ریاض: سعودی عرب کے جدہ ایئر پورٹ پر رمضان اور عید کی تعطیلات کے دوران 44 لاکھ افراد کو سفر کی سہولیات فراہم کی گئیں، صرف یکم اپریل کو ڈیڑھ لاکھ افراد نے سفر کیا۔
اردو نیوز کے مطابق سعودی عرب میں مطارات جدہ کمپنی کا کہنا ہے کہ اس سال عمرہ سیزن کا آپریشنل پلان کامیاب رہا ہے، 44 لاکھ افراد کو رمضان اور عید الفطر کی تعطیلات میں سفر کی سہولت فراہم کی گئی۔
مطارات جدہ کمپنی کے ایگزیکٹو چیئرمین ایمن ابو عباۃ کا کہنا ہے کہ رواں عمرہ سیزن میں کئی نئے اقدامات کیے گئے، عمرہ زائرین کی تمام کارروائی تیزی سے نمٹانے اور امیگریشن اینڈ کسٹم زون میں انتظار کا دورانیہ کم کرنے میں مدد ملی ہے۔
ایمن ابو عباۃ کا کہنا تھا کہ جدہ ایئرپورٹ پر رمضان اور عید الفطر کی تعطیلات کے دوران 44 لاکھ سے زیادہ افراد کو آمد ورفت کی سہولت فراہم کی گئی، 28 ہزار پروازیں آپریٹ کی گئی ہیں، 79 لاکھ بیگ منتقل کیے گئے، ایئر کارگو کا مجموعی حجم اس دوران 30 ہزار ٹن تک پہنچ گیا۔
انہوں نے کہا کہ جدہ ایئرپورٹ نے بہترین آپریشنل نمبر ریکارڈ کروائے ہیں، سال رواں کی پہلی سہ ماہی کے دوران تقریباً 11 ملین افراد نے سفر کیا جو 2022 کی پہلی سہ ماہی کے مقابلے میں تقریباً 99 فیصد زیادہ ہے، 2022 کی پہلی سہ ماہی میں 5.6 ملین افراد نے سفر کیا تھا۔
ان کے مطابق 10 رمضان یکم اپریل 2023 کو جدہ ایئرپورٹ سے 1 لاکھ 43 ہزار افراد نے سفر کیا جو ایک ریکارڈ ہے۔
مطارات جدہ کمپنی کے چیئرمین کا کہنا ہے کہ 27 سے زیادہ سرکاری و نجی اداروں کے نمائندہ، 20 ہزار اہلکاروں نے زائرین کو سہولتیں فراہم کیں، ایئرپورٹ کے تمام ٹرمینلز پر مطلوبہ انتظامات کیے گئے تھے۔
