نیویارک: اقوام متحدہ میں پاکستانی مندوب عاصم افتخار نے کہا ہے کہ سلامتی کونسل غزہ میں مستقل اور غیرمشروط جنگ بندی کرائے۔
یہ بات انہوں نے غزہ میں امداد سے متعلق سلامتی کونسل اجلاس سے خطاب کرتے ہوئے کہی، انہوں نے کہا کہ غزہ کے لوگ ناقابل تصور اذیت ناک تکالیف کا سامنا کرچکے ہیں۔
عاصم افتخار کا کہنا تھا کہ غزہ کے لوگوں کو امن وعزت کے ساتھ رہنے کا حق ہے، سلامتی کونسل اپنی قرار دادوں پرعمل درآمد اور فلسطین پر قبضہ ختم کرائے۔
پاکستانی مندوب نے کہا کہ قیام امن کا راستہ1967 سے قبل کی سرحدوں کی بنیاد پر دو ریاستی حل ہے،
سلامتی کونسل غزہ میں مستقل اور غیرمشروط جنگ بندی کرائے۔
فلسطینی علاقوں پر قبضہ ہی مسئلے کی بنیادی وجہ ہے جسے سلامتی کونسل فوری طور پر حل کرے،
غزہ کا محاصرہ فوری ختم کیا جائے، فلسطینیوں کی جبری بےدخلی منظور نہیں۔
عاصم افتخار نے کہا کہ غزہ میں بھوک کا بطور جنگی ہتھیار استعمال ایک سنگین جرم ہے ،سلامتی کونسل غزہ میں امدادی قافلوں، طبی عملے کی حفاظت کو یقینی بنائے۔
اپنے خطاب میں ان کا کہنا تھا کہ غزہ میں اجتماعی سزا دینے کا سلسلہ ختم کیا جائے، غزہ کی تعمیرنو کے پلان کی مکمل اور بھرپور حمایت کی جائے۔
غزہ میں اسپتالوں، طبی عملے کو ہدف بنا کر منظم حملے کیے گئے، وہاں 4لاکھ 70 ہزار افراد کو تباہ کن بھوک اور افلاس کا سامنا ہے، غزہ میں ورلڈ فوڈ پروگرام کی تمام بیکریاں بند کردی گئی ہیں۔
