ARYNews.tv | Urdu – Har Lamha Bakhabar

Tag: UN

  • سلامتی کے دشمن بھارت کی سلامتی کونسل میں پھر سبکی

    سلامتی کے دشمن بھارت کی سلامتی کونسل میں پھر سبکی

    نیویارک: مقبوضہ کشمیر کی صورت حال پر اقوام متحدہ کے سیکیورٹی کونسل میں اہم اجلاس ہوا جہاں بھارتی مظالم پر تبادلہ خیال کیا گیا۔

    تفصیلات کے مطابق سلامتی کونسل اجلاس میں کشمیر کا ایجنڈا پاکستان اور چین کی جانب سے پیش کیا گیا۔ عالمی رہنماؤں نے مقبوضہ وادی میں ہونے والے مظالم پر تشویش کا اظہار کیا۔

    سلامتی کونسل کا 5اگست کے بھارتی اقدام کے بعد یہ تیسرا اجلاس ہے، یہ اجلاس پاکستان اور چین کی درخواست پر ہوا، اقوام متحدہ کے امن اداروں نے کونسل میں بریفنگ دی۔ سلامتی کونسل میں مقبوضہ جموں وکشمیر کی صورت حال کا تفصیلی جائزہ لیا گیا۔

    ذرائع کا کہنا ہے کہ مقبوضہ کشمیر پر سلامتی کونسل کا اجلاس معاملے کی سنگینی کا اعکاس ہے۔

    عالمی رپورٹ نے مودی کا مکروہ چہرہ بے نقاب کردیا

    کشمیر کا تنازع سلامتی کونسل کے ایجنڈے کا مسلسل حصہ ہے۔ وزیرخارجہ شاہ محمودقریشی نیویارک کے وقت کے مطابق شام ساڑھے 6بجے پریس بریفنگ کریں گے، جس میں مقبوضہ وادی سمیت سلامتی کونسل کے اجلاس سے متعلق آگاہی دی جائے گی۔

    خیال رہے کہ ہیومن رائٹس واچ نے گزشتہ سال مودی حکومت کی انسانی حقوق کی پامالیوں پر رپورٹ جاری کردی۔ رپورٹ میں بھارت بھر میں ہونے والے مظالم کو بے نقاب کیا گیا۔ رپورٹ میں کہا گیا ہے کہ یوپی میں بھارتی پولیس کے ہاتھوں 77 افراد کا ماورائے عدالت قتل ہوا، بیف لے جانے کے الزام پر ہجوم نے 50افراد کو موت کے گھاٹ اتارا گیا۔ مقبوضہ وادی میں ہونے والے انسانیت سوز اقدامات عالمی سطح پر کھل کر سامنے آگئی۔

  • مقبوضہ کشمیر پر اقوام متحدہ کی سیکیورٹی کونسل کا اجلاس آج ہوگا

    مقبوضہ کشمیر پر اقوام متحدہ کی سیکیورٹی کونسل کا اجلاس آج ہوگا

    نیویارک: مقبوضہ کشمیر پر اقوام متحدہ کی سیکیورٹی کونسل کا اہم اجلاس آج ہوگا، سیکیورٹی کونسل کا بند کمرہ اجلاس چین کی درخواست پر طلب کیا گیا ہے۔

    تفصیلات کے مطابق مقبوضہ کشمیر میں بھارتی جارحیت کے سدباب اور جائزہ لینے کے لیے سیکیورٹی کونسل کا اہم اجلاس آج ہوگا۔ مودی مشن کے تحت وادی میں کرفیو تاحال برقرار ہے۔

    غیر ملکی خبررسان ادارے کے مطابق اگست میں بھی مقبوضہ کشمیر پر سیکیورٹی کونسل کا اجلاس ہوا تھا۔ جبکہ وزیرخارجہ شاہ محمود قریشی نے 12دسمبر کو سیکیورٹی کونسل کو خط لکھا تھا، خط میں مقبوضہ کشمیر میں کشیدگی میں اضافے کا خدشہ ظاہر کیا گیا تھا۔

    مقبوضہ کشمیر میں بھارتی ریاستی دہشت گردی اور ظلم وبربریت کا سلسلہ تھم نہ سکا، وادی میں کرفیو اور لاک ڈاؤن 135ویں روز میں داخل ہوگیا۔ مقبوضہ کشمیر میں دکانیں، کاروبار، تعلیمی مراکز بند ہیں اور لوگ گھروں میں محصور ہو کر رہ گئے ہیں۔ مقبوضہ وادی میں نام نہاد سرچ آپریشن کی آڑ میں مظلوم اور نہتے کشمیریوں کے قتل کا سلسلہ بھی جاری ہے۔

    سیکیورٹی کونسل کا فوری مسئلہ کشمیر پر نوٹس لینا حکومت کی کامیابی ہے، راجہ بشارت

    مقبوضہ کشمیر میں موبائل فون، انٹرنیٹ سروس بند اور ٹی وی نشریات معطل ہیں۔ مقبوضہ وادی میں کھانے پینے کی اشیا اور دواؤں کی قلت ہے، جامع مسجد کے اطراف رکاوٹیں لگائی گئی ہیں۔

  • آنگ سان سوچی دی ہیگ میں اقوامِ متحدہ کی عالمی عدالت انصاف میں پیش

    آنگ سان سوچی دی ہیگ میں اقوامِ متحدہ کی عالمی عدالت انصاف میں پیش

    دی ہیگ : میانمار کی رہنما آنگ سان سوچی کو دی ہیگ میں اقوامِ متحدہ کی عالمی عدالت انصاف آئی سی جے میں پیش ہوئی ہیں جہاں وہ نسل کشی کے الزامات کے خلاف اپنے ملک کا دفاع کریں گی۔

    برطانوی نشریاتی ادرے بی بی سی کے مطابق امن کا نوبل انعام حاصل کرنے والی آنگ سان سوچی ان الزامات کو سنیں گی جن میں یہ کہا گیا ہے کہ میانمار نے روہنگیا مسلمانوں پر ظلم و ستم کیے۔

    خیال رہے کہ بدھ مت کے پیروں کاروں کی اکثریتی آبادی کے ملک میانمار میں بسنے والے ہزاروں روہنگیا سنہ 2017 میں فوج کے کریک ڈاؤن میں ہلاک ہوئے اور سات لاکھ سے زیادہ ہمسایہ ملک بنگلہ دیش چلے گئے۔

    میانمار نے ہمیشہ اس بات پر اصرار کیا ہے کہ وہ انتہا پسندی کے خطرے کا سامنا کر رہا ہے, یہ مقدمہ مغربی افریقہ کے مسلم اکثریت والے ملک گیمبیا نے درجنوں مسلم ممالک کی طرف سے دائر کیا ہے۔

    کیس کی ابتدائی تین روزہ کارروائی کے دوران بین الاقوامی عدالت انصاف سے کہا جائے گا کہ وہ عارضی طور پر روہنگیا کی حفاظت کے لیے اقدامات کرے۔ نسل کشی کے الزامات پر فیصلہ آنے میں برسوں لگ سکتے ہیں۔

    مزید پڑھیں : روہنگیا مسلمانوں کا قتل عام، دو سال مکمل ہونے پر لاکھوں مہاجرین کی ریلی

    یاد رہے کہ دو برس قبل میانمار کے صوبے رخائن میں فوج نے ریاستی آپریشن شروع کیا تھا جس کی آڑ میں لاکھوں مسلمانوں کو شہید کردیا گیا تھا جبکہ 7 لاکھ کے قریب مسلمانوں نے بنگلادیش ہجرت کی تھی۔

    عالمی ادارے(یو این) کے تحقیق کاروں کا کہنا تھا کہ 2017 میں برمی فوج نے مسلمانوں کی نسل کشی کے لئے ریخائن میں آپریشن کیا جس کے بعد 7لاکھ 30 ہزار مسلمان بنگلہ دیش ہجرت کرنے پر مجبور ہوئے۔

  • سلامتی کونسل کی رکنیت، پاکستان نے بھارتی اہلیت پر سوالات اٹھا دیے

    سلامتی کونسل کی رکنیت، پاکستان نے بھارتی اہلیت پر سوالات اٹھا دیے

    نیویارک: سلامتی کونسل میں اصلاحاتی عمل سے متعلق مباحثے کے دوران پاکستان نے سلامتی کونسل کی مستقل رکنیت کے لیے بھارتی اہلیت پر سوالات اٹھا دیے۔

    تفصیلات کے مطابق اقوام متحدہ میں پاکستانی مندوب منیراکرم کا کہنا ہے کہ بھارت سلامتی کونسل کی قراردادوں کی کھلی خلاف ورزی کرتا ہے، قراردادوں کی خلاف ورزی کرنے والا ملک سلامتی کونسل میں غیر مستقل رکنیت کا بھی اہل نہیں ہے۔

    انہوں نے کہا کہ مستقل رکنیت کے خواہشمند کس بنیاد پر دیگر سے زیادہ استحقاق مانگ رہے ہیں، مغلوب عوام کے حقوق سلب کرنے والا عالمی امن کا ضامن کیسے ہوسکتا ہے؟

    منیراکرم کا کہنا تھا کہ سلامتی کونسل میں رکنیت کے لیے ممالک کی طاقت کونہ دیکھا جائے، رکنیت کے خواہش مند ملک کی عالمی امن کے لیے کوشش کو دیکھنا چاہیے، اصلاحات پر پاکستانی موقف عصر حاضر کے تقاضوں سے ہم آہنگ ہے۔

    مقبوضہ کشمیرمیں 114ویں روز بھی کرفیو برقرار

    ادھر مقبوضہ کشمیر میں قابض بھارتی فوج کی جارحیت بدستور جاری ہے اور وادی میں لاک ڈاؤن کا 114واں روز ہے، کشمیری روز مرہ کی ضروری اشیا اشیاء خریدنے سے بھی قاصر ہیں، دودھ بچوں کی خوراک، ادویات سب ختم ہو چکا ہے۔

    واد ی میں لاک ڈاؤن کے باعث کشمیریوں کو شدید مشکلات کا سامنا ہے۔ کرفیو اور پابندیوں کے باعث اب تک مقامی معیشت کو ایک ارب ڈالر کا نقصان ہوچکا ہے جبکہ ہزاروں لوگ بے روزگار ہوچکے ہیں۔

  • نئے پاکستانی مندوب نے سیکرٹری جنرل کو سفارتی اسناد پیش کردیں

    نئے پاکستانی مندوب نے سیکرٹری جنرل کو سفارتی اسناد پیش کردیں

    نیویارک: اقوام متحدہ میں نئے پاکستانی مستقل مندوب منیراکرم نے سیکرٹری جنرل انتونیو گوتیریز کو اپنی سفارتی اسناد پیش کردیں۔

    تفصیلات کے مطابق اقوام متحدہ ہیڈ کوارٹر میں سفارتی اسناد پیش کرنے کی تقریب منعقد ہوئی، اس موقع پر پاکستان کے نئے مندوب نے اپنی سفارتی اسناد یو این سیکرٹری جنرل کو پیش کیں۔

    اس موقع پر انتونیو گوتیرز کا کہنا تھا کہ پاکستان اقوام متحدہ کا ایک اہم رکن ہے، نئے مستقل مندوب کا استقبال کرکے خوشی محسوس ہورہی ہے، امید ہے منیر اکرم تعلقات کو مزید بہتر بنائیں گے۔

    نئے مندوب سابق صدر پرویز مشرف کے دور میں بھی سنہ 2002 سے 2008 تک اقوام متحدہ میں پاکستان کے مستقل مندوب کی حیثیت سے اپنے فرائض سرانجام دے چکے ہیں۔

    خیال رہے کہ سنہ 2008 میں پیپلز پارٹی کی حکومت کی جانب سے بینظیر بھٹو کے قتل کی تحقیقات اقوام متحدہ سے کروانے کے معاملے پر منیر اکرم کے پیپلز پارٹی سے اختلافات پیدا ہو گئے تھے جس کے بعد انھیں عہدے سے ہٹا دیا گیا تھا۔

    ڈاکٹر ملیحہ لودھی کو ہٹایا نہیں گیا، ان کی مدت ملازمت مکمل ہوچکی تھی، ترجمان دفترخارجہ

    یاد رہے کہ گزشتہ ماہ وزیراعظم عمران خان نے اقوام متحدہ میں ملیحہ لودھی کی جگہ منیر اکرم کو پاکستان کا مستقل مندوب مقرر کیا تھا۔

    اس حوالے سے ڈاکٹر ملیحہ لودھی کا کہنا تھا کہ دنیا کے سب سے اہم فورم پر ملک کی نمائندگی کرنا ان کیلیے اعزاز کی بات ہے۔ انہوں نے نئے مستقل مندوب منیراکرم کے لیے نیک خواہشات کا اظہار بھی کیا۔

    انہوں نے یہ بھی کہا تھا کہ وزیراعظم عمران خان کے اقوام متحدہ کے دورے کے موقع پر ملنے والی پذیرائی پر بے حد ممنون ہیں۔

    واضح رہے کہ ڈاکٹر ملیحہ لودھی سینئر سفارت کار رہی ہیں اور انہیں دسمبر2014 میں اقوام متحدہ میں مستقل مندوب تعینات کیا گیا تھا اور انہوں نے فروری 2015 سے ذمہ داریاں سنبھالیں تھیں۔

  • ملیحہ لودھی کا آخری خطاب، سلامتی کونسل کے ہال میں تالیوں کی گونج

    ملیحہ لودھی کا آخری خطاب، سلامتی کونسل کے ہال میں تالیوں کی گونج

    نیویارک: ڈاکٹر ملیحہ لودھی نے اقوام متحدہ کی سلامتی کونسل میں اپنا آخری خطاب کیا جہاں انہوں نے کشمیر کا مقدمہ لڑا اور خواتین کے حقوق کی بات کی۔

    تفصیلات کے مطابق اقوام متحدہ کی سلامتی کونسل میں خواتین اور امن و سلامتی پر مباحثہ ہوا، جس میں ڈاکٹر ملیحہ لودھی نے بحیثیت مندوب اپنا آخری خطاب کیا۔

    اپنے خطاب میں ملیحہ لودھی نے کشمیر میں بھارتی جارحیت اور خواتین پر اسکے اثرات پر روشنی ڈالی۔ ان کا کہنا تھا کہ 70سال میں پاکستان کی پہلی خاتون مستقل مندوب ہونے پر فخر ہے۔

    انہوں نے کہا کہ مقبوضہ کشمیر میں عورتوں کو شدید اذیت اور کرب کا سامنا ہے، کرفیو اور پابندیوں نے کشمیری عورتوں کی زندگی اجیرن کر دی ہے۔

    ان کا کہنا تھا کہ قابض افواج عورتوں کے سامنے ان کے بچے اٹھا کرلے جاتی ہیں، بھارتی افواج جنسی تشدد جیسے سنگین جرائم میں بھی ملوث پائی گئی ہے۔

    وزیرخارجہ کا پاکستان کے لیے اقوام متحدہ میں خدمات پر ملیحہ لودھی سے اظہار تشکر

    ملیحہ لودھی نے مزید کہا کہ عالمی برادری اس سنگین صورت حال کا جائزہ لے، مقبوضہ کشمیر میں بھارتی فوج نے ظلم وبربریت کی انتہا کردی ہے۔

    خیال رہے کہ گذشتہ ماہ وزیراعظم نے عمران خان وزارت خارجہ میں تقرر وتبادلوں کی منظوری دی تھی جس کے بعد ملیحہ لودھی کی جگہ سینئر سفارت کار منیر اکرم کو اقوام متحدہ میں پاکستان کا مستقل مندوب مقرر کیا گیا۔

    ڈاکٹر ملیحہ لودھی سینئر سفارت کار رہی ہیں اور انہیں دسمبر 2014 میں اقوام متحدہ میں مستقل مندوب تعینات کیا گیا تھا۔ انہوں نے فروری 2015 سے ذمہ داریاں سنبھالیں تھیں۔

  • اقوام متحدہ ایل او سی پر بلا اشتعال بھارتی فائرنگ کا نوٹس لے: ملیحہ لودھی

    اقوام متحدہ ایل او سی پر بلا اشتعال بھارتی فائرنگ کا نوٹس لے: ملیحہ لودھی

    نیویارک: ڈاکٹر ملیحہ لودھی کا کہنا ہے کہ پاکستان ہمیشہ اقوام متحدہ کی امن ساز سرگرمیوں میں پیش پیش رہا ہے، پاکستان امن دستوں نے عالمی امن کے لیے بہت خدمات سرانجام دیں۔

    تفصیلات کے مطابق ان خیالات کا اظہار ملیحہ لودھی نے امن مشن آپریشنز کے نائب سیکرٹری جنرل ژان لا کرا سے الوداعی ملاقات کے موقع پر کیا۔

    انہوں نے کہا کہ اقوام متحدہ ایل او سی پر بلا اشتعال بھارتی فائرنگ کا نوٹس لے، ایل او سی پر بڑھتی بھارتی اشتعال انگیزی صورت حال مزید خطرناک کررہی ہے۔

    ان کا کہنا تھا کہ کشمیر میں تعینات مبصر مشن مزید متحرک کرنے کی ضرورت ہے، رواں سال بھارت 2608 مرتبہ ایل اوسی کی خلاف ورزی کرچکا ہے، عالمی برادری معاملے کا نوٹس لے۔

    ملیحہ لودھی نے بتایا کہ رواں سال بھارتی فائرنگ سے 44 پاکستانی شہید ہوچکے ہیں، لائن آف کنٹرول پر بلااشتعال فائرنگ سے معاملات مزید خطرے کی طرف جاسکتے ہیں۔

    ایل او سی پر بھارتی جارحیت، پاکستان کا منہ توڑ جواب، 9 بھارتی فوجی ہلاک

    یاد رہے کہ 20 اکتوبر کو لائن آف کنٹرول پر سیزفائر کی خلاف ورزی کرنے پر پاکستان نے ایک بار پھر بھارت کو منہ توڑ جواب دیا تھا، جس کے نتیجے میں 9 بھارتی فوجی مارے گئے تھے۔

    ڈی جی آئی ایس پی آر کا کہنا تھا کہ بھارتی فوج نے شاہ کوٹ، نوسیری اور جوڑا سیکٹر پر شہری آبادی کو نشانہ بنایا، جس پر پاک فوج نے جوابی کارروائی کرتے ہوئے 9 بھارتی فوجی اہلکار ہلاک کردیے۔

  • اقوام متحدہ کا عالمی دن آج منایا جا رہا ہے

    اقوام متحدہ کا عالمی دن آج منایا جا رہا ہے

    نیویارک: دنیا بھر میں آج اقوام متحدہ کا عالمی دن منایا جا رہا ہے، آج سے 74 سال قبل آج ہی کے دن اقوام متحدہ کی بنیاد رکھی گئی اور اس کا منشور نافذ العمل کیا گیا۔

    تفصیلات کے مطابق آج اقوام متحدہ کا عالمی دن منایا جا رہا ہے۔ یہ دن 1945 میں اقوام متحدہ کے منشور کے نافذ العمل ہونے کی سالگرہ کی یاد تازہ کرنے کے لیے تمام ممبر ممالک ہرسال آج کے دن مناتے ہیں۔

    دوسری جنگ عظیم کے بعد آئندہ نسلوں کو جنگوں کی تباہ کاریوں سے بچانے اور دنیا بھر کے تمام ملکوں کو مذاکرات کے لیے ایک پلیٹ فارم مہیا کرنے کے لیے 1945 میں اقوام متحدہ کا قیام عمل میں لایا گیا جس کا مقصد عالمی قوانین، سماجی و اقتصادی ترقی، حقوق انسانی اور دنیا بھر میں امن قائم کرنے کے لیے مدد فراہم کرنا ہے۔

    اقوام متحدہ کے چارٹر کے اہم مقاصد میں دنیا بھر میں امن اور سیکورٹی کو ممکن بنانا، قوموں کے درمیان رشتے بڑھانا، معاشی، سماجی، ثقافتی یا بین الاقوامی انسانی مسائل کے حل کے لیے قوموں کے درمیان تعاون بڑھانا ہے۔

    اس وقت دنیا بھر کے 192 کے قریب آزاد ممالک اور ریاستیں اقوام متحدہ کی رکن ہیں۔ اقوام متحدہ میں 6 عالمی زبانوں عربی، انگلش، چائنیز، فرانسیسی، روسی اور ہسپانوی میں کارروائی ہوتی ہے۔

    اقوام متحدہ کے تمام نظام کو اس کی ذیلی ایجنسیاں جنرل اسمبلی، سیکیورٹی کونسل اور دیگر ایجنسیاں چلاتی ہیں۔

    واضح رہے کہ اقوام متحدہ کی جنرل اسمبلی کا پہلا اجلاس لندن میں ہوا۔ بعدازاں نیویارک کو متفقہ طور پر ادارے کے ہیڈکوارٹرز کے لیے منتخب کیا گیا، اسی لیے ہر سال اقوام متحدہ کی جنرل اسمبلی کا اجلاس نیویارک میں ہوتا ہے۔

  • بھارت کشمیر میں عائد پابندیاں ختم اور گرفتار افراد کو رہا کرے: ہیومن رائٹس واچ

    بھارت کشمیر میں عائد پابندیاں ختم اور گرفتار افراد کو رہا کرے: ہیومن رائٹس واچ

    نیویارک: انسانی حقوق کی عالمی تنظیم ہیومن رائٹس واچ نے بھارت پر زوردیا ہے کہ وہ جموں وکشمیرمیں سیاسی قیدیوں کو رہا کرے، فوجی کارروائیاں ختم کرے اور انٹرنیٹ اور موبائل فون سروسز بحال کرے۔

    تفصیلات کے مطابق ہیومن رائٹس واچ جنوبی ایشیا کی ڈائریکٹر میناکشی گنگولی نے ایک بیان میں کہا کہ گزشتہ دوماہ سے جب سے بھارتی حکومت نے جموں و کشمیر کی آئینی خودمختاری ختم کی اور ریاست کو دو حصوں میں تقسیم کردیا، علاقے میں موبائل اور انٹرنیٹ سروسز کی معطلی سمیت سخت پابندیاں عائد ہیں۔

    انہوں نے کہا کہ بہت سے غیر ملکی رہنماؤں نے کشمیری رہنماؤں کی مسلسل نظربندی، احتجاجی مظاہروں پر پابندی، لوگوں کو تشدد کا نشانہ بنانے اور بھاری تعداد میں فوجیوں کی تعیناتی کے باعث نقل وحرکت پر قدغنوں، ہنگامی طبی امداد سمیت عوامی خدمات میں رکاوٹوں پر تشویش کا اظہار کیا ہے۔

    مقبوضہ کشمیر سے متعلق تقریر پر بھارتی اعتراض مسترد، ملائیشین وزیر اعظم مؤقف پر ڈٹ گئے

    ان کے مطابق بھارت کہتا ہے کہ پابندیوں سے لوگوں کی زندگیوں کو بچایاگیا اور امن وامان کو قائم رکھا گیا ہے، لیکن بھارتی فورسز کے ہاتھوں فائرنگ کا نشانہ بننے اور گرفتاری کے خوف سے وادی کشمیرمیں تمام دکانیں بند اور کلاس روم خالی پڑے ہیں۔

    میناکشی گنگولی نے کہا کہ انتظامیہ سفارتکاروں، بین الاقوامی ذرائع ابلاغ کے صحافیوں، بھارت کے سماجی کارکنوں اور حزب اختلاف کے سیاست دانوں کو علاقے کا دورہ کرنے کی اجازت نہیں دے رہی ہے۔

    ان کا مزید کہنا تھا کہ انتظامیہ کو ظالمانہ کارروائیوں کا خاتمہ کرنا چاہیے اور انسانی حقوق کی پامالیوں پر فورسز اہلکاروں سے جواب طلب کرنا چاہیے۔

  • عراق میں حکومت مخالف مظاہرے اور خونریزی، اقوام متحدہ کا اظہار تشویش

    عراق میں حکومت مخالف مظاہرے اور خونریزی، اقوام متحدہ کا اظہار تشویش

    نیویارک: اقوام متحدہ نے عراق میں جاری خونریزی کی شدید مذمت کرتے ہوئے زور دیا ہے کہ فریقین فوری طور پر تشدد کا راستہ ترک کر دیں۔

    تفصیلات کے مطابق مشرق وسطی کے اس ملک میں جاری حکومت مخالف مظاہروں کے نتیجے میں ایک سو کے قریب افراد مارے جا چکے ہیں۔

    غیر ملکی خبررساں ادارے کے مطابق گزشتہ منگل سے بغداد میں سینکڑوں مظاہرین بدعنوانی، بے روزگاری، بجلی اور پینے کے صاف پانی کی فراہمی پر حکومت کے خلاف مظاہرے کر رہے ہیں۔

    اسی دوران کئی مقامات پر سکیورٹی فورسز نے طاقت کا ناجائز استعمال کیا۔ وزیر اعظم عادل عبدالمہدی نے مظاہرین کے مطالبات تسلیم کرتے ہوئے انہیں گھروں کو لوٹ جانے کا مشورہ دیا ہے۔

    عراق میں موجودہ صورت حال پر اقوام متحدہ نے شدید تشویش کا اظہار کرتے ہوئے کہا ہے کہ فریقین معاملے کو مذاکرات کے ذریعے حل کریں، تاکہ تنازع مزید بڑھنے سے رک جائے۔

    عراق: حکومت مخالف احتجاج، 100 سے زائد افراد جاں بحق، وزیر اعظم کا اصلاحات کا اعلان

    خیال رہے کہ عراق میں حکومت مخالف احتجاج شدت اختیار کر گیا، مظاہرین اور سیکورٹی اہل کاروں میں جھڑپوں کے دوران اب تک 100 سے زاید افراد جاں بحق ہو چکے ہیں۔

    عراق میں کرپشن اور بے روز گاری کے خلاف عوامی احتجا ج 5 روز سے جاری ہے، غیر ملکی میڈیا کا کہنا ہے اس دوران پر تشدد واقعات میں سو سے زاید افراد جاں سے ہاتھ دھو چکے ہیں۔

    عراقی پارلیمنٹ کے انسانی حقوق کمیشن کے مطابق ملکی دارالحکومت اور جنوبی حصے میں مظاہروں کے دوران ہونے والی ہلاکتوں کی تعداد 93 ہے، جب کہ زخمیوں کی تعداد 4 ہزار کے قریب ہے۔