نیویارک: چین کے وزیرخارجہ وانگ ژی نے کہا ہے کہ کشمیر اقوام متحدہ کا چھوڑا ہوا اہم تنازعہ ہے، جسے بھارت مزید پیچیدہ بنا رہا ہے۔
تفصیلات کے مطابق اقوام متحدہ کی جنرل اسمبلی سے خطاب میں چینی وزیرخارجہ وانگ ژی کا کہنا تھا کہ چین بھارت کے کشمیر سے متعلق اقدام کی مخالفت کرتا ہے۔
ان کا کہنا تھا کہ مسئلہ کشمیر اقوام متحدہ کے منشور کے مطابق دو طرفہ معاہدوں کی بنیاد پر حل ہونا چاہیے، یہ اقوام متحدہ کا چھوڑا ہوا تنازعہ ہے۔
مقبوضہ کشمیر سے متعلق دنیا بھر میں بھارتی اقدامات کی شدید مذمت کی جارہی ہے، جبکہ پاکستان کے وزیراعظم عمران خان اس مسئلے کو سنجیدگی سے حل کرنے کے لیے کوشاں ہیں۔
اقوام متحدہ دو نیوکلیئر طاقتوں کے آمنے سامنے آنے سے پہلے اپنا کردار ادا کرے، وزیراعظم
وزیراعظم عمران خان نے اقوام متحدہ کی جنرل اسمبلی میں تاریخی خطاب کرتے ہوئے کہا کہ کیا مودی سمجھتا ہے کہ کرفیو کے بعد کشمیری خاموشی سے اسے قبول کرلیں گے، کرفیو اٹھنے کے بعد کشمیر میں خون کی ندیاں بہیں گی، بھارت مقبوضہ کشمیر میں فوری کرفیو اٹھائے اور سیاسی قیدیوں کو رہا کرے۔
ان کا کہنا تھا کہ مودی کو اس کے غرور نے اندھا کردیا ہے، کرفیو اٹھنے کے بعد کشمیرمیں خون کی ندیاں بہیں گی، اقوام متحدہ کو کشمیریوں کو حق خود ارادیت دلانا پڑے گا۔
