاسٹ بولر عمر گل کا کہنا تھا کہ جتنی بھی کرکٹ کھیلی ملک کے لیے کھیلی، ریٹائرمنٹ کا فیصلہ مشکل تھا لیکن اپنے کیریئر سے مطمئن ہوں۔

عمر گل نے 2011 ورلڈ کپ کی تلخ یادیں شیئر کرتے ہوئے بتایا کہ ’ہم بھارت سے سیمی فائنل ہار گئے تھے وہ میں کبھی بھول نہیں سکتا، ورلڈ کپ میں شرکت سے قبل کوئی بھی ہماری ٹیم کو فیورٹ نہیں کہہ رہا تھا لیکن جب ہم نے ورلڈ کپ کا آغاز کیا تو بہترین شروعات کی اور پھر پیچھے مڑ کر نہیں دیکھا، سیمی فائنل تک رسائی ہماری کامیابی تھی۔

انہوں نے کہا کہ کیریئر کے دوران بھارت کے خلاف کارکردگی سے بہت مدد ملی، 2009 میں ٹی ٹوینٹی ورلڈ کپ جیتنا یادگار لمحہ تھا۔

سابق فاسٹ بولر نے ماضی کی یاد تازہ کرتے ہوئے بتایا کہ 2004 میں بھارت کے خلاف لاہور ٹیسٹ میں واپسی ہوئی تھی اور میں نے 5 وکٹیں حاصل کیں اور ہم سیریز 1-1 سے برابر کرنے میں کامیاب ہوئے، اس پرفارمنس کے بعد میری بولنگ میں مزید نکھار پیدا ہوا۔

نوجوانوں کو عمر گل نے پیغام دیا کہ ’کبھی بھی شارٹ کٹ کے چکر میں نہ رہیں، محنت کریں، آپ پڑھائی، کرکٹ یا کسی بھی شعبے سے منسلک ہوں اس کو اہمیت دیں انشا اللہ کامیابی آپ کا مقدر ہوگی۔‘